Kufuluka 13
13
Mbano dzopiwa Ndzimu
1Yahwe bakadwa Mushe bakati, 2#Mbalo 3:13; Luke 2:23“Undiyengemadzile bana bose be kutanga, tjimwe ne tjimwe tjinotanga zwagwa tjili tjilume mu Iziraela, tjili tje nthu kene tje ithuwo nde tjangu.”
Nzano we Kumpinda pezhugwi
3Ngono Mushe kadwa bathu kati, “Kumbulani zhuba ileli, la makadwa mu Egipiti, mudwa mu ng'umba ye busungwa. Ndilo zhuba lamakadusiwa nge simba le luboko gwa Yahwe mudusiwa mu busungwa. Kusitongobe ne tjiwunga tjakabidziwa tjinojiwa mu zhuba ileli. 4Mobhuda mu Egipiti mu zhuba ileli le mwedzi we kutanga, mwedzi we Abibi. 5Yahwe bakatuna kuna bobatategulu benyu kuti banowomupa shango ye Bakanana ne Bahiti ne Baamori ne Bahivi ne Bajabisi, ili shango inowunga nkaka ne butji gwe nyutji, ndizo makafanila londolodza nzano uwoyu mu mwedzi uwoyu. 6Muje tjiwunga tjisina mbidzo mazhuba ali kutendeka, mu zhuba le kutendeka kube nzano wa Yahwe. 7Mowoja tjiwunga tjisina mbidzo mazhuba ali kutendeka, musitongowanika muna tjiwunga tjina mbidzo, kusitongowanika muna mbidzo mu ntuthu uwo. 8Ngono muti nge zhuba le kutanga le nzano mubudze bakololo benyu muti, ‘Tothama ikoku ngobe Yahwe bakatithamila iko muzhuba latakadwa mu Egipiti.’ 9Ngono kowobe tjilakidzo mu luboko gugo ne ikumbuludzo mu mesho awo kulondolodza nlayo wa Yahwe, nge nlomo wenyu ngobe Yahwe bakakudusa mu Egipiti nge simba le luboko gwabo. 10Mulondolodze ndaulo iyeyi nge tjibaka tjakalingisana gole ne gole.”
Kudzutunula kwe zwazwagwa kutanga
11“Ngono kowoti Yahwe basinomukotosa mu shango ye Kanana, sekwa bakatuna kumuli ne kuna bobatategulu benyu, banomupa ndaulo iyeyi, 12#Kufuluka 34:19, 20; Luke 2:23unowoshalulila Yahwe zose zwilume zwazwagwa kutanga nge zwithuwo zwizo kube zwa Yahwe. 13Donki ndume imwe ne imwe ya zwagwa kutanga unowoidzutunula ne pkhwizana, ha isingadzutugwe ngayivungwe ntshibha. Mbano dzose dze bakololo babo naidzo dzidzutunugwe. 14Ngono ha misi idwilila, bakololo benyu bemubhuzwa kuti kuthu ikoku kodwani, mubadwe muti, ‘Yahwe bakatidusa mu Egipiti mu ng'umba ye busungwa nge simba le luboko gwabo. 15Kwakati Faro paakakukutadza moyo elamba tiyenda, Yahwe bakabulaya mbano dzose mu shango ye Egipiti, dzose dze bathu ne zwithuwo zwakazwagwa kutanga. Ndizo tidusila Yahwe tjibhayilo tjimwe ne tjimwe tje ithuwo tje tjilume tjazwagwa kutanga, koga mbano dzose dze bakololo bedu tidzidzutunula. 16Nzano iwoyo ibe ikumbuludzo kumuli se linga lakaambagwa mu luboko.#13:16 Nzano…uboko: Baiziraela bakabe beambala linga mu luboko ne tjimwe munsholo kubakumbuludza tjimwe. Kuli kumukumbuludza kuti Yahwe bakatidusa nge simba labo mu Egipiti.’ ”
Shongwe ye gole ne bibi le moto
17Kukati Faro eletjedza bathu beyenda, Ndzimu ukasibatungamile nge zila ye shango ye Palasitina, nenguba yakabe ili iyo ipejo, ngobe Ndzimu wakati, “Bathu bangadwa beti bebona ngwa bebe beshanduka bebgwilila ku Egipiti.” 18Koga Ndzimu ukabapoteledza nge zila ye tjilambanyika inoyendila ku Gungwa Shaba. Bathu be Iziraela bakayenda bebhuda mu shango ye Egipiti bakazwilulwamisila ngwa.
19 #
Kutangisa 50:25; Joshuwa 24:32 Mushe katola mafupa a Josefa kayenda nawo, ngobe Josefa wakabe atunisa bathu be Iziraela eti, “Ndzimu unowomusunungula, ngono mube musenga mafupa angu muyende nawo.”
20Bakayenda bedwa mu Sukoti bakanokotokela mu Etamu, pa phelelo dze tjilambanyika. 21Ngono Yahwe bakayenda bakabatungamila nge shongwe ye gole kubalakidza zila kuli masikati, busiku bakabatungamila nge bibi le moto kubathamila tjedza kuti ndizo batubule yenda siku ne sikati. 22Shongwe ye gole masikati kene bibi le moto busiku zwakabe zwisingatsheduke mbeli kwe bathu.
Currently Selected:
Kufuluka 13: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
