Kutangisa 48

Jakubo unokombolela Ifureimi na Manase

1Shule kwe tjibaka Josefa kabudziwa kuyi, “Tate babo banogwala.” Ndizo katola bakololo babe babili, Manase na Ifureimi kayenda nabo ku bali. 2Jakubo kati abudziwa kuyi, “Nkololo wenyu Josefa wazha ku muli,” Iziraela kazwisimisa kamuka kagala pa bulawo. 3#Kutangisa 28:13, 14Jakubo kati kuna Josefa, “Ndzimu Masimbawose bakaboneka kundili mu nzi we Luzi mu shango ye Kanana ngono bakandikombolela.” 4Bakandidwa bakati, “Ndowokuthama ukabe ne mbeleko, unowobe ne bana banjinji. Ndowokuthama itjaba tje bathu, ngono ndowopa ludzi gugo shango iyeyi kube yabo nge kusingapele.”

5Jakubo kadwilila eti, “Ndizo ngwenu wali bakololo babo babili bakazwaligwa mu Egipiti ndisathu azha ngeno babe bangu, Ifureimi na Manase banowobe bangu koga sa Rubheni na Simiyoni bali bangu. 6Bamwe bana baungazwala shule kwabo banowobe babo. Banowolongwa mu mazina e bakulu babo kuyendidzana ne thaka yabo. 7#Kutangisa 35:16-19Ndakati ndidwa ku Padani mmeyabo Rahele bakandifila mu shango ye Kanana titji mu zila, thambo futshwanana kudwa mu Efurati. Ndizo ndakababiganya pa hwunde ye Efurati” (kodwiwa Bhetelehema).

8Kukati Iziraela ebona bakololo ba Josefa, kabhuzwa kati, “Ndiboani ibaba?”

9Josefa kadabila eti, “Ibaba bakololo bangu bandakapiwa ne Ndzimu muno mu Egipiti.”

Ipapo Jakubo kabe eti, “Ubazhise kundili kuti ndizo ndibakombolele.” 10Mesho a Iziraela akabe asingatjabonesese ngokwegula, wakabe asingatjabone zubuyanana. Ndizo Josefa kasedzedza bakololo babe kuna tate babe ngono ibo bakabaputa bakabagumbatila. 11Iziraela kati kuna Josefa, “Ndakabe ndisingakumbule kuti ndingakubona kakale, koga ngwenu Ndzimu wathama kuti ndibone bana babobo.” 12Ipapo Josefa kabadusa pa makumbo a tate babe ngono kathigama kakotamisa nsholo uwe.

13Josefa kabhata bana babe nge maboko, Ifureimi nge luboko gugwe gwe luji kunlingisanya nge gwe lumeshwe gwa tate babe, Manase nge lumeshwe kunlingisanya nge luji gwa tate babe ndizo kabasedzedza pa bali. 14Koga Iziraela katambunudza luboko gugwe gwe luji kagubiga pezhugwi kwe nsholo wa Ifureimi iye wakabe ali ntjetjana, ngono lumeshwe kagubiga pezhugwi kwe nsholo wa Manase eleyanya maboko awe, Manase ndiye wakabe ali mbano. 15Kakombolela Josefa eti,

“Ndzimu wakabe uhwiligwa ndi botate bangu, Abhurahama na Isaki,

Ndzimu iwo wakabe nlisi wangu mu bupenyu gwangu gose kuswikila ngwenu.

16Ntumwa we kudzimu iye wakandigwila,

mu mbatsha dzose ngaakombolele balisana ibaba,

mubali zina langu ngalidwilidziwe,

ne zina la botate bangu Abhurahama na Isaki,

ngabawande babe banjinji mu shango.”

17Josefa kati ebona tate babe bebiga luboko gwe luji pezhugwi kwe nsholo wa Ifureimi kasishathe, ndizo kabhata luboko gwa tate babe kugudusa pa nsholo wa Ifureimi kugubiga pa nsholo wa Manase. 18Josefa kabe eti kuna tate babe, “Akuzojalo tate, mbano ndiwoyu, bigani luboko gwenyu munli.”

19Koga tate babe bakalamba bakati, “Ndoziba, mwanangu, na iyebo unowobe itjaba tjikulukulu, kabe nkulu. Ne kwakajalo nnung'una uwe unowobe nkulu kumpinda ne ludzi gugwe gowobe tjaba.”

20 # Bahebheru 11:21 Ndizo Jakubo kabakombolela mu zhuba ilelo eti, “Baiziraela banowokombolela ndimwi beti, ‘Ndzimu ngabakuthame munge Ifureimi na Manase.’ ” Nge zila iyeyo Jakubo katungamidza Ifureimi pana Manase.

21Ipapo Iziraela kabe eti kuna Josefa, “Imi ndofa zwangu, Ndzimu unowobe namwi ukamubgwiliza ku shango ya botate benyu. 22Iwe ndokupa gobe limwe landisingape bakulu babo ne banung'una babo, ndokupa ntuthu we Shekemu wandakatola mu Baamori nge thumo nenge dati ne nsebe.”

Currently Selected:

Kutangisa 48: KBTP

Highlight

Copy