Kufuluka 30
30
Tjibeso tjinopisigwa motsha
(Kufuluka 37:25-28)
1“Uthame tjibeso tjinopisigwa motsha nge makwasayile e n'wunga. 2Bulefu gwatjo gulizane ne bupabi gwatjo, gube thambo, bulefu kuyenda pezhugwi gube maboko mabili. Tjibe ne nyanga dzakabhatshanyiwa natjo mu midzibo yatjo minna. 3Utjidzulule nge golide mbuyanana pezhugwi kwatjo ne hwunde dzatjo dzose kutjipoteleka ne nyanga dzatjo, ube utjithamila mpeto nge golide kutjipoteleka. 4Utjithamile milipo mibili inoshomekwa mapango anotjisenga, uithame nge golide kusi kwe mpeto mu mbadu dzatjo. 5Uthame mapangwana e n'wunga uadzulule nge golide. 6Tjibeso itjetji utjibige mbeli kwe tjisitilo tjimbeli kwe bhokisi le butendeki mbeli kwe tjigalo tje ngoni tji phezhugwi kwe bhokisi le butendeki pandinowoshangana nawe. 7Aroni unowopisila motsha unonuhwa zwinozipa mu tjili mangwanana mamwe ne mamwe ha e lulwamisa mavone, 8ne mu madekwana ha Aroni e lulwamisa mavone, apise motsha pana Yahwe kugale kwakajalo mu zwizekugwana zwenyu. 9Usitongo pisila motsha usakayengemala mu tjili kene tjibhayilo tjinopisiwa kene tjipo tje mathunde, usitongo tjidila tjipo tje tjing'o. 10Aroni athame nshingo we kugadzanya mu nyanga dzatjo kang'ompela nge gole. Azhodze malopa e tjibhayilo mu nyanga dzatjo kang'ompela nge gole mu zwizekugwana zwenyu, ngobe tjakayengemala kwazo kuna Yahwe.”
Lukhetho gwe kudzutunugwa
11Yahwe bakadwa Mushe bakati, 12“Uti ubala Baiziraela, mmwe ne mmwe wabagwa adusile Yahwe tjidzutunulo tje butjilo gugwe, kuti kusitongo be ne mbatsha pakati kwabo ha ubabala. 13#Kufuluka 38:25, 26; Matewu 17:24Mmwe ne mmwe umuna babagwa ngaaduse gaswa le shekele kuyendidzana ne shekele ye nshasha wakayengemala inolema kungapa gera dzili makumi mabili (20). 14Mmwe ne mmwe wabagwa kudwila mu makole ali makumi mabili (20) kuyenda pezhugwi wakafanila dusila Yahwe tjibhayilo itjetji. 15Nfumi aatowodusa kunji, nshayi naiye aatowodusa kutukunu pa gaswa le shekele pamunowobe mudusa tjibhayilo tja Yahwe kudzutunula butjilo gwenyu. 16Utole mari e kudzutunula mu Baiziraela uashingise mu mishingo ye nshasha we bushanganilo, kuti ikoku kuzhise gumbuludzo ku bathu be Iziraela pana Yahwe, muzwithamigwe kugadzanya.”
Bhavu le phangula
17Yahwe bakadwa Mushe bakati, 18#Kufuluka 38:8“Uthamebo bhavu nge phangula ne magalo alo uathame nge phangula lili linongulila. Ngono ube ulibiga pakati kwe nshasha we bushanganilo ne tjibeso tjinopisigwa zwibhayilo ngono ube ulonga vula mulili. 19Aroni ne bakololo babe banowobe bengulila maboko ne makumbo abo mulili. 20Bati bengina mu nshasha we bushanganilo kene bezha pejo ne tjibeso tjinopisigwa zwibhayilo bewoshinga, bepisila Yahwe tjibhayilo bangule ne vula kuti ndizo basife. 21Bangule maboko ne makumbo kuti basife. Ikoku kowobe nlayo usingapele ku bali, ne kuna Aroni ne ku bana babe ne zwizekugwana zwabo.”
Mafuta anozhodziwa bashingi ne zwishingisiwa
22 #
Kufuluka 37:29
Yahwe bakadwa Mushe bakati, 23“Tola mimotsha mibuya eyi: Mira ili vulana inolema kunga shekele dzili mazana ali mashanu (500) ne sinamoni inonuhwa zwinozipa inolema kungapa shekele dzili mazana mabili ana makumi ali mashanu (250) ne khane inonuhwa zwinozipa inolema kungapa shekele dzili mazana ali mabili ana makumi mashanu (250), 24ne khasiya inolema kungapa mazana ali mashanu e shekele kuyendidzane ne shekele ye nshasha wakayengemala, utole mafuta e mitjelo ye ntoba anolizana lithara dzili nna. 25Uthame mafuta anozhodziwa akayengemala anonuhwa zwinozipa nge kushanganya zwithu izwezwi. 26Ube uazhodza nshasha we bushanganilo ne bhokisi le butendeki, 27ne tafuli ne zwinoshingisiwa paili zose ne tjigadziko tje mavone na zose zwinoshingisiwa mu tjili ne tjibeso tje motsha. 28Uzhodze ne tjibeso tjinopisigwa zwibhayilo ne zwija zwatjo zose ne bhavu ne magadziko alo. 29Uzwiyengemadze kuti zwiyengemale kupindisisa, tjimwe ne tjimwe tjinowozwikutha tjowoyengemala. 30Uzhodze Aroni ne bakololo babe ubayengemadze kuti bandishingile bali bapirisiti. 31Ube udwa Baiziraela uti, ‘Iyawa abe mafuta angu anozhodziwa mu zwizekugwana zwenyu zose. 32Asitongo zhogwa mu mbili we usi mpirisiti, kakale kusibe ne mafuta anothamiwa saiyawa, iyawa ngaabe mafuta akayengemala ku muli. 33Iye unowothama mafuta anonga iyawa kene kuli kuazhodza mmwe usi mpirisiti unowodusiwa mu bathu bakanyi kukwe.’ ”
Nnuhwo unozipa
34Yahwe bakadwa Mushe bakati, “Tola zwipayisi zwinozipa ne nyonje inoyi sitakite ne onikha ne galibhanumu, izwezwi zwipayisi zwinozipa zose zwilizane nge themba yazo. 35Uthame motsha wakashanganyiwa zwithu izwezwi unonuhwa zwinozipa, ulonge mwenyu, kube motsha mbuyanana wakayengemala. 36Mmwe wawo uukwiye ube bgwisana ubige mmwe wawo mbeli kwe nlayo mu nshasha we bushanganilo pandinowoshanganila nawe, ube motsha wakayengemala kupindisisa kumuli ungawakathamwa nge nthami we zwizholo. 37Usitongo zwithamigwa motsha unothamwa nge zila yakajali. Iwoyu wakayengemala kuna Yahwe. 38Iye unowozwithamigwa motsha unonga iwo eushingisa se tjinonuhwisa zwinozipa, unowodusiwa pakati kwe bakanyi kwabo.”
Currently Selected:
Kufuluka 30: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
