Daniyele 11
11
1Ngono ndakati mu gole le kutanga la Dariyasi we Mede, ama naye ambhatsha kakale ambakilila.
Bomambo be burwa ne be bunandzwa
2Nlume iwoyo kadwilila kalebeleka eti, “Ndokubudza panoti lebeswa, kutjowozha bomambo bamwe bali batatu mu Pheshiya ngono kudwapo kowozha we bunna, iye unowobe akafuma kupinda ibaba bamwe. Ngono unowoti asimisiwa nge fumwa iye kadzonga bose kugwisana ne bushe gwe Gerisi. 3Ngono kudwapo kowozha mambo wakasima ne kupinda unowobusa nge simba gulu ethama sekwa anoshaka. 4Kowoti atjakula, mbuso uwe unowopaladziwa ukakobanyiwa nge phepo nna dze zhuzhugwe. Mbuso uwe autoyenda ku zwizekugwana zwizwe, kene ukabe ne simba linonga lile ngobe mbuso uwe unowobe wapaladziwa. 5Mambo we burwa unowobe ne simba koga mmwe we makulukota awe unowobe ne simba kumpinda ngono kabusa ntuthu uwe nge simba gulu. 6Ngono kowoti shule kwe makole mambo we burwa unowothama tjidumano na mambo we bunandzwa kuti mambo we bunandzwa alobole nkololokadzi wa mambo we burwa koga tjidumano itjetji atjitowotola tjibaka ngoti mu mazhuba iyawo nkololokadzi iwoyu ne balisi babe be bushe ne nlume uwe ne mwana uwe banowobulawa. 7Shule kwa ipapo mmwe we gamu lile unowotola bumambo. Ngono unowonginilila mambo we bunandzwa kose ne matizhilo awe ngono unowobakunda. 8Unowotapa midzimu yabo ye zwifano yabakazwithamigwa ne zwija zwe ntengo upezhugwi zwakathamwa nge siliva nge golide kazwiyisa ku Egipiti. Ngono unowotongo fadza mambo we bunandzwa kwe makole. 9Ngono mambo we bunandzwa unowonginilila mbuso we mambo we burwa, koga unowobgwilila ku shango iye.
10“Bakololo ba mambo we bunandzwa banowozhala bushongola bakakubunganya babhayani bakazwilulwamisila ngwa inowokuba se nkubila, bakagwa na mambo we burwa kunoti ku matizhilo awe. 11Ngono mambo we burwa unowozhalabo bushongola kabhuda kanogwa na mambo we bunandzwa ngono unowotapa babhayani babe basi bashoma. 12Ngono unowoti asinokunda mu ngwa iyeyi unowozhala mazwikudzo ngono kabulaya zwiwulu zwinjinji zwe bathu ngono koga aangabhudililile tjatjose, 13Mambo we bunandzwa unowodana babhayani bamwe kakale banji kupinda bekutanga ngono kowoti shule kwe makole unowobuya ne babhayani banjinji bana mathumo wose e ngwa manjinji.
14“Mu mazhuba iyawo bunji gowomukila mambo we burwa ne bathu banotjinya be batoleli banowobe pakati kwe bathu bakanyi kwenyu banowopanduka ngono ikoku kuli kuti mbono yawakabona izhadzisike koga banowokundiwa. 15Mambo we bunandzwa unowozha kabaka duluthulo lisi shoma kupoteleka nzi we matizhilo ngono katapa matizhilo iyawa. Babhayani babe bakashagwa bakasima abangatubule kuma mbeli kukwe. 16Ngono iye unozha kuwonginilila mambo we bunandzwa unowothama kuda ne kubona nge kukwe akuna unowomilana naye, ngono unowogala mu shango yakanaka kabe ne simba lose muili.
17“Mambo we bunandzwa unowopedzisa nkumbulo we kuti azhe ne simba le mbuso uwe wose ngono unowothama tjidumano tje mbakiso na mambo we burwa. Ngono unowon'lobodza nkololokadzi we bakadzi kuti ndizo akolomole mbuso we burwa koga mikumbulo iye aingatubuke kene kuli kumbhatsha. 18Kowoti kwajalo unoshandukila kuna be shango dzimu tjekelo dze gungwa katapa banjinji babo koga nlauli we ngwa we ntaya unowozha kamisa bhisepise le bushongola gugwe ngono bhisepise le bushongola gugwe mambo we bunandzwa unowolishandusila pezhugwi kukwe. 19Shule kwa ikoku unowoshanduka kalinga ku matizhilo e shango iye koga unowokong'wa kawa kukabe ilo bhelelo lile.
20“Koga unowotola mamo awe unowozhisa nkhethisi unowotshambilidza bathu banowokong'wa ngo dusa lukhetho bedusila zwe bushe gugwe. Koga kowoti mu makole asi mangana unowobe abulawa kusi nge bushongola kene mu ngwa.
Mambo mbiimbi we bunandzwa
21“Mambo we bunandzwa kowobe ne nthu wakabipa meya usakafanigwa nge kube mambo koga kowoti bathu batjakafala kazha kadzamula bushe nge bupitipiti. 22Babhayani abangagwisa kuma mbeli kukwe banowobulawa kose ne mpirisiti nkulu unowobulawabo. 23Kowoti asinothama tjidumano na bomambo bamwe ndiko kwaanotangisa kuthama bupitipiti ngono unowosima nge bathu basimuni koga. 24Unowoti paasakakumbugwa kanginilila mituthu yakafuma ngono kathama tjisakatongo thang'wa ne mmwe wa bobatategulu babe. Unowokoba kapaladza thundu yose yaatapa. Unowoluka gwanga kunginilila mizi ye matizhilo koga kowobe kwe tjibaka tjisimuni koga.
25“Unowozhala bushongola kasima moyo ngono kagwisa mambo we burwa nge babhayani banjinji kwazo, mambo we burwa unowommukila nge ngwa yakasima koga aatotubula kumilana naye ngobe banowobe banlukila gwanga. 26Naibabo bapejo naye ndibo banowontjinyidzila butjilo, babhayani babe banowotshwayiligwa kutjena bakabulawa, babhayani banjinji banowobulawa. 27Bomambo ibabo babili banowobe balizhele bubi benyepelana koga beja mu ndilo i nng'ompela ngono ikoku akutobabuzila tjimwe ngoti tjibaka tjakabigwa tjowobe tjisathu tjikazha. 28Mambo we bunandzwa unowobgwilila ku shango iye nge fumwa isi shoma koga meya dzidze idzo dzowobe dzakazwimisila kulobesa budumili gwe bathu be Ndzimu. Unowothama sekwa anoshaka kudwapo ekobgwilila ku shango iye.
29“Nge tjibaka tjakabigwa mambo we bunandzwa unowoshanduka kabgwilila ku burwa koga tjibaka tja ngwenu aatobe akasima se mu tjibaka tje kutanga. 30Baroma banowozha nge zwikepe kuwon'gwisa ngono unowobe nge kutja kapelegwa, ngono kashandukila bagalimoyo be Ndzimu kagwisa kubalobesa. Unowotola gumbuludzo la ibabo bakafupatila budumili. 31#Daniyele 9:27; 12:11; Matewu 24:15; Mako 13:14Bamwe babhayani babe banowozha ngono bakatemapadza Ng'umba ye Ndzimu ne matizhilo bakamisa zwibhayilo zwinopisiwa zwe mazhuba wose kakale bakabiga n'yila unotjenamisa.#11:31 n'yila unotjenamisa: Linga 9:27. 32Unowotjebela ibabo basingalondolodze tjidumano tjabo koga ibabo banoziba Ndzimu wabo banomililana naye. 33Kwe tjibaka batjenjedu banowotjenesela banji nenguba banowobulawa nge thumo kene bejiwa nge moto kene betapiwa bethan'gwa basungwa. 34Ngono badumili ibo abe dengadenga mu ngwa banowowana bhatsho. Banji banowozwishanganya nabo koga bamwe bana zwibili. 35Koga bamwe banowodengadenga kuti ndizo bangudziwe batjenapadziwe basale bali babuyanana kudza bhelelo le shango lizha, ngobe ilo izhuba lakabigwa ne Ndzimu. 36#2 Batesalonika 2:3, 4; Zumbunulo 13:5, 6Mambo unoshinga kuda kukwe. Unowozwikudza kazwibiga iye nkulu mu midzimu yose ngono unowolebela Ndzimu we midzimu zwithu zwisakatongo hwiwa mu shango. Unowobhudilila kudzina bushongola gwe Ndzimu gwa n'delukila koga sekwa kwakayi kowoshingikala. 37Aatobe ne hanya ne midzimu ya bobatategulu babe kene kuli kube ne hanya ne ndzimu unodiwa ne bakadzi, hwuti aatobe ne hanya ne midzimu mimwe koga unowozwituthumadza muili yose. 38Koga mu bumo gwayo unowobe ne hanya ne ndzimu unobakilila mizi ye matizhilo, ndzimu usakatongo zibgwa ndi bobatategulu babe kaukudza nge siliva ne golide nenge mabgwe e ntengo upezhugwi. 39Unowogwila matizhilo awe ngo shingisa bhatsho ye bathu banothigamila ndzimu we bataya. Unowokudza ibabo banonteta, kababiga mu mamo apezhugwi e butungamili ngono kabafupa nge kubakobela shango.
40“Ngono nge tjibaka itjetjo bhelelo lowobe latjiswika, mambo we burwa unowonginilila mambo we bunandzwa koga mambo we bunandzwa unowonginilila se tjampupudze ezha nge koloyi dze ngwa ne mbizi ne zwikepe zwinjinji. Unowonginilila shango dzili njinji kadzitutudzila kutjena se vula ye nkubila. 41Unowonginililabo shango yakanaka,#11:41 shango yakanaka: Kodwiwa shango Baiziraela yabakagadziwabgwe. kabulaya bathu bali banjinji koga shango dze Edomu ne Moabu ne malimbelimbe e Baamoni banowopudzumuka. 42Ngono unowonginilila shango njinji naiyo Egipiti dumbu aingapudzumuke. 43Unowokubulula golide ne siliva yose na zose zwe ntengo upezhugwi zwe Egipiti kakunda bose ne Libhiya ne Baitopiya. 44Koga thawu dzinodwa ku bhezhuba ne ku bunandzwa dzowon'totomosa kwazo ngono kazhala bushongola ne kupinda kabulaya bathu banjinji. 45Unowobambula nshasha we tante dze ntengo upezhugwi pakati kwe gungwa ne dombo lakanaka lakayengemala koga ndilo linowobe labe bhelelo lile akuna unowombhatsha.”
Kalanga Bible © Bible Society of Botswana, 2008, 2018.