Daniyele 7
7
MBONO DZA DANIYELE
(7:1—12:13)
Mbono ya Daniyele ye zwibandana zwinna
1Kwakati mu gole le kutanga la Bhelishazari ali mambo we Bhabhiloni, Daniyele wakabe akaizela mu bulawo gugwe kuli busiku ngono kawolota kakale kabona mbono. Ipapo Daniyele kakwala pasi mawoloto awe.
2Daniyele wakakwala eti, “Mu mbono yangu busiku ndakabona phepo nna dze kudzimu dzidzonga gungwa gulu. 3#Zumbunulo 13:1; 17:8Ndakabona zwibandana zwikulukulu zwinna zwibhuda mu gungwa, bunna gwazo zwakabe zwisingafanane. 4#Zumbunulo 13:2Tjibandana tje kutanga tjakabe tjifanana ne shumba koga tjina mapapilo anonga e dzu. Ndakati ipapo ndakalinga mapapilo atjo kasimugwa. Tjibandana itjetjo tjakanyanyuligwa pezhugwi kudzina tjima nge makumbo mabili se nthu ngono tjikalongwa moyo we nthu.
5“Tjibandana tje bubili tjakabe tjilingika se phuka ye mawunde wunde inoyi bhira lubadu gumwe gwatjo gwakamilidzigwa pezhugwi tjakabe tjakaluma mbadu dzili thatu mu nlomo watjo dzili pakati kwe meno atjo, ngono tjikadwiwa kuyi, ‘Milika, ija nyama sekwa ungatubula!’
6“Kudwa ipapo ndakati ndilinga abona tjibandana tjimwe, itjo tjakabe tjilingika se ngwe. Mu ikamba tjatjo tjakabe tjina mapapilo manna anonga e nyuni. Tjibandana itjetji tjakabe tjina misholo ili minna ngono tjikapiwa simba kubusa.
7 #
Zumbunulo 12:3; 13:1 “Shule kwaikoku ndakabona mu mbono busiku, ndakabona tjibandana tje bunna tjili mbeli kwangu, tjakabe tjitjisa kwazo kakale tjina masimba. Tjakabe tjina meno e butale, tjipkhwapkhwata, tjitshamba tjizwiya kose kwakabe kwasala nge makumbo atjo. Tjakabe tjisiyana kwazo ne zwibandana zwimwe zwitatu, itjo tjakabe tjina nyanga dzili gumi. 8#Zumbunulo 13:5, 6Ndakati nditjakumbula ngekwe nyanga idzedzo, ndikabona lunyanga gutukununu gumela pakati kwe nyanga idzedzo. Ngono nyanga thatu dzikasimugwa kuwanila lunyangana magalo. Lunyangana igogu gwakabe guna mesho anonga e nthu ne nlomo wakabe uleba mazwikudzo.”
Mbono ngekwe Wantolo
9 #
Zumbunulo 20:4;
Zumbunulo 1:14
“Ndakati nditjakalingisisa abona kubigwa zwigalo zwe bushe ngono iye Wantolo kagala mu tjigalo tjitje tje bushe. Zwiambalo zwizwe zwakabe zwakatjena zwinga kapuku, mavudzi awe ali mabuya enga wulu. Tjigalo tjitje tje bushe tjakabe tjili bhuba le moto makumbgwana atjo ali mithuto ye moto, 10#Zumbunulo 5:11; Zumbunulo 20:12gwizi gwe moto guwunga gudwa mutjili. Zwiwulu ne zwiwulu zwe bathu zwakabe zwin'shingila. Lubazhe gukatangisa nshingo wago, hwalo dzikazhugwa.
11“Ndakadwilila alingisisa ngoti ndakabe ndihwa lunyangana gwakabhata guleba matama e mazwikudzo. Ndakalingisisa kudza ndibona tjibandana tje bunna tjibulawa, mbili watjo ukalashigwa mu bhuba le moto tjikalobesiwa. 12Zwibandana zwimwe izo zwakatolegwa masimba azo ngono zwikaletjedziwa zwikatjila kwe tjibakana.
13 #
Matewu 24:30; 26:64; Mako 13:26; 14:62; Luke 21:27; Zumbunulo 1:7, 13; 14:14 “Mu mbono dzangu busiku ndakabona kuzha mmwe unolingika se nkololo we nthu ali pakati kwe makole e zhuzhugwi ngono kayenda kuna Wantolo ngono kama mbeli kukwe, 14#Zumbunulo 11:15ngono kapiwa bushe ne tjedza ne masimba ngono bathu bose ne zwitjaba zose ne njudzi dzose bakan'namata. Bushe gugwe nde gugelile tjatjose nge kusingapele tjose kakale bushe gugwe agutowofa gwakolomogwa.”
Mbono dzotjenesiwa
15Ngono ndakadziyidzika kwazo mu nkumbulo ngekwe mbono idzedzi ngoti dzakabe dzinditotomosa ngono imi Daniyele, 16ndakasedzela pa mmwe we bakabe bali mile thambgwana ngono ambuzwisisa tjingabe tjidwiwa nge mbono idzedzi. Ndizo wakandipa tjeneso nge buzhalo. 17Wakandidwa kati, “Zwibandana zwinna, mibuso minna inowomuka mu shango. 18#Zumbunulo 22:5Koga bayengemali be Upezhugwi zhugwi banowotola bushe ngono gowobe gwabo tjatjose nge malebeswa gowobe gwabo nge kusingapele kose.”
19Ngono ndakada ziba tjeneso ye tjibandana tje bunna, tjakabe tjisiyana ne zwimwe zwibandana kakale tjitotomosa kwazo tjina meno e butale ne matshimba dze phangula, tjibandana tjakapkhwapkhwata tjipkhwapkhwata, tjitshamba tjizwiya kose kwakabe kwasala. 20Kakale ndakada ziba ngekwe nyanga dzili gumi dzakabe dzili mu nsholo watjo ne ngekwe lunyangana gwakamela pakati kwe mamwe guthama kuti mamwe matatu akolomoke, lunyangana gwakabe gulingika gukulila mamwe guna mesho anonga e nthu ne nlomo wakabe uleba matama e mazwikudzo.
21 #
Zumbunulo 13:7
Ndakati ndakalingisisa lunyangana igogu gukagwa ne bayengemali ngono gukabakulila, 22#Zumbunulo 20:4kudzina Wantolo ezha esumikilisa bayengemali be Upezhugwi zhugwi nekuti tjibaka tjatjiswika tjekuti bayengemali batole bushe.
23Ngono wakandipa tjeneso inoti, “Tjibandana tje bunna mbuso we bunna unowomuka mu shango. Unowobe usiyana ne mimwe yose ngono unowolobesa shango yose ukaizwiyila pasi. 24#Zumbunulo 17:12Nyanga dzili gumi dzimilile bomambo bali gumi banowobepo mu bushe igogu. Kudwa ipapo kowomuka mambo usingafanane na ibabo be kutanga, unowokunda bomambo ibabo batatu. 25#Zumbunulo 12:14; 13:5, 6Unowoleba kusakanaka ngekwe Upezhugwi zhugwi ngono katshambilidza bayengemali kakale kagwisa kushandula zwibaka zwakabigwa ne milayo. Bayengemali banowobe pasi kukwe kwe tjibaka tje makole matatu ana gaswa. 26Ngono koga lubazhe gowogala, simba la mambo iwoyu unowolitolegwa tjatjose. 27#Zumbunulo 20:4; Zumbunulo 22:5Ipapo simba le bushe gose mu shango lowopiwa bayengemali bathu be Upezhugwi zhugwi. Bushe gugwe gowobe bushe gunogalila tjatjose ne babusi bose banowon'thigamila bakanteta.”
28Eli ndilo bhelelo le ndebeleko iyeyi. Imi Daniyele ndakadziyidzika kwazo kwakadzina kukathama kuti ndisale ndakafubala ngono azwibigila kose ikoku.
Kalanga Bible © Bible Society of Botswana, 2008, 2018.