Ezera 8
8
Bathu bakabuya kutapiwa
1Aba misholo ye misha ne bakazwikwalisa kuzha nami kudwa ku Bhabhiloni mu tjibaka tje mbuso wa Mambo Atazezasi:
2Zwizekugwana zwa Finihasi ndi Geshomu, zwizekugwana zwa Ithamari ndi Daniyele, zwizekugwana zwa Dafite ndi Hatushi, 3zwizekugwana zwa Shekaniya, zwizekugwana zwa Paroshi, kuna Zekariya kwakabe kwa zwikwalisa balume bali zana ling'ompela lina bali makumi mashanu (150); 4zwizekugwana zwa Pahatimoabu, Elihoenayi nkololo wa Zeraya iye wakabe ana balume bali mazana mabili (200); 5zwizekugwana zwa Shekaniya nkololo wa Jahaziele iye wakabe ana balume bali mazana matatu (300); 6zwizekugwana zwa Adini, Ebedi nkololo wa Jonatani iye wakabe ana balume bali makumi mashanu (50); 7zwizekugwana zwa Elamu, Jeshaya nkololo wa Ataliya iye wakabe ana balume bali makumi ali kutendeka (70); 8zwizekugwana zwa Shefatiya, Zebadiya nkololo wa Mikaele iye wakabe ana balume bali makumi ali zhanakadzi (80); 9zwizekugwana zwa Joabu, Obhadiya nkololo wa Jehiele iye wakabe ana balume bali mazana mabili ana bali gumi lina zhanakadzi (218); 10zwizekugwana zwa Bhani, Shelomiti nkololo wa Josifiya iye wakabe ana balume bali zana ling'ompela lina bali makumi ali tathatu (160); 11zwizekugwana zwa Bhebayi, Zekariya nkololo wa Bhebayi iye wakabe ana balume bali makumi mabili ana bali zhanakadzi (28); 12zwizekugwana zwa Azagadi, Johanani nkololo wa Hakatani iye wakabe ana balume bali zana ling'ompela lina bali gumi (110); 13zwizekugwana zwa Adonikamu, be bupelo yakabe ili Elifeleti, Jeyele na Shemaya ibo bakabe bana balume bali makumi ali tathatu (60); 14zwizekugwana zwa Bhigivayi, Uthayi na Zakhuri ibo bakabe bana balume bali makumi ali kutendeka (70).
Ezera unowana Balevi be Ng'umba ye Ndzimu
15Ndakabakubunganya pa gwizi gunowungila ku Ahava, ngono takagala ipapo tjibaka tje mazhuba matatu. Ndakati ndilinga mu bathu ne bapirisiti awana ili kuti akuna Balevi mubali. 16Ipapo ayisa thumi kuna Eliezeri, Ariele, Shemaya, Elinathani, Jaribu, Elinathani, Nathani, Zekariya na Meshulamu bakabe bali batungamili na Joyaribu na Elinathani balume bakabe bana zibo hwulu kuti badaniwe, 17ngono ndakabatuma kuna Ido ntungamili ku Kasifiya. Ndakababudza kuti baswike balebe beitini kuna Ido ne banung'una babe neku bashingi be Ng'umba ye Ndzimu ku Kasifiya, kuti ndizo batitumilile bathu bangazha beshinga mu Ng'umba ye Ndzimu. 18Se tjiazha tje Ndzimu wedu tjakabe tjinaswi, bakatitumila nlume unohwisisa, edwa mu zwizekugwana zwa Mahili nkololo wa Levi, nkololo wa Iziraela unodang'wa Sherebiya ana bakololo babe ne makamu awe bali gumi lina zhanakadzi, (18) 19na Hashabiya kose na Jeshaya kudwa mu zwizekugwana zwa Merari ne makamu awe ne bakololo babo ali makumi mabili. 20Kakale bakazha ne bashingi be Ng'umba ye Ndzimu bali mazana mabili ana makumi mabili (220) bakabe bashalugwa ndi Dafite ne makulukota awe kuti babhatshe Balevi. Bose bakadang'wa nge mazina.
Ezera unotungamila bathu mu kuzwinyima zojiwa
21Pa gwizi gwe Ahava ndakazibisa mmwe ne mmwe kuti tizwinyime zojiwa kuti ndizo tizwiyise pasi mbeli kwe Ndzimu wedu kuti utipe gwendo gubuyanana ne bana bedu kose ne thundu yedu. 22Ndakabe ndina shoni dze kukumbila mambo kuti batipe babhayani ne batathi be mbizi kuti batibakilile mu zwita zwatingashangana nazo mu zila, ngobe ndakabe ndabudza mambo kuti ngoni dze Ndzimu wedu dzina mmwe ne mmwe unolinga kuwuli, ngono simba ne bushongola gwawo zowila bose banousiya. 23Takazwinyima zojiwa ngono tikakumbila Ndzimu wedu ngekwa ikoku. Ngono wakadabila mitembezelo yedu.
Zwipo zwe Ng'umba ye Ndzimu
24Kudwapo ndakashalula bapirisiti banolaula bali gumi lina babili Sherebiya na Hashabiya ne banung'una babo bali gumi. 25Kudwapo ndakabayelela siliva ne golide ne zwija ne zwipo zwakabe zwadusiwa ndi mambo ne hadzasha dzidze ne makulukota awe, zwakashangana ne zwakabe zwadusiwa nge tjaba ye Iziraela kuti zwishingisiwe mu Ng'umba ye Ndzimu abapa izo. 26Ndakayela abapa mu maboko abo talenta dze siliva dzili mazana ali tathatu ana dzili makumi ali mashanu (650) ne zwija zwakathamiwa nge siliva zwili zana ling'ompela (100) ne talenta dze golide dzili zana ling'ompela (100) ne 27ndilo hwulo dzili makumi mabili (20) dzakathamwa nge golide dze themba ye tjiwulu tji ng'ompela (1 000) tje dzidarisi ne zwija zwe phangula zwili zwibili zwakanaka zwinga golide.
28Ndakati ku bali, “Imwi koga se zwija izwezwi makayengemala, makapiwa Yahwe. Siliva ne golide zwipo zwe moyo ntjena zwakapiwa Yahwe Ndzimu wa bobatategulu benyu. 29Muzwitjengete kwazokwazo kuswikila mu zwiyela mbeli kwe bapirisiti banolaula ne Balevi ne misholo ye misha ye Iziraela mu Jerusalema mu Ng'umba ya Yahwe.” 30Ndizo bapirisiti ne Balevi bakaamutjila siliva ne golide ne zwija zwakabe zwayegwa bezwiyisa ku Ng'umba ye Ndzimu wedu ku Jerusalema.
Kubgwilila ku Jerusalema
31Mu zhuba le bugumi lina kubili le mwedzi we kutanga takamilika pa gwizi gwe Ahava tilinga ku Jerusalema. Tjiyazha tje Ndzimu tjakabe tjinaswi, Ndzimu wakabe wakati bakilila mu zwita ne mu balalili mu zila. 32Ngono takaswika mu Jerusalema, tikanyaluluka mazhuba ali matatu. 33Mu zhuba le bunna mu Ng'umba ye Ndzimu, takayela siliva ne golide ne zwija zwimwe tikazwilonga mu maboko a Meremoti nkololo wa Uriya we mpirisiti, Eleazari nkololo wa Finihasi bana Balevi Jozabadi nkololo wa Jeshuwa na Nowadiya nkololo wa Bhinuyi. 34Tjimwe ne tjimwe tjakabagwa tjikayegwa, ngono kukakwagwa tjimwe ne tjimwe tjabagwa ne tjayegwa mu tjibaka itjetjo.
35Ngono batapiwa bakabuya kudwa mu busungwa bakapisila Ndzimu we Iziraela zwibhayilo: mikono ili gumi lina mibili ili milile njudzi dzili gumi lina kubili dze Iziraela, nyundo dzili makumi ali zhanalume ana dzili tathatu (96) ne pkhwizana dzili makumi ali kutendeka ana dzili kutendeka (77) ne mbudzi dzili gumi lina mbili dze tjibhayilo tje jinyo. Ngono ikoko kose kwakapisigwa Yahwe. 36Kakale bakatola ndaulo ya mambo bakaipa makulukota ne balauli be golombedzo le Yufuratesi. Kudwapo bakabhatsha bathu ne Ng'umba ye Ndzimu.
Kalanga Bible © Bible Society of Botswana, 2008, 2018.