Hoseya 14
14
Hoseya unodana Iziraela kuti ishanduke
1Shanduka iwe Iziraela, shandukila kuna Yahwe Ndzimu uwo,
kana wakaligwa nge tjibi tjitjo.
2Yendani muna matama
mubgwilile kuna Yahwe,
muswike muti ku bali,
“Mutizwiibhatigwe matjinyo edu wose,
mutiamutjile nge ngoni
ndizo tiduse tjibhayilo tje tjipo tje milomo yedu.
3Asiriya ayingatitjidze,
atitowotaswa mbizi.
Atitjawobe tingatjati, ‘Midzimu yedu,’
tidwa zwakathamiwa nge maboko edu.
Mu muli siyang'wa inowana ngoni.”
4Ndowolapa kuzwilasha kwabo
ngono abada ndakasununguka,
ngoti kugwadzamoyo kwangu kwapela mu bali.
5Ndowonga khawa kuna Iziraela,
unowothinila se luba linoyi lili.
Unowofana miti ye Lebanoni,
midzi iye inowonginila pasi.
6Thabi dzidze tjetjana dzowokula dzikapasula,
bubuya gugwe gowonga gwe mitoba,
nnuhwo uwe unowozipa ukanga we Lebanoni.
7Unowogala kakale mu ntutshi wangu,
ngono unowopasula se thunde.
Unowothinila se nzhambi,
kazibika se nkumbi we zhambi we Lebanoni.
8Iwe Ifureimi, apa ndingashingani nge zwifano?
Ndowon'dabila abuya antjengeta.
Ndofanana ne nsipuri unogala una mazhani matshwa,
mitjelo yenyu inodwa mundili.
9Ndiani wakatjenjela? Iye unowohwisisa zwithu izwezwi.
Ndiani unothubukanya? Iye unowozwihwisisa.
Ngoti zila dza Yahwe dzakalulwama,
balulwami banoyenda mudzili
koga bapanduki banokuthiwa mudzili.
Kalanga Bible © Bible Society of Botswana, 2008, 2018.