Kufuluka 8
8
Mazhula
1Ipapo Yahwe bakati kuna Mushe, “Yenda kuna Faro undwe uti, ‘Yahwe bakati, “Letja bathu bangu bayende kuti banondinamata. 2Koga ha ulamba kubaletja kuti bayende, bona, ndowoloba shango iyo yose nge mazhula. 3Gwizi gwe Naili gowozhala mazhula anowoti kazhala ne mu ng'umba iyo ye bumambo, anowongina mu ng'umba ye bulalo gugo katatha pa bulawo gugo. Anowongina mu ng'umba dze makombgwa awo ne muna dze bathu babo, anowongina mu mabhikilo enyu ne mu ndilo dzinovangigwa zwiwunga. 4Mazhula iyawo anowokutatha kabuya katatha bathu babo ne makombgwa awo.” ’ ”
5Yahwe bakadwa Mushe bakati, “Idwa Aroni uti, ‘Tambunudza luboko gugo umilidzile ludozo gugo pezhugwi kwe njizi ne ngolo dze vula na pezhugwi kwe madziba e vula uthame kuti mazhula azhe mu shango ye Egipiti.’ ” 6Ndizo Aroni katambunudzila luboko gugwe pezhugwi kwe vula dze Egipiti ngono mazhula akazha kazhala shango ye Egipiti. 7Koga ng'anga dzikathamabo saikoko nge masalamusi adzo dzikazhisa mazhula mu shango ye Egipiti.
8Ipapo Faro kadana Mushe na Aroni ebe ebadwa eti, “Kumbilani Yahwe batidusile mazhula iyawa, imi ne bathu bangu, ngono ndowoletja bathu ibaba bakayenda kunodusila Yahwe zwibhayilo.”
9Mushe kabe eti kuna Faro, “Imwi mundibudze kuti ndimutembezelele lini imwi ne makombgwa enyu ne bathu benyu kuti mazhula abulawe mu ng'umba dzenyu asale mu gwizi gwe Naili koga.”
10Iye kabe eti, “Mangwana.” Mushe kabe eti, “Ngakube sekwa munoleba kuti ndizo muzibe kuti akuna unonga Yahwe Ndzimu wedu. 11Mazhula anowodwa mukuli ne mu ng'umba dzenyu ne makombgwa enyu ne bathu benyu, anowosala mu Naili koga.” 12Kukati Mushe na Aroni basinodwa pana Faro Mushe kakumbila Yahwe ngekwe mazhula se kwaakabe adumana na Faro. 13Yahwe bakathama tjakabe tjakumbigwa ndi Mushe, mazhula kafa mu dzing'umba ne mu mapakasa ne mu shangobo. 14Baegipiti bakaakubunganya mimbumba ne mimbumba, shango inuhwa itiphuu. 15Koga Faro kati ebona kuti kwatiphee kakukutadza moyo uwe ngono kasibateedze sekwa kaleba Yahwe.
Nyunyu
16Ipapo Yahwe bakati kuna Mushe, “Idwa Aroni atole ludozo gugwe alobe pasi kuti hwuluba ibe nyunyu mu shango yose ye Egipiti.” 17Bakathama saikoko; Aroni kamilidza ludozo gugwe kaloba pasi ngono kukabe ne nyunyu mu bathu ne mu phuka. Hwuluba yose ye shango ye Egipiti ikabe nyunyu. 18Ng'anga dzikagwisa nge masalamusi adzo kuzhisa nyunyu koga dzikakongwa. Nyunyu dzikabe mu bathu ne mu phuka. 19#Luke 11:20Ng'anga dzikadwa Faro dzikati, “Ikoku mishingo ye Ndzimu.” Koga Faro kakukutadza moyo uwe kasitongo bateedza se kwakaleba Yahwe.
Thuzi
20Ipapo Yahwe bakadwa Mushe bakati, “Umuke mangwanana unoshanganidza Faro, unowobe eyenda ku gwizi ngono undwe uti, ‘Yahwe bakati, “Letja bathu bangu bayende kuti banondinamata. 21Ha ungasaletja bathu bangu bakayenda, bona, ndowotumila milunda ye thuzi ku kuli neku makombgwa awo ne ku bathu babo. Ng'umba dzidzo ne dze Baegipiti dzowozhala milunda ye thuzi ne pamwe ne pamwe padziyapo. 22Koga mu zhuba ilelo ndowothama n'gathu unosiyila kuzhe shango ye Gosheni kugele bathu bangu, akutowoboneka milunda ye thuzi kuyita kuti uzibe kuti ndimi Yahwe mu shango. 23Ndowobiga n'gathu pakati kwe bathu bangu ne bathu babo saikoko. Mangwana tjilakidzo itjetji tjowoboneka.” ’ ” 24Yahwe bakathama saikoko; kukazha milunda mikulu ye thuzi mu ng'umba ya Faro ne mu ng'umba dze makombgwa awe ne mu shango ye Egipiti ngono shango ikatjinyika ngekwe thuzi.
25Faro kadana Mushe na Aroni kabadwa kati, “Yendani munodusila Ndzimu wenyu tjibhayilo koga muli mu shango iyeyino.” 26Koga Mushe kabe eti, “Kowobe kusakalulwama kuthama saikoko; ngoti ha tiijalo towobe tibhayila Yahwe Ndzimu wedu zwibhayilo zwinoshimisa Baegipiti. Apa ha tibhayila Yahwe zwibhayilo zwinoshimisa Baegipiti pa mesho abo, apa Baegipiti abanga tikikithidze nge mabgwe kene? 27Iswi takafanila yenda gwendo gwe mazhuba matatu mu tjilambanyika tibe tibhayila Yahwe Ndzimu wedu sekwabanowotidwa.”
28Faro kabe eti, “Ndowomuletja mukayenda kunobhayila Yahwe Ndzimu wenyu mu tjilambanyika, koga musiyendile kulekule. Mundikumbililebo.”
29Ipapo Mushe kabe eti, “Ndobhuda ndoyenda ndodwa pamuli ngono ndowotembezela Yahwe kuti milunda ye thuzi idwe pa muli ne pa makombgwa enyu ne mu bathu, koga mangwana musitongo pitukana kakale mube musingaletje bathu kuti bayende kunobhayila Yahwe.”
30Mushe kadwa pana Faro ngono katembezela Yahwe. 31Yahwe bakathama tjakumbigwa ndi Mushe bakadusa milunda ye thuzi pana Faro ne pa makombgwa awe ne mu bathu kukasheta ne ing'ompela yasala. 32Koga Faro kakukutadza moyo uwe kakale kasiletje bathu kuti bayende.
Currently Selected:
Kufuluka 8: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
