Nsumikili 5
5
Itjani Yahwe
1Utjengete thambo dzidzo ha uyenda ku Ng'umba ye Ndzimu, kusedzela ukateedza kuyita pana kudusa tjibhayilo tje zwilengwe, ngobe zwisingazibe kuti zobezwithama bubi. 2Usitongo tjimbidza wazhula nlomo uwo, kene ukaletja moyo uwo ukaleba limwe dama mbeli kwe Ndzimu, ngobe Ndzimu ukudzimu, iwe umushango, ndizo ita kuti matama awo abe mashomanana. 3Hwope dzozha ne mishingo minji ne hwi le tjilengwe lina matama manjinji. 4#Njimbo 66:13, 14Ha utuna ku Ndzimu kuti unowouthamila tjimwe, usinonoke kutjithama, ngobe Ndzimu autoshathisiwa nge zwilengwe. Lipa tjaunobe watuna nge kwatjo. 5Koyita kusatuna panakuti utune kudwapo usinga lipe. 6Usiletje nlomo uwo ukakuthamisa tjibi, kakale usitongo zwiwana uli mu tjimo tjaunowodwa ntumwa we Ndzimu kuti wakabe uzana zo, ini Ndzimu wafanila gwadzilamoyo hwi lilo, ube ukolomola nshingo we maboko awo kene? 7Kana ha hwope dzipaphidzika, matama asi e tjimwe anopaphidzika, koga iwe itja Ndzimu.
Fumwa madatha
8Ha ubona bashayi betshambilidziwa mu ntuthu, ndulamo ne fanilo dzabo dzitogwa, usitjenamisiwe naikoko, ngobe nlauli ntukunu wakatungamigwa ne nkulu pa nli kakale kuna bamwe ba pezhugwi kwa ibabo. 9Kupinda zose, zwimila zwe minda zotogwa na bose na mambo banobhatshiwa bo ndizo. 10Iye unoda mari aangagutshiwe nge mari, kene unoda fumwa aangawane mimwiso, ikoku naiko bo madatha. 11Ha fumwa ipaphidzika, baji bayo banopaphidzikabo, mweni wayo unobuyigwa ngeni aisi kuilinga nge mesho koga? 12Hwope dze nlanda dzozipa, kene unoja kushomana kene kunjinji, koga guta kwe nfumi akutowon'wanisa hwope. 13Kuna bubi gwakabangalala gwandakabona mu shango, fumwa mweni yaakazwibigigwa inopelela i nlonga buyendasi, 14iyeyo fumwa iko mpalalila nge kuishingisa butjapa ngono ana mwana we tjilisana waanowofa esiya asina tjaanatjo. 15#Jobe 1:21; Njimbo 49:17; 1 Timoti 6:7Sekwa akadwa mu ntumbu wa mmeyabe, unowobgwilila ali mbujo sekwa akazha, akuna tje dukuta lile tjaanowo bgwilila akasenga mu maboko. 16Ikoku naikobo bubi gumwe gunotjenamisa, sekwa akazha, ndiko sekwa anowobgwilila, wakabuyigwa ngeni mukushingila phepo, 17ne mazhuba awe wose wakaapitsha mu zhalima ne mu buyendasi ne kudziyidzika kukulu ne mu bugwele ne moyo wakagwadza. 18Bonani, tjandakabona tjakalulwama ntome tjifanila hwuja ne kung'wa ne kushatha mu kushinga kwe mu shango, mu mazhuba mashomana e butjilo gwaakapiwa ne Ndzimu, ngobe ndilo gobe lile. 19Nthu mmwe ne mmwe bo wakapiwa nge Ndzimu fumwa ne thundu, akapiwa ne simba kuti azwije zwinzipile, ne kuamutjila gobe lile ne kushathila tja akashinga ikoku tjipo tje Ndzimu. 20Ndizo ha atjowoalakana mazhuba e butjilo gugwe ngobe Ndzimu wakampa lushatho gunjinji mu moyo uwe.
Kalanga Bible © Bible Society of Botswana, 2008, 2018.