Amosi 1
1
1 #
2 Bomambo 15:1-7; 2 Zwiyitikalo 26:1-23;
2 Bomambo 14:23-29
Awa matama a Amosi mmwe we balisi be Tekowa, ngekwe tjaakabona ngekwe Iziraela mu mazhuba a Mambo Uziya we Juda ne mu mazhuba a Mambo Jeroboamu nkololo wa Joashi we Iziraela, makole mabili mbeli shango isathu ikatengenyeka:
2 #
Jowele 3:16
“Yahwe banobomba kudwa mu Ziyoni,
hwi labo lohwika kudwa mu Jerusalema.
Mafulilo e balisi anokwakwalala,
pezhugwi kwe Dombo le Karimeli kowoma.”
Amosi unoleba ngosumikilisiwa kwe babakidzani be Iziraela
Siriya
3 #
Isaya 17:1-3; Jeremiya 49:23-27; Zakhariya 9:1 Yahwe banolebeleka bakati, “Ngekwe matjinyo akatathikana e bathu be Damasiko, andingashanduse shamu yangu, ngoti bakakwiya bathu be Giliyadi nge zwileyi zwe tshipi. 4Ndizo ndowotumila moto ku ng'umba ya Mambo Hazaele, ngono unowoja matizhilo a Bhenihadadi. 5Ndowokwamula zwiberabero zwe nkoba we Damasiko alobesa bagali be Nkuku we Aveni ne wakabhata ludozo gwe bushe mu Bhetedeni. Bathu be Siriya banowobe batapiwa ku Kiri.” Koleba Yahwe.
Filisitiya
6 #
Isaya 14:29-31; Jeremiya 47:1-7; Ezekiele 25:15-17; Jowele 3:4-8; Zefaniya 2:4-7; Zakhariya 9:5-7 Yahwe banolebeleka bakati, “Ngekwe matjinyo akatathikana e bathu be Gaza, andingashanduse shamu yangu, ngoti bakatapa bunji gwe bathu bakagupa Edomu. 7Ndizo ndowotumila moto ku mbako dze Gaza, moto unowoja matizhilo awo. 8Ndowolobesa nlauli we Ashidodi na iye wakabhata ludozo gwe bushe mu Ashikeloni. Ndowobhayana ne Ekironi ne malimbelimbe e Bafilisitiya anowoloba.” Koleba She Yahwe.
Tire
9 #
Isaya 23:1-18; Ezekiele 26:1—28:19; Jowele 3:4-8; Zakhariya 9:1-4; Matewu 11:21, 22; Luke 10:13, 14 Yahwe banolebeleka bakati, “Ngekwe matjinyo akatathikana e bathu be Tire, andingashanduse shamu yangu, ngoti bakatapa bunji gwe bathu bakagupa Edomu, ngono bakasikumbule bukamu gwabo. 10Ndizo ndowotumila moto ku mbako dze Tire, moto unowoja matizhilo awo.”
Edomu
11 #
Isaya 34:5-17; 63:1-6; Jeremiya 49:7-22; Ezekiele 25:12-14; 35:1-15; Obhadiya 1:1-14; Malaki 1:2-5 Yahwe banolebeleka bakati, “Ngekwe matjinyo akatathikana e bathu be e Edomu, andingashanduse shamu yangu, ngoti wakatatamila nkololo wa tate babe nge thumo, kasitongobe ne mahwilongoni, ngono kadzikila mu kugwadzamoyo kukwe kalambila mu bushongola gugwe tjose. 12Ndizo ndowotumila moto ku Temani, ngono unowoja matizhilo e Bhozira.”
Amoni
13 #
Jeremiya 49:1-6; Ezekiele 21:28-32; 25:1-7; Zefaniya 2:8-11 Yahwe banolebeleka bakati, “Ngekwe matjinyo akatathikana e bathu be Amoni, andingashanduse shamu yangu, ngoti mu ngwa dzabo dzekupaphidza migathu yabo, bakaviya bakadzi bakazwisenga mu Giliyadi. 14Ndizo ndowopisa nge moto mbako dze Rabha, moto unowoja matizhilo awo, kowobe ne mima inonga ye ngwa ne matutu, 15mambo wabo unowotapiwa, iye ne hadzasha dzidze.” Koleba Yahwe.
Kalanga Bible © Bible Society of Botswana, 2008, 2018.