Ezekiele 16
16
Jerusalema usingagalikemoyo
1Dama la Yahwe likazha kundili liti, 2“Nkololo we Nthu, lingisa Jerusalema mishingo yawo inoshimisa 3ube uti, ‘Tjinolebgwa ndi She Yahwe ku Jerusalema etji, Wakatangisa ku shango ye Bakanana kwawakazwaligwa, tate babo bakabe bali N'amori, ngono mme yabo bali Nhiti. 4Zhuba lawakazwagwa ikombo tjitjo atjizothubugwa, awuzongudziwa nge vula kuti ube mbuyanana, auzotshikitidziwa mwenyu kene ukapetegwa nge matyila. 5Akuna wakakuhwila zogwadza, kene kukuhwila ngoni kakuthamila tjimwe tje zwithu izwezwi, koga wakalashigwa kutjena ngoti wakashimiwa mu zhuba lawakazwagwa ndilo.
6“ ‘Ndakapinda pawakabe walashigwa akubona uthulana mu malopa awo, ngono ukati ulilele ipapo abe nditi ku kuli, “Tjila!” 7Ndakakuthama kuti ukule se nti umu nnda. Wakakula ukabundila ukabe mbuya kupinda. Mazhamu awo kabhuda ne mavudzi awo kakula, iwe wakabe uli mbujo. 8Ndakapinda pakuli kakale akulinga, ngono bona wakula walizana ludo. Ndakamilidza bhapilo le hazu yangu akufukidza kusafuka kuko. Ndakatuna ku kuli ngono angina mu tjidumano nawe ngono ukabe wangu. Koleba She Yahwe.
9“ ‘Ipapo akungudza nge vula adusa malopa mukuli ngono akuzhodza mafuta. 10Ndakakuambadza zwiambalo zwakanakisiwa ne shangu dze ganda buya. Ndakakuambadza zwiambalo zwe jila lakanaka ne zwifuko zwe themba ipezhugwi. 11Ndakakunakisa nge zwakanaka: Ndakakuambadza maseka mu maboko awo ne ndalama mu ntshibha uwo, 12ne ng'ina mu tjimilo tjitjo ne mang'ina mu zebe dzidzo ndibe ndikuambadza tjiala tjakanaka mu nsholo uwo. 13Wakabe wakanakisiwa nge golide ne siliva, zwiambalo zwizo zwakabe zwili zwe jila buya zwe themba ipezhugwi, jila lakanakisiwa nge thali. Zojiwa zwizo zwakabe zwili bgwisa gwakanathiwa ne butji ne mafuta. Wakati ukanaka kwazo ngono ukalizana kube nfumakadzi. 14Kuzibika kuko kukayenda nge njudzi ngekwe bubuya gugo ngoti gwakabe gwakapelela nge kukunakisa kwandakakuthama. Koleba She Yahwe. 15Koga iwe ukabiga mu bubuya gugo ngono ngozibika kuko ungafukula. Wakada mmwe ne mmwe wakapinda pakuli bubuya gugo gukabe gugwe. 16Wakatola zwimwe zwe zwiambalo zwizo ukazwibakila unakisa paunonamatila uthama bufebe gugo. Akuna tjakajali tjakatongoshingikala kene tjitjawoshingikala kakale. 17Iwe kakale wakatola zwakanaka zwakathamiwa nge golide yangu ne siliva yandakakupa ube uzwithamila midzimu ye zwifano ye tjilume ube ufukula nayo. 18Ngono wa katola zwiambalo zwizo zwakathumiwa nge thali ukazwifukidza ukazwipa mafuta angu ne motsha. 19Zojiwa zwandakakupa naizobo, bgwisa gwakanathiwa ne mafuta ne butji zwandakakupa kuti uje, wakazwipa se nnuhwo unozipa ku zwili. Ikoku ndiko kwakashingikala. Koleba She Yahwe.
20“ ‘Ipapo wakatola bakololo ne bakololokadzi babo bawakandizwalila ube ubathama zwibhayilo zwe zojiwa ku midzimu ye zwifano. Kukanga kunodwa kuti bufukula gugo aguzogutshika. 21Wakabulaya bana bangu ukabathama zwibhayilo zwe midzimu. 22Ngono mu mishingo iyo yose inoshimika ne bufebe gugo auzokumbula mazhuba e butjetjana gugo, pawakabe uli mbujo usakambala, uthulana mu malopa awo.
23“ ‘Yee mme wee! Wapalala ngekwe bubi gugo. Koleba She Yahwe, 24wakazwibakila dala ukazwithamila bugalo gupezhugwi mu tjibata tjimwe ne tjimwe. 25Ku mapelelo e zila imwe ne imwe ukabaka matembezelelo awo akakula ukafukula nge bubuya gugo, uzwipa mu mmwe ne mmwe unopinda paulipo uwatsha bufebe gugo. 26Wakangina mu bufebe ne Baegipiti, babakidzani nawe be yemula mbi, undithumula kuti ndigwadze moyo nge kuwandisa bufebe gugo. 27Ndizo ndakamilidza luboko gwangu kukuloba, ndakatapudza ntuthu uwo abe ndikulonga mu maboko e zwita zwizo, bakololokadzi be Bafilisitiya ibo bakabhatisiwa shoni nge bufebe gugo. 28Wakafukula ne Baasiriya, ngono wakabe usingagutshike, wakafukula nabo ngono ukasigutshikezo. 29Ipapo ukawatsha bufukula gugo nge Bakhaladiya, shango ye baseenyi ngono ukasigutshikezo ndiyibaba.
30“ ‘Moyo uwo nlelulelu kungapani, koleba She Yahwe, kwaunodza ukashinga zwithu zose izwezwi, mishingo ye fukula isingatjatilimuke. 31Unobaka dala mu mapelelo e zila imwe ne imwe, uthama paunonamatila pakamilikila pezhugwi mu tjibata tjimwe ne tjimwe! Koga usingange fukula nge kulamba mari anokulipa. 32Phombgwekadzi ndiwe unoda bataya kupinda nlume uwo! 33Fukula imwe ne imwe inoamutjila tja inolipiwa nditjo, koga iwe wakapa zwamba zwizo zose zwipo, ubatenga kuzha ku kuli kudwa kumwe ne kumwe kwaunofukulila. 34Ndizo wali mu bufukula gugo autonga bamwe, akuna unokusala shule ekushaka. Autonga bamwe, iwe unolipa koga iwe usingalipiwe. 35Ndizo wali iwe fukula, ihwa dama la Yahwe. 36Tjinolebgwa ndi She Yahwe etji, Nge kuti yemula dzidzo wakadziletjedzela, wakaambuka ukasala uli mbujo mu bufebe gugo ne zwamba zwizo, kakale nenge kwe midzimu iyo yose ye zwifano inoshimika, nenge kuti wakaipa malopa e bana babo, 37ndizo wali ndowokubunganya zwamba zwizo zose bawakatongo shatha nabo, ibabo bakabe bekuda ne bakabe bekubenga. Ndowobakubunganya bedwa mu mbizho dzose kugwa nawe ngono ndowokuambula mbeli kwabo ngono banowobona bumbujo gugo gose. 38Ndowokusumikilisila shamu ye bakadzi banothama bupombgwe kakale betebula malopa, ndowokubgwilizila nge bushongola gwangu ndakagwadza moyo nlandu we kutebula malopa. 39Ndowokulonga mu maboko abo, ngono banowoliga dala lilo ngono bakakolomodza matembezelelo awo akamilidzika. Banowokumbula zwiambalo zwizo ngono bakatola zwakanaka zwizo ngono bakakusiya uli mbujo. 40Banowokudanila mbunga unowokukatsha nge mabgwe ukakutemelela nge bukano. 41Banowopisa ng'umba dzidzo bakakuloba shamu mbeli kwe bakadzi banjinji. Ndowomisa bufukula gugo, ne zwamba zwizo autjowozwilipa. 42Ndizo bushongola gwangu gowotapudzika ne kugwadzamoyo kwangu nge fupa nge kuko kowopela, ndowogadzikana ndisingatjagwadze moyo.
43“ ‘Nge kuti auzokumbula mazhuba e butjetjana gugo koga ukandigwadzisa moyo nge zwithu zose izwezwi, ndizo wali ndakabgwilizila mishingo iyo. Koleba She Yahwe. Apa auzopaphidza mishingo iyo yose yakabipa nge bufebe gugo kene?
44“ ‘Mmwe ne mmwe unoshingisa makungulupeswa, unoleba gungulupeswa eli ngekuko, “Nkololokadzi unotodza mmeyabe.” 45Iwe u nkololokadzi wa mmeyabo nge malebeswa, ibo bakashima nlume wabo ne bana babo kakale u nnung'una we malebeswa ku bakulu babo be tjikadzi, ibo bakashima balume babo ne bana babo. Mmeyabo bakabe bali Nhiti, tate babo bali N'amori. 46Nkulu uwo hwola we tjikadzi ndi Samariya wakabe egala ku bunandzwa gugo ne bakololokadzi babe, nnung'una uwo we tjikadzi wakabe egala ku burwa gugo ndi Sodoma ana bakololokadzi babe. 47Iwe auzoyenda mu zila dzabo uka idzelela mipanga yabo inoshimika koga, mu tjibaka tjitukununu wanyanya mu zila dzidzo. 48Nge malebeswa se ndi tjila, koleba She Yahwe, nnung'una uwo we tjikadzi Sodoma ne bakololokadzi babe abazotongo thama iwe tjawakathama ne bakololokadzi babo.
49“ ‘Nlandu we nnung'una uwo we tjikadzi Sodoma ndiwoyu: Iye ne bakololokadzi babe bakabe bezwida, beguta, basina anya, abazoda kubhatsha bashayi ne banosheta. 50Bakabe bezwikudza bethama zwithu zwinoshimika mbeli kwangu. Ndizo wali ndakabalobesa sekwa unoziba. 51Samariya aazothama gaswa le zwibi zwawakathama. Iwe wakathama zwinoshimika kubapinda, ngono nge mishingo iyo yawakashinga ukathama nkulu uwo we tjikadzi ne nnung'una uwo bakanga bakalulwama. 52Senga mabhatisashoni awo, ngoti wathama kuti nkulu uwo ne nnung'una uwo bawang'we bakalulwama. Zwibi zwizo sezwakabipa kupinda zwabo, banolingika bakalulwama kukupinda. Ndizo wali bhakhwa nge shoni usenge mabhatisashoni awo, nge kuti wathama nkulu uwo ne nnung'una uwo bakalingika bakalulwama.
53“ ‘Ndowobabgwiliza mu tjimo tjabo, tjimo tje Sodoma ne bakololokadzi babe ne tjimo tje Samariya ne bakololokadzi babe ne tjimo tjitjo kang'ompela ne zwabo, 54kuita kuti usenge mabhatisashoni awo ndizo ubhakhwe nge shoni ngekwe mishingo yose yawakashinga kubapa kushatha. 55Ngekwe nkulu uwo ne nnung'una uwo, Sodoma ne bakololokadzi babe banowobgwilila mu tjimo tjabo tje kutanga, Samariya ne bakololokadzi babe banowobgwilila mu tjimo tjabo tje kutanga, iwe ne bakololokadzi babo mowobgwilila mu tjimo tjenyu tje kutanga. 56Wakabe usingake ukadana zina le nnung'una uwo Sodoma tjibaka tjawakabe utjazwida, 57tjibaka tjakabe mbipo iyo isathu ikazwimbunugwa. Ngwenu utjiseko ku bakololokadzi ba Aramu ne ku babakidzani naye, ne ku bakololokadzi be Bafilisitiya, bose koga kukupoteleka banokushima. 58Wakafanila uamutjile shamu ye bufukula gugo ne mishingo iyo yakabipa. Koleba She Yahwe.
Tjidumano tjisingapele
59“ ‘She Yahwe bakati, Ndowokubhata nge zila yakalingisana ne tjawakashinga, wakazwikangang'wisa kutuna kwangu nge kutjuluka tjidumano tjangu. 60Koga ndowokumbula tjidumano tjangu tjandakathama nawe mu mazhuba e butjetjana gugo, ngono ndowothama tjidumano nawe tjisingapele. 61Ipapo unowokumbula zila dzidzo ngono ukabhakhwa nge shoni uamutjila nkulu uwo ne nnung'una uwo be tjikadzi. Ndowokupa ibo kube bakololokadzi babo, koga kuzhe kwe tjidumano tjangu nawe. 62Ndowothama tjidumano tjangu nawe, ngono unowoziba kuti ndimi Yahwe. 63Ndowoti ndithama mbakisano nawe ngekwe zwawakathama, unowokumbula ngono ukabhakhwa nge shoni ngono ukasitongo zhula nlomo kakale ngekwe kuzwiyisa pasi kuko. Koleba She Yahwe.’ ”
Kalanga Bible © Bible Society of Botswana, 2008, 2018.