Ezekiele 7
7
Bupelo gwaswika
1Dama la Yahwe lakazha kundili liti, 2“Ngono iwe, Nkololo we nthu, tjinoleba She Yahwe ku shango ye Iziraela etji, Kwapela! Bupelo gwazha mu midzibo minna ye shango. 3Bupelo gwazha mu muli sangwenu, ngono ndowobhayana namwi nge bushongola. Ndowomusumikilisa kuyendidzana nge mipanga yenyu, ndibe ndimulobela mija yenyu inoshimika. 4Andingamulinge nge ngoni kene kuli kumutjidza, koga ndowomulobela mija yenyu inoshimika ipakati kwenyu. Ipapo mowoziba kuti ndimi Yahwe.
5“She Yahwe tjabanoleba etji, mbatsha dzowomuzhila dzakatobedzana. Bonani, dzozha. 6Bupelo gwaswika! Gwaswika bupelo! Gwamuswikila bupelo. Bonani gwaswika! 7Bhelelo laswika ku muli, imwi bagali be shango. Tjibaka tjabepo, zhuba lipejo le kuhwumana lisi le kushatha pezhugwi kwe matombo. 8Ngwenu wali ndabe pejo ngekutebulila bushongola gwangu mu muli, ndowobhayana namwi nge kugwadzamoyo kwangu. Ndowomusumikilisa kuyendidzana nge mija yenyu, ndibe ndimulobela mija yenyu inoshimika. 9Anditowomulinga nge ngoni kene kuli ku mutjidza. Ndowomuloba kuyendidzana nge mija yenyu, zwinoshimika zwitjipakati kwenyu. Ipapo mowoziba kuti ndimi Yahwe ndinomuloba. 10Bonani zhuba labe ipapa! Bonani laswika. Bhelelo lakotoka. Ludozo gwathinila, kuzwikudza kwabe ne maluba. 11Kumukilana kwakula kwabe lukombo gwe mbipo, akuna wabo unowosala, kene ili fumwa yabo kene mamo abo kene gudzo labo. 12Tjibaka tjabe pejo, zhuba lipejo. Ntengi asishathe ne ntengesi asishobe ngoti bushongola gowila bunji gose ngofanana. 13Ngoti batengesi abangabgwilile kuna tjabakatengesa nenguba bangabe batjatjila. Ngoti mbono#7:13 mbono: Dzimwe hwalo dzina “bushongola.” inolonga mbunga wose. Akuna ungabhatilila mu butjilo gugwe nge matjinyo abo.
14“Bakalidza lunyanga bakalulwamisa tjimwe ne tjimwe, koga akuna wakayenda ku ngwa ngoti bushongola gwangu guli mu mbunga wabo wose 15Kuzhe kuna thumo, mukati kuna bugwele ne bhamba bakuzhe banowobulawa nge thumo bamu nzi banowobulawa nge bugwele nenge bhamba. 16Bose banowobe basiya batjila banowowanika mu matombo se njiba dze mikuku belidziwa nge matjinyo abo. 17Maboko abo anowolungunuka, zwidwi zwabo zowolosonoka. 18Banowombala zwiambalo zwe jila le saka bakawigwa nge kutja kukulu. Banowobhakhwa nge shoni, misholo yabo banowoitesela. 19Banowolashila siliva yabo mu dzizila, golide yabo inowotogwa yakatemapala.
“Mu zhuba le bushongola gwa Yahwe siliva ne golide yabo aingabatjidze. Abangazwiduse zhala ndiyo kene kuli kuija bezhadza mitumbu yabo ngoti ndiyo yakabe tjikuthi tjinobaligila mu matjinyo abo. 20Maseka abo akanaka abakabe be zwikudza ndiwo bakapelela bethama midzimu yabo inoshimisa ndiwo, zwifaniso zwakabipa. Ndizo wali ndowothama kuti ikoku kube tjakatemapala ku bali. 21Ndowoyilonga mu maboko e bataya se thundu yatapiwa, ndowoipa babi be shango se yatapiwa ngono banoyitemapadza. 22Ndowolinga ntome kuita kuti batemapadze bugalo gwangu gunodika, batoleli banongina muguli, banowogutemapadza. 23Thamani ketani! Ngoti shango izhele milandu ye kutebula malopa, nzi nkulu uzhele kumukilana. 24Ndowozhisa itjaba tjibiibi kupindisa kuti tjitole ng'umba dzabo. Ndowopedza kuzwikudza kwe bakasima, ng'umba dzabo dzowotemapadziwa. 25Kudziyila kukulu kowoti kwaswika, banowoshaka mbakiso, koga abatowoyiwana. 26Mbatsha dzozha dzakalongoloka, makwayi ezha akatobelelana. Banowoshaka kuwana mbono kudwa ku nlebesambeli, kudiya kowopela kudwa ku mpirisiti, ne ikumbuludzo kudwa mu bakulu. 27Mambo unowolila, mbusi unowokuligwa nge kunyalamoyo ne maboko e bathu be shango iyeyi anowobe ne thete. Ndowonginikana nabo kuyendidzana nge mija yabo, ndowobasumikilisa kuyendidzana nge kusumikilisa kwabo. Ngono banowoziba kuti ndimi Yahwe.”
Kalanga Bible © Bible Society of Botswana, 2008, 2018.