Ezekiele 19
19
Lilila batungamili be Iziraela
1“Iwe lila ulilila babusi be Iziraela 2uti,
“ ‘Mme benyu bakabe bali shumbakadzi yakwako
pakati kwe shumba njinji.
Bakabe belala pakati kwe shumbana
belela bana babo.
3Bakalela imwe ye shumbana dzabo
ikabe shumba yakasima.
Ikazwidiya kumwaulanya tjainobhata
ngono ikaja bathu.
4Njudzi dzikahwa nge kwayo
ngono ikabhatshigwa nge bhuzhu ladzo.
Bakaikwebela ku Egipiti
nge zwihweko.
5“ ‘Ngono mayi bakati bebona kugalabgwe kwabo kusazhadzisika
ne yemula dzabo dzatjinyika,
bakatola imwe ye shumbana dzabo
bakaithama shumba yakasima.
6Ikayendayenda pakati kwe dzimwe shumba
ngoti yakabe yabe shumba yakasima.
Ikazwidiya kumwaulanya tjainobhata
ngono ikaja bathu.
7Ikaliga mbako dzabo dzakasima
ikakolomodza mizi yabo.
Shango naibo bose bamu ili bakalobgwa nge ana
ha behwa kubomba kwayo.
8Ipapo njudzi dzikashangana kugwa nayo,
bose kudwa ku mituthu yakapoteleka.
Bakaiwalila gwanga gwabo
ngono ikabhakhwa mu bhuzhu labo.
9Bakaikweba nge zwihweko bakailonga mu zongondo,
ngono bakaizhisa kuna mambo we Bhabhiloni,
bakailonga mu ng'umba ye busungwa,
ndizo tjibombo tjayo tjikasitjahwike kakale
pezhugwi kwe matombo e Iziraela.
10“ ‘Mme benyu bakabe benga nzhambi mu nnda wenyu we zhambi
wakadzwagwa pawunde ne vula
wakabe uzwala mitjelo una thabi njinji
ngoti una vula njinji.
11Thabi dzawo dzakabe dzakasima
dzakalizanila kuthama ludozo gwe bumambo.
Wakabe wakakulila pezhugwi
una thabi dzakalobana,
uboneka nge bulefu gwawo
nenge thabi dzawo njinji.
12Koga wakasimugwa nge bushongola bukulu
ukalashigwa pasi,
phepo ye kubhezhuba ikauwomesa.
Mitjelo yawo ikapulugwa,
thabi dzawo dzakasima dzikawoma
ngono moto ukadzipisa.
13Ngwenu watjidzwagwa mu tjilambanyika,
mushango yakawoma isina vula.
14Moto ukanyengela udwa mu gumwe gwe thabi dzawo hwulu,
ngono ukapisa mitjelo yawo,
akuna lutabi gwakasima gwasala muuli
gwakalizanila kuthama ludozo gwe bumambo.’
“Ikoku lumbo gwe tjililo, ngakutogwe ili tjililo.”
Kalanga Bible © Bible Society of Botswana, 2008, 2018.