Nsumikili 7
7
Butjenjedu
1 #
Makungulupeswa 22:1
Zina buya lopinda tjizholo tjakanaka, ne zhuba le lufu lopinda le kuzwagwa. 2Koyita kuyenda ku ng'umba ye tjililo pana ku ng'umba ye zojiwa, ngobe ndilo bhelelo le bathu bose, kakale banotjila banowokulonga mu moyo. 3Buyendasi goyita pa tjiseko, ngoti buso gungalakidza kusashatha ngono moyo wakashatha. 4Mimoyo ye batjenjedu imu ng'umba ye tjililo, koga mimoyo ye zwilengwe imu ng'umba ye mizipo. 5Koyita kuti nthu aamutjile kutjemegwa nge ntjenjedu pana kuteedza lumbo gwe zwilengwe. 6Koga se kuthathanya kwe miwa kusi kwe hali, tjakajalo tjiseko tje zwilengwe, ikoku naiko madatha. 7Nge malebeswa tshambilidzo ino thama ntjenjedu akabe tjilengwe, ne tjizwimbanlomo tjobodza nkumbulo. 8Koyita bhelelo le tjithu pana kutangisa kwatjo, kakale moyonlefu unoyita pa mazwikudzo. 9#Jakubo 1:19Usitjimbidze wagwadzamoyo, ngobe kugwadzamoyo kogala mu zwifuba zwe zwilengwe. 10Usitongoti, “Ini misi ya ntolo ipinda misi ya ngwenu?” Ngobe ha uyijalo aautobhuzwa ne butjenjedu. 11Butjenjedu gwakanaka aguna thaka, i bhatsho muna ibabo banotjila. 12Ngobe butjenjedu gobakilila koga se mari e bakilila, bhatsho ye luzibo hwuti butjenjedu gotjengeta butjilo gwa iye unago. 13Kumbulani mishingo ye Ndzimu, ndiyani unga tambunudza tjithu tjawakakombamisa? 14Zhuba le kubhudilila ushathe, koga mu zhuba le manikano kumbula woku, Ndzimu wakalithama koga sa ilelije, kuti nthu asitongo ziba tjinowoshingikala shule. 15Mu butjilo gwangu gusigwatjimwe ndakazwibona zose, kuna nlulwami unoloba mu bululwami gugwe, kukabe ne nthu mbi unobe ne butjilo gulefu mu kushinga bubi kukwe. 16Usibe nlulwami kwaka pindilila, kakale usitongobe ntjenjedusa, unowobe uzwibulailani? 17Usitongobe mbimbi, kakale usitongobe tjilengwe, unowobe ufilani tjibaka tjitjo tjisathu tjikaswika? 18Kubuya kuti ubhate ikoku, usitongo letja, ngobe iye unotja Ndzimu unowokunda zose. 19Butjenjedu go pa simba nthu wakatjenjela kupinda gumi le balauli mu nzi nkulu. 20Malebeswa hwuti akuna nlulwami mu shango unothama bubuya asingatongoyita tjibi. 21Usibe ne hanya ne zwithu zose zwinolebgwa ne bathu, ngobe ungadwa uhwa nlanda uwo ekulonga bhiso, 22unoziba tjamu moyo uwo kuti iwe ngekuko wakatongo longa bamwe bhiso. 23Kose ikoku ndaka kulika nge butjenjedu, ndakati, “Ndowotjenjela,” koga kwake kuli kule nami. 24Itjo tjiyapo, tjikulekule ntome tjimukati mukatikati, ndiani ungatjiwana? 25Ndakalonga meya mu nyama mukushakisisa butjenjedu ne tjimo tje zwithu, ne kuziba bubi gwe bulengwe ne bulengwe gwe bupengo. 26Ndakawana tjithu tjinogwadza kupinda lufu, kuli nkadzi ali dati ali bhuzhu, maboko awe ali ketani, koga iye unoshathisa Ndzimu unomphunyuka, koga ntjinyi unosungwa nge nkadzi wakajalo. 27“Bonani, tjandakawana,” koleba Nsumikili, “Ndakati ndishanganya zwithu kuti ndibone tjimo tjazo, 28shule kwe kushakisisa kanjinji, akuna tjandakawana. Ndakawana nlume nng'ompela pakati kwe tjiwulu (1 000) tje bathu, koga we tjikadzi pakati kwa bose ibabo ndakansheta. 29Bonani, tjithu tjing'ompela tjandakawana ndikuti Ndzimu wakabumba nthu akalulwama, koga bathu banoshaka mano manjinji.”
Kalanga Bible © Bible Society of Botswana, 2008, 2018.