Ezekiele 37
37
Nkuku we mafupa akawoma
1Tjiazha tja Yahwe tjakandibhata ngono tjikandidusila pazhe nge meya ya Yahwe ngono tjikandimisa pakati kwe nkuku wakabe uli zhele mafupa. 2Bakanditungamila kuyenda yenda pakati kwawo, bonani ndakabona mafupa manjinji mu nkuku ngono akawoma kwazo. 3Ngono bakandibhuzwa bakati, “Nkololo we nthu, apa mafupa iyawa angatjila kene?” Adabila nditi, “Imwi She Yahwe, ndimwi munoziba.” 4Ipapo bakabe beti kundili, “Lebelambeli ku mafupa iyawa uti, ‘Imwi mafupa akawoma ihwani dama la Yahwe. 5She Yahwe bakati ku mafupa iyawa, “Ndowofemela mu muli ngono mowotjila. 6Ndowolonga makanyu mu muli ngono athama kuti nyama ibe mu muli amuambadza ganda, ndowofemela mu muli ngono mowotjila, ngono mowoziba kuti ndimi Yahwe.” ’ ”
7Ndizo alebelambeli sekwa ndakadwiwa. Ngono ndakati nditjalebelambeli bonani kukabe ne zhoba tjinyolotjo, nsindo we kulobana kwe mafupa ebhatana, fupa libhatana ne fupa. 8Ndakalinga ngono abona makanyu ebepo ne nyama muali ne ganda liapetela, koga kwakabe kusina meya muali.
9Ngono bakabe bendidwa beti, “Lebelambeli meya ye kufema, lebelambeli nkololo we nthu, idwa meya uti, ‘She Yahwe bakati, “Buya kudwa mu mbizho nna, meya, ufemele muna ibaba bakabulawa kuti batjile.” ’ ” 10#Zumbunulo 11:11Ndizo alebelambeli sekwa bakandidwa ngono meya ye kufema ikangina mu bali ngono bakatjila bakamilika bakama ne makumbo abo bali mbunga usinshoma.
11Ipapo Yahwe bakati kundili, “Nkololo we nthu, mafupa iyawa bathu bose be Iziraela. Bona banoti, ‘Mafupa edu awoma ne kugalabgwe kwedu akutjipo, tafa tapela.’ 12Ndizo wali lebelambeli uti ku bali, ‘She Yahwe bakati, “Ndowozhula zwikumbu zwenyu, ngono amudusa mu zwikumbu zwenyu, imwi bathu bangu ngono ndowomubuza ku shango ye Iziraela. 13Ngono mowoziba kuti ndimi Yahwe pandinowozhula zwikumbu zwenyu ngono ndimudusa mu zwikumbu zwenyu, imwi bathu bangu. 14Ndowolonga meya yangu mu muli ngono mowotjila, ngono ndowomugadza mu shango yenyu. Ipapo mowoziba kuti imi Yahwe ndimi ndaleba ngono ndakushinga, kojalo Yahwe.” ’ ”
Ludzi gung'ompela pasi kwa mambo nng'ompela
15Dama la Yahwe likazha kundili liti, 16“Nkololo we nthu, Tola lukuni ukwale muguli uti, ‘Gumilile Juda ngono Baiziraela bazwizwadzanye naye.’ Ube utola gumwe lukuni ukwale muguli uti, ‘Lukuni gwa Ifureimi, igogu ngegwa Josefa ngono bathu bose be Iziraela bazwizwadzanye naye.’ 17Hwuni idzedzi udzibhatshanye dzibe lukuni gung'ompela mu luboko gugo. 18Ha bathu babo bekubhuzwa beti, ‘Apa aungatibudze kuti unodwani naikoku kene?’ 19Ubadwe uti, ‘Tjinoleba She Yahwe etji, Ndabe pejo ngotola lukuni gwa Josefa, igogu gu mu luboko gwa Ifureimi ne njudzi dze Iziraela dzakazwizwadzanya naye, ngono ndibe nditola lukuni gwa Juda ndidzibhatshanya ndithama lukuni gung'ompela ngono dzibe lukuni gung'ompela mu luboko gwangu.’ 20Ubhate hwuni dzawakwala mbeli kwabo 21ube uti ku bali, ‘She Yahwe bakati, Ndowotola Baiziraela mu njudzi dzabakayenda kudzili. Ndowobakubunganya kudwa kose kupoteleka ababuza mu shango yabo. 22Ndowobathama ludzi gung'ompela mu shango, pezhugwi kwe matombo e Iziraela ngono nng'ompela koga unowobe mambo wabo. Abatowofa babe njudzi mbili kakale kene kuli kuthubukanya bumambo gwabo kabili. 23Abatowopapha kakale bakazwitemapadza nge midzimu yabo ye zwifano ne zwithu zwabo zwinoshimisa kene nge milandu yabo ngoti ndowobatjidza ndibadusa mu kuwa kwabo, ndowobatjenapadza. Ipapo banowobe bathu bangu, imi abe Ndzimu wabo.
24 #
Ezekiele 34:24
“ ‘Nlanda wangu Dafite unowobe mambo wabo, bose banowobe ne nlisi nng'ompela. Banowolondolodza milayo yangu bakaitobela nge njele. 25Banowogala mu shango yandakapa nlanda wangu Jakubo, shango yakagagwa ndi bobatategulu benyu. Ibo ne bana babo ne bana be bana babo banowogala muili nge kusingapele, Dafite nlanda wangu unowobe ntungamili wabo nge kusingapele. 26Ndowothama tjidumano tje mbakiso nabo. Tjowobe tjili tjidumano tjisingapele. Ndowobagadzikanya abawatsha, ngono agadza bugalo gwangu gwakayengemala pakati kwabo nge kusingapele. 27#2 Bakorinta 6:16; Zumbunulo 21:3Bugalo gwangu gowobe nabo, ndowobe Ndzimu wabo ibo bakabe bathu bangu. 28Ipapo njudzi dzowoziba kuti imi Yahwe ndothama kuti Iziraela iyengemale bugalo gwangu ha guli pakati kwabo nge kusingapele.’ ”
Kalanga Bible © Bible Society of Botswana, 2008, 2018.