Baefeso 3
3
Nshingo wa Paulo eshingila Bezwitjaba
1Ngekwa ikoku, imi Paulo, ndi nsungwa wa Kirisiti Jesu nge kwenyu imwi Bezwitjaba. 2Ndoduma nge buzhalo kuti, makahwa kuti Ndzimu nge ngoni dzawo, wakandipa nshingo nge kwenyu, 3nenge sekwa ndakazibisiwa masazibgwe iyawo nge zumbunulo, sekwa ndakakwala nge bufupi. 4#Bakolosa 1:26, 27Ha mubala ipapa, mungahwisisa luzibo gwangu mu masazibgwe a Kirisiti. 5Mu zwizekugwana zwakapinda, masazibgwe iyawa aazotongo zumbunuligwa bathu, se ngwenu kwakazumbunuligwa batumwa bawo bakayengemala ne balebesambeli nge Meya. 6Ndizo wali, Bezwitjaba batjibe bagali thaka na ibabo, batjibe ndungululo dze mbili nng'ompela, kakale bana gobe mu kugadzabgwe kumuna Kirisiti Jesu nge ndebo mbuya.
7Ndakabe nlanda we ndebo mbuya iyeyi nge tjipo tje ngoni dze Ndzimu, itjo tjandakapiwa nge kushinga kwe simba lawo. 8Nenguba ndili ntukunu mu ntukunu tjose we bayengemali, ngoni idzedzi dzakazhisiwa mundili kusumikilila be Bezwitjaba fumwa isingapele ya Kirisiti, 9nenge kuthama kuti bathu bose babone kuti ndongoloso ye masazibgwe akabe akasumbikala kudwila ntolo mu Ndzimu wakabumba zwithu zose. 10Kuti nge gubungano, butjenjedu igogu gunjinji gwe Ndzimu, ngwenu guzibisiwe babusi ne balauli mu magalo e kudzimu, 11kuyendidzana nge ndongoloso yawo isingapele, yawakashingisa muna Kirisiti Jesu She wedu. 12Tina tjilopa ndiye kuzha pa Ndzimu tisingatje takasimamoyo nge kugalamoyo munli. 13Ndizo ndokumbila kuti, musinyadziwemoyo ngekwa ndinomudziyilila, ngobe igudzo lenyu.
Ludo gwa Kirisiti
14Ngekwa ikoku, ndothigama mbeli kwa Tate, 15ibo be zina nsha mmwe ne mmwe kudzimu ne mu shango launodang'wa ndilo. 16Ndotembezela kuti, kuyendidzana nge fumwa ye gudzo labo, tshene bangamusimisa nge simba le Meya yabo, kuti musime tjemukatikati kwenyu, 17nenge kuti Kirisiti agale mu mimoyo yenyu nge kugalamoyo, kuti se makadzikigwa mukateyiwa mu ludo, 18kuti mube ne masimba e kuhwisisa nge buzhalo ne bayengemali bose, bupabi ne bulefu ne bukulu ne mukati kwe ludo gwa Kirisiti, 19igo gunopinda zibo kuti ndizo muzhadziwe nge mbumbiko yose ye Ndzimu muti tupu.
20Iye unotubula nge simba linoshinga mutili, kuthama zwithu zwinjinji, kupinda kose kwatingakumbila kene kwatingaalakana, 21ngaakudziwe nge gubungano, muna Kirisiti Jesu kunoti mu zwizekugwana zose, nge kusingapele kose! Ngakujalo.
Kalanga Bible © Bible Society of Botswana, 2008, 2018.