Kufuluka 16

Mana ne hwalishanga

1Gubungano lose le Iziraela likamilika kudwa mu Elimu likangina mu tjilambanyika tje Sini tji pakati kwe Elimu ne Sinai nge zhuba le bugumi lina mazhuba ali mashanu e mwedzi we bubili basinobhuda mu shango ye Egipiti. 2Gubungano lose le Iziraela likang'ong'ola kakale kuna Mushe na Aroni mu tjilambanyika. 3Likati ku bali, “Dzene Yahwe bakabe batibulayila mu shango ye Egipiti titjigele pa hali dze nyama tija zojiwa tiguta, ngoti imwi makatizhisa mu tjilambanyika itjetji kowobulaya itjaba tjose itjetji nge zhala.”

4 # Johani 6:31 Yahwe ipapo bakadwa Mushe bakati, “Bona, ndowomburudzila tjiwunga kumuli tjidwa kudzimu, ngono bathu bayende banonunga tjakabalizana nge zhuba, kuti ndibone kene banowolondolodza nlayo wangu kene aa. 5Nge zhuba le butathatu banunge kwakalizana mazhuba mabili babige.”

6Ndizo Mushe na Aroni bakadwa Baiziraela bose bakati, “Mu madekwana mowoziba kuti ndi Yahwe bakamudusa mu shango ye Egipiti. 7Mu mangwanana mowobona gudzo la Yahwe ngoti bahwa ng'ong'olo yenyu nge kwabo. Iswi tini kene bamungashwa mung'ong'olela?” 8Mushe kabadwa kati, “Ha Yahwe bemupa nyama kuti muje madekwana, mangwanana banowomupa tjiwunga kuti muje mugute, ngoti Yahwe bahwa ng'ong'olo dzenyu dzamakabang'ong'olela. Iswi tini kene? Ng'ong'olo dzenyu adzizolingisana naswi koga dzakalingisana na Yahwe.” 9Mushe kadwa Aroni kati, “Idwa gubungano lose le Iziraela uti, ‘Izhani pana Yahwe, ngoti bahwa ng'ong'olo dzenyu.’ ” 10Ngono kukati Aroni atjalebeleka ne gubungano lose le Iziraela, bakalinga ku tjilambanyika ngono bakabona tjedza tja Yahwe tjiboneka mu gole. 11Yahwe bakadwa Mushe bakati, 12“Ndahwa kung'ong'ola kwe Baiziraela, ubadwe uti, ‘Madekwana mowoja nyama, koga mu mangwanana mowogutshiwa nge tjiwunga, ipapo mowoziba kuti ndimi Yahwe Ndzimu wenyu.’ ”

13Mu madekwana hwalishanga dzikazha dzikazhala mu buthibelelo; koga mu mangwanana khawa ikawa kose mu buthibelelo. 14Kukati khawa yapela, kukaboneka kuna kuthu kunonga zwiyengana zwe makaa e vula kwakaandama pasi mu tjilambanyika. 15#1 Bakorinta 10:3Baiziraela bakati bekubona bakabhuzwana bakati, “Ini ikoku?” Bakabe basingazibe kuti ini. Ngono Mushe kabadwa kati, “Nditjo tjiwunga tjamapiwa ndi Yahwe kuti muje. 16Yahwe bakati: Mmwe ne mmwe wenyu anunge kwakanlizana kuja; nthu anunge buleke kuyendidzane ne mbalo ye be nsha uwe.”

17Ngono Baiziraela bakathama beijalo; bamwe bakanunga kunji bamwe kushomanana kuyenda nge bunji gwabo. 18#2 Bakorinta 8:15Koga bakati bekuyela nge lithara dzili mbili, bakawana wanunga kuli kunji asina tjajiwa tjikasala, wanunga kushomanana kwanlizana ngoti mmwe ne mmwe anunga kwakanlizana kuja. 19Mushe kabadwa kati, “Kusibe ne unowokubiga kuswikila tjimuka.” 20Koga bakasihwilile Mushe; kukathama kuti Mushe abazhalile bushongola. Ibabo bakasiya bakabiga kuswikila tjimuka, ngono kukabe ne hwonye kukanuhwa. 21Bakabe bekukubunganya mangwanana mamwe ne mamwe, mmwe ne mmwe ekubunganya kwakanlizana kuja, koga kwakabe kuti zhuba alopisa kukanyawuka.

22Mu zhuba le butathatu bakanunga zwilizanyo zwili zwibili, lithara mbili kabili. Ngono batungamili bose be gubungano bakazha kuna Mushe bakambudza. 23#Kufuluka 20:8-11Mushe iye kati ku bali, “Itjetji nditjo tjakalebgwa ndi Yahwe beti: ‘Mangwana i zhuba le nsi, zhuba lakayengemala le nsi la Yahwe, bhikani tjamungabhika, ngono kunowobe kwasala mukubigile mangwana.’ ” 24Ndizo bakakubiga kuswikila mangwana sekwa bakadwiwa ndi Mushe, ngono kukasitongo bola ne hwonye dzikasibepo mu kuli. 25Mushe kabadwa kati, “Mukuje nasi, nasi i zhuba le nsi we Sabata ya Yahwe, nasi amungakuwane ku shango. 26Mungabe mukununga mu mazhuba ali matathatu, koga mu zhuba le kutendeka, zhuba le nsi, akutowobepo.”

27Mu zhuba le kutendeka bamwe bakabhuda beti banononunga, koga bakawana kusina. 28Yahwe bakabhuzwa Mushe bakati, “Kowotola tjibaka tjingapani mulamba kulondolodza ndayo dzangu ne milayo yangu kene? 29Bona! Yahwe bakamupa nsi we Sabata, ndizo mu zhuba le butathatu banomupa tjiwunga tjakalizana mazhuba mabili; mmwe ne mmwe wenyu agale mu magalo awe, kusiyite unobhuda mu magalo awe nge zhuba le kutendeka.” 30Ndizo bathu bakanyaluluka mu zhuba le kutendeka.

31 # Mbalo 11:7, 8 Baiziraela bakakupa zina beti mana; kwakabe kulingika se mbewu ye ntinyana unoyi koriyanda, kuli kutjena ku labilika se tjiwunga tjabhikwa nge butji. 32Mushe kabadwa kati, “Itjetji nditjo tjakalebgwa ndi Yahwe beti: ‘Mutole lithara yako muibige kuti zwizekugwana zose zwizhe zwibone tjiwunga tjandakamutjidza nditjo mu tjilambanyika pandakamudusa mu shango ye Egipiti.’ ” 33#Bahebheru 9:4Ndizo Mushe kadwa Aroni kati, “Tola lukamba ulonge mana ye tjilizanyo tje bulekana muili ube uibiga mbeli kwa Yahwe ibigigwe zwizekugwana zwenyu zose.” 34Aroni kalibiga mbeli kwe Bhokisi le Tjidumano se kwakadwiwa Mushe ndi Yahwe kuti libigiwe. 35#Joshuwa 5:12Ngono Baiziraela bakatjila beja mana makole ali makumi manna kudzina beswika mu shango inogalika, bakaja mana kudzina beswika ku n'gathu we shango ye Kanana. 36(Tjiyelo tjakabe tjiyegwa natjo tjakabe tjilizana lithara mbili.)

Currently Selected:

Kufuluka 16: KBTP

Highlight

Compare

Copy