Baefeso 1
1
1 #
Mishingo 18:19-21; 19:1 Ndimi Paulo, ntumwa wa Kirisiti Jesu nge kuda kwe Ndzimu.
Ku bayengemali bamu Nzi we Efeso, ibo bakagalamoyo muna Kirisiti Jesu.
2Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.
Makombolelo e tjimeya muna Kirisiti
3Ngakukudziwe Ndzimu Tate ba She wedu Jesu Kirisiti, bakatipa makombolelo muna Kirisiti nge makombolelo mamwe ne mamwe e tjimeya mu magalo e kudzimu. 4Ngobe Ndzimu wakatishalula kale kube bawo muna Kirisiti, shango isathu ikabambiwa, kuti ndizo tiyengemale tibe basina nlandu.
5Ndzimu wakatithama bakololo bawo bakapelela ndi Jesu Kirisiti mu ludo gwawo, kuyendidzana nge mazwimisilo e kuda kwawo. 6Ngatikudzileni Ndzimu ngoni dzawo hwulu, dza wakatipa nge sununguko mu nkololo wawo unodika! 7#Bakolosa 1:14Munli tina kusununguka nge lopa lile, nge kutizwiibhatigwa matjinyo edu, kuyendidzana ne bukulu gwe ngoni dzawo, 8dzawakatihwila kungapangapa, mu butjenjedu gwawo ne kuhwisisa, 9ngobe Ndzimu wakathama kuti tihwisise masazibgwe e kuda kwawo, kuyendidzana ne mazwimisilo awo akalulwama awakapedza kale muna Kirisiti. 10Ikoku ili ndongoloso ye Ndzimu kuswikila tjibaka tjakafanila tjizha, kubhatshanya zwithu zose muna Kirisiti, zwithu zose zwi kudzimu ne zwithu zwimu shango.
11Muna Kirisiti, kuyendidzana nge ndongoloso ye Ndzimu unothama zwithu zose kuyendidzana nge njendiso ye kuda kwawo, 12iswi takagalabgwe kutanga muna Kirisiti, takashaluligwa kuti titjilile kulumbidza gudzo lawo.
13Namwibo sekwa makahwa dama le malebeswa, iyo ndebo mbuya ye jidzo lenyu, koga mukagalamoyo muna Kirisiti, makatjwayiwa nge Meya yakayengemala yawakagadzabgwe, 14ili itjo tjibigilidzo tje thaka yedu yatakagadziwabgwe nge Ndzimu, ngono ikoku kotipa malebeswa e kuti, Ndzimu unowodzutunula bana bawo kuuteta ne kuukudza.
Ntembezelo wa Paulo
15Ngekwa ikoku nenge kuhwa ngekwe bugalimoyo gwenyu muna She Jesu ne ludo gwamunoda bayengemali bose ndigo, 16anditoletja kuboka Ndzimu nge kwenyu, ndimukumbula mu mitembezelo yangu, 17kuti Ndzimu wa She wedu Jesu Kirisiti, Tate banokudziwa bamupe meya inowomutjenjedza ikamuzumbunulila Ndzimu, kuti muuzibe. 18Mikumbulo yenyu ngaibe ne tjedza kuti muzibe kuti kugalabgwe kwawakamudanila ini, ne kuti muzibe bukulu gwe fumwa yawo yawakagadzabgwe kuti unowoipa bayengemali, 19nenge kuziba simba lawo gulu lisina palinoma, lili mutili iswi banogalamoyo, kuyendidzana ne simba lawo gulu. 20#Njimbo 110:1Ndzimu wakashingisa simba ileli mu kumusa Kirisiti mu bafi, ngono ukan'gadza ku luboko gwawo gwe luji mu magalo e kudzimu,#1:20 ukan'gadza…kudzimu: Kodwiwa eyitiwa ntungamili we bathu bose. 21pezhugwi kwe babusi bose ne balauli ne masimba na boshe ne pezhugwi kwe zina limwe ne limwe lingadang'wa, kusimu nsi uno koga ne muna unozha. 22#Njimbo 8:6#Bakolosa 1:18Ndzimu wakabiga zwithu zose kusi kwe ndaulo ya Kirisiti, ukanthama nsholo we zwithu zose mu gubungano. 23Gubungano ileli, ndilo mbili uwe, ilo linozhadziwa ndiye unozhadza tjimwe ne tjimwe.
Kalanga Bible © Bible Society of Botswana, 2008, 2018.