Kufuluka 32

Ndzimwana we nkong'wana

(Matama 9:6-29)

1 # Mishingo 7:40 Kwakati bathu bebona kuti Mushe wanonoka kudeluka mu dombo, bakakubungana pana Aroni bakati kunli, “Milika utithamile midzimu inowotitungamila, ngoti Mushe iye wakati dusa mu shango ye Egipiti atitjaziba kuti kwashingikalani kunli.”

2Aroni kabe ebadwa eti, “Dusani mang'ina e golide amu zebe dze bakadzi benyu ne dze bakololo benyu ne bakololokadzi benyu muazhise kundili.” 3Ndizo bathu bose bakatola mang'ina e golide wose akabe ali mu zebe dzabo bakayisa kuna Aroni. 4#1 Bomambo 12:28; Mishingo 7:41Ngono iye kaamutjila golide mu maboko abo kaibumba kathama nkong'wana, ndizo Baiziraela bakabe beti, “Eyi ndiyo midzimu iyo iwe Iziraela yakakudusa mu shango ye Egipiti.”

5Kukati Aroni ebona ikoku, kabaka tjibeso tjinopisigwa zwibhayilo pa ifano itjetjo tje nkong'wana ebe epa zibiso eti, “Mangwana kowobe ne nzano wa Yahwe.” 6#1 Bakorinta 10:7Tjimuka bathu bakabinduka bakadusa zwibhayilo zwinopisiwa ne zwe mbakisano, ngono bakagala pasi bakaja bakang'wa bakamilika bakazana.

7Yahwe bakadwa Mushe bakati, “Deluka ngoti bathu babo bawakadusa mu shango ye Egipiti bathama zwakabipa, 8batjimbidza kupambuka mu zila yandakabapa, bazwithamigwa ifano tje nkong'wana ngono batjithigamila bakatjidusila zwibhayilo, bebe beti, ‘Eyi ndiyo midzimu iyo iwe Iziraela yakakudusa mu shango ye Egipiti.’ ” 9Yahwe bakadwa Mushe bakati, “Ndatjibona bathu ibaba, bathu bana misholo yakawoma. 10Ngwenu tjindiletja kuti bushongola gwangu gubathutile se moto ndibalobese, koga ndowothama ludzi lukulu kudwa mu kuli.”

11 # Mbalo 14:13-19 Koga Mushe kakumbila Yahwe Ndzimu uwe kati, “Ini bushongola gwenyu gungalobesa bathu benyu bamakadusa mu shango ye Egipiti nge simba gulu nenge tjiazha tjakasima sa ikoku kene? 12Baegipiti kana banowodwa beti, ‘Yahwe bakabadusa mu Egipiti nge nkumbulo mbi kuti benobabulayila mu matombo ne kubalobesa mu shango.’ Buzani moyo wenyu, bushongola gwenyu ngagupele musishingile bathu benyu mbipo iyeyi. 13#Kutangisa 22:16, 17; 17:8Kumbulani Abhurahama na Isaki na Iziraela balanda benyu bamakatuna ku bali muti, ‘Ndowowatsha bana benyu bakabe banji se nyenyedzi dze zhuzhugwi, shango yose iyeyi yandakamugadzabgwe ndowoyipa bana benyu, banowoyi thuwa nge kusingapele.’ ” 14Ndizo Yahwe bakazwidziba mu mbipo yabakabe bakumbula kuishingila bathu babo.

15Mushe kabe eshanduka edeluka dombo akabhata zwileiti zwe tjidumano, zwakakwagwa mukati na kuzhe zose. 16Zwileiti izwezo zwakabe zwathamiwa ne Ndzimu ne nkwalo uli nkwalo we Ndzimu wakakobolegwa mu zwileiti.

17Joshuwa kati ehwa zhoba ye bathu bemimila, kadwa Mushe kati, “Kuna zhoba ye ngwa mu bukotokelo.” 18Mushe kanshandula eti, “Zhoba yandinohwa ate uli mpululu we kukunda kene guwo le kukundiwa, koga ndohwa zhoba ye bathu banomba.”

19Kukati Mushe abe pejo ne makotokelo pa hwunde ye dombo, kabona nkong'wana ne bathu bezana, kazhala bushongola kwazo. Ipapo kaposa zwileiti zwaakabe akabhata zwikapkhwanyika. 20Katola nkong'wana wabakabe bathama kaupisa kaukwiya kalonga nlota wawo mu vula kathama kuti Baiziraela bang'we vula iyeyo. 21Ngono Mushe kabhuzwa Aroni kati, “Ibaba bathu bakuthamani tjayita kuti ubalonge mu tjibi tjingapangapa?”

22Aroni kabe eti, “Musigwadze moyo kungapo tetshi wangu, moziba kuti bathu ibaba banokuligwa nge mbipo kungapani. 23Bakandidwa bakati, ‘Mutithamile midzimu inowotitungamila, Mushe iye wakatidusa mu shango ye Egipiti atitoziba kuti kwatini nge kukwe.’ 24Ngono imi abe ndibadwa nditi, ‘Iye una golide ngaaiduse’ ndizo bakabe bendipa iyo, ngono abe ndiilashila mu moto kube kubhuda nkong'wana iwoyu.”

25Ngono Mushe kati ebona kuti bathu bapanduka ngoti Aroni abaletja bakapanduka kakale bazwilengudza mu zwita zwabo, 26ipapo Mushe kama pa nkoba we bukotokelo kati, “Iye umile na Yahwe ngaazhe kundili.” Ngono bakololo ba Levi bose bakakubungana panli. 27Ngono kabadwa kati, “Yahwe Ndzimu we Iziraela bakati, ‘Mmwe ne mmwe ngaadedele bukanu gugwe ayende ebuya buya mu bukotokelo kudwa ku nkoba kuyenda ku mmwe, abulaye nkololo wa tate babe, abulaye nkwinya uwe abulaye ne mbakidzani uwe.’ ” 28Bakololo ba Levi bakashinga sekwa badwiwa ndi Mushe, mu zhuba ilelo kukafa bathu bali zwiwulu zwili zwitatu (3 000). 29Ipapo Mushe kati, “Nasi mazwitshwayila kushingila Yahwe mmwe ne mmwe wenyu nge kubulaya nkololo uwe ne mwana wa tate babe kuti Yahwe bamukombolele mu zhuba lino.” 30Tjimuka Mushe kadwa bathu kati, “Makathama tjibi tjikulu kulu kwazo. Ngono ngwenu ndowoyenda kuna Yahwe, pamwe ndingamuthamila gadzano ngekwe tjibi tjenyu.” 31Ndizo Mushe kabgwilila kuna Yahwe kabe eti ku bali, “Bathu ibaba bakathama tjibi tjakabangalala. Bakazwithamigwa midzimu nge golide bakabuya bakayithigamila. 32#Njimbo 69:28; Zumbunulo 3:5Mubazwiibhatigwe zwibi zwabo, koga amusingabazwiibhatigwe, ndomukumbila bukushani zina langu mu lukwalo gwenyu gwa makakwala.”

33Koga Yahwe bakadwa Mushe bakati, “Iye wanditjinyila ndiye wandinobukusha mu lukwalo gwangu. 34Yenda ngwenu wali utungamilile bathu ibaba kwandakakubudza, ntumwa wangu we kudzimu unowokutungamila. Koga mu zhuba landinowoloba, ndowobalobela jinyo labo.” 35Yahwe bakabaloba bathu ibaba ngoti bakathama nkong'wana beuthamigwa ndi Aroni.

Currently Selected:

Kufuluka 32: KBTP

Highlight

Compare

Copy