Mishingo 25
25
Paulo unozwimimila kuna Mambo we Roma
1Kukati shule kwe mazhuba matatu Fesito aswika mu ntuthu uwe, katathila ku Jerusalema edwa ku Sizariya. 2Bapirisiti bakulu ne batungamili be Bajuta bakambudza milandu yabanotilika Paulo. 3Tjinyolotjo bakakumbila Fesito, kuti ababhatshe koga, kuti athame kuti Paulo ayisiwe ku Jerusalema, ngobe bakabe belulwamisila kuti alaligwe abulawe mu zila. 4Fesito kadabila eti, “Paulo umu ng'umba ye busungwa ku Sizariya, ngono imi nge kwangu ndowoyendako tjinyolotjo. 5Bamwe batungamili benyu ngabayende nami, ha kuli kuti kuna tjimwe tjibi nge kukwe, baswike bampe nlandu.”
6Kukati agala mazhuba ali zhanakadzi kene gumi nabo kadelukila ku Sizariya, ngono tjimuka kadana lubazhe kalaya kuti Paulo azhisiwe mbeli kukwe. 7Paulo kati ezha, Bajuta bakabe badeluka badwa ku Jerusalema bakama kumpoteleka beleba milandu yakabangalala nge kukwe, koga basingatubule kuitjenesa nge buzhalo. 8Ipapo Paulo kazwilebelekegwa eti, “Andizothama tjimwe tjakabipa ku nlayo we Bajuta kene Ng'umba ye Ndzimu kene kuna Kaisara.”
9Fesito kayemula kushathisa Bajuta kati kuna Paulo, “Unoshaka kuyenda ku Jerusalema kunosumikilisigwa milandu iyeyi mbeli kwangu kene?”
10Paulo kadabila eti, “Ndimile mbeli kwe lubazhe gwa Kaisara, pandakafanila kusumikilisiwapo. Akuna tjandakatjinya ku Bajuta, sekwa munoziba zubuyanana. 11Koga ha ili kuti ndi nlandu we kuthama tjimwe tjandakafanilo fila, anditolambo fa, ngono ha ili kuti milandu yandinobong'wa ne Bajuta ate ili malebeswa, akuna una simba le kundiyisa ku bali. Ndozwimimila kuna Kaisara!”
12Kukati Fesito alebeleka ne Gulukota lile kati, “Iwe wazwimimila kuna Kaisara, yenda kuna Kaisara!”
Paulo mbeli kwa Agiripa na Bherinisi
13Shule kwe mazhuba mashomanana mambo Agiripa na Bherinisi bakaswika ku Sizariya kuamutjila Fesito. 14Se bakagala mazhuba manjinji ikoko, Fesito kalebeleka ndebo ya Paulo na mambo. Kati, “Kuna nlume ipapa wakasiyiwa ndi Felikisi ali nsungwa. 15Ndakati ndili ku Jerusalema, bapirisiti bakulu ne bakulu be Bajuta bakazhisa milandu nge kukwe ngono bakakumbila kuti abong'we nlandu. 16Ndakababudza kuti ate kuli mpanga we Tjiroma kusunga nthu kene ali ani asathu kalingisana ne banombona nlandu ngono kawana tjibaka tje kuzwilebelekegwa ngekwe milandu yabanompa. 17Bakati bezha ngeno nami, andizotongo nonoka ngekwe ndebo koga ndakadana lubazhe tjimuka, alaya kuti nlume iwoyu azhisiwe. 18Batjeti babe bakati bemilika kulebeleka, bakasintjete nge kutjinya kwandakabe ndakakumbula. 19Koga, bakabe bana zwabasingadumane naye muzwili ngekwe kunamata kwabo, kakale ngekwe nlume wakafa unoyi Jesu wakabe Paulo esimisa eti unotjila. 20Ndakabe ndakadzimila ndisingazibe kuti ndingashakisisa tjini zwithu zwakajali; ndizo ndakambhuzwa kuti kene ungada kuyenda ku Jerusalema kunosumikilisigwa milandu iyeyi ikoko. 21Kukati Paulo ekumbila kuti atjengetegwe kuhwiwa ndi mambo, alaya kuti atjengetiwe kudzina ndintumila kuna Kaisara.”
22Ipapo Agiripa kati kuna Fesito, “Ndoshaka kuzwihwigwa nlume iwoyu imi.”
Kadabila eti, “Unowonhwa mangwana.”
23Tjimuka Agiripa na Bherinisi bakazha nge mazwikudzo ngono bakangina mu ng'umba ye bushanganilo bana bakulu be babhayani ne batungamili be nzi. Ndizo nge kulaya kwa Fesito Paulo kazhisiwa. 24Fesito kati, “Mambo Agiripa na bose banaswi, mobona nlume iwoyu! Itjaba tjose tje Bajuta tjakandikumbila nge kukwe mu Jerusalema na muno mu Sizariya bemimila beti aazotjafanilo tjila. 25Ndakawana kuli kuti aazotjinya tjimwe tjakalizana lufu, ngobe wakazwimimila kuna Kaisara, ndakabona kuti ndintumile ku Roma. 26Koga akuna itjo tje malebeswa tjandingakwalila she wangu nge kukwe. Ndizo ndanzhisa mbeli kwenyu mose, kwazo kwazo mbeli kwenyu, imwi Mambo Agiripa, nditi pamwe shule kwe kumbhuzwisisa ndingawana tjandingakwala. 27Ngobe ndobona kusakafanila kupitshila nsungwa mbeli kusingatjenesiwe milandu iye.”
Currently Selected:
Mishingo 25: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
