Mishingo 23
23
1Paulo kalingisisa Gulukota, ngono kati, “Zwikamu zwangu, hana yangu i mbuyanana ngekwe zila yandakatjila ndiyo mbeli kwe Ndzimu kuswikila zhuba lino.” 2Ngekwa ikoku Ntungamili we bapirisiti Ananiyasi kadwa bakabe bali mile pejo na Paulo kuti banlobe mu nlomo. 3#Matewu 23:27, 28Ipapo Paulo kati kunli, “Ndzimu unowoloba iwe, iwe guma lakadzulugwa butjena ndiwe! Apa ugele ipapo undisumikilisa nge nlayo, koga iwe nge kuko utjuluka nlayo nge kuti ndilobgwe!”
4Ibabo bakabe bali mile pejo na Paulo bakati, “Apa unotuka Ntungamili we bapirisiti we Ndzimu kene?”
5 #
Kufuluka 22:28
Paulo kati, “Zwikamu, ndabe ndisingazibe kuti ndiye Ntungamili we bapirisiti; ngobe kwakakwagwa kuyi, ‘Usilebe bubi ngekwe nlauli we bathu ba kanyi kuko.’ ”
6 #
Mishingo 26:5; Bafilipi 3:5 Paulo kati ebona kuti bamwe babo Basadusi koga bamwe Bafarasi kamilidzila hwi pezhugwi mu Gulukota kati, “Zwikamu, imi ndi Nfarasi, nkololo we Bafarasi. Ndosekesegwa kugalabgwe nenge kumuka kwe bafi!”
7Kati aleba ikoku kukabe ne zhoba pakati kwe Basadusi ne Bafarasi, ngono gubungano likabe ne kuthubukana pakati. 8#Matewu 22:23; Mako 12:18; Luke 20:27Basadusi banoti akuna kumuka mu bafi ne kuti akuna batumwa be Ndzimu kene Meya, koga Bafarasi banoti zwithu zose izwezwi zwiyapo. 9Kwakabe ne zhoba hwulu, ngono bamwe be badiyi be nlayo bakabe bali Bafarasi bakamilika, ngono bakakakabala kwazo beti, “Iswi atitobona nlandu mu nlume iwoyu. Meya kene ntumwa we kudzimu ha alebeleka nayeke?”
10Kukakabadzana kwakabe kwakabangalala kwakati Nkulu we babhayani katja kuti banowopalula Paulo. Kadwa babhayani kuti badeluke bankombeledze banzhise mu nzi we babhayani.
11Busiku igogo She bakama hwunde na Paulo, ngono bakati, “Ibe nge tjilopa! Sekwa wakapa butendeki nge kwangu mu Jerusalema wakafanila kunopabo butendeki ku Roma.”
Nlangano ngekwe butjilo gwa Paulo
12Mangwanana etjimuka Bajuta bakathama nlangano ngono bakazwisunga nge kutuna kuti basije kene kuli kung'wa kudzina bebulaya Paulo. 13Balume banopinda makumi manna (40) bakabe bali mu nlangano iwoyo. 14Bakayenda ku bapirisiti bakulu neku bakulu, ngono bakati, “Tatuna takalonga meya kusaja tjimwe kudzina tibulaye Paulo. 15Ndizoke ngwenu, imwi ne Gulukota, kumbilani Nkulu we babhayani kunzhisa mbeli kwenyu muti moshaka matama mamwe e malebeswa ngekwe ndebo iye. Takazwilulwamisila kumbulaya asathu kaswika ipapa.”
16Koga kukati nzekulu wa Paulo we tjilisana ehwa ngekwe nlangano iwoyo kangina mu nzi we babhayani, ngono kabudza Paulo. 17Ipapo Paulo kadana mmwe we balauli be babhayani bali zana kati, “Yisa mbisana iwoyu ku Nkulu we babhayani; una tjaanoshaka kumbudza.” 18Ndizo kansa ku Nkulu we babhayani ebe eti, “Paulo we nsungwa wandidana, ngono kandikumbila kuti ndizhise mbisana iwoyu kumuli, ngobe una tjaanoshaka kumubudza.”
19Nkulu we babhayani kabhata mbisana nge luboko, kamila naye ntome ngono kambhuzwa bali boga kati, “Ini tjaunoshaka kundibudza?”
20Kati, “Bajuta badumana kuti bamukumbile kuzhisa Paulo mbeli kwe Gulukota mangwana beti banoshaka matama mamwe e malebeswa nge kukwe. 21Musibadumile, ngobe balume banopinda makumi manna (40) babo bakanlalila mu zila. Batuna kuti abatowoja kene kuli kung'wa kudzina bambulaya. Bakazwilulwamisa ngwenu bamilile kuti mubadumile mu kukumbila kwabo.” 22Nkulu we babhayani kadwa nzhuzha kati ayende, ngono kantjemela eti, “Usibudze mmwe kuti wandibudza ikoku.”
Paulo unoyisiwa ku mbusi Felikisi
23Ipapo kadana babili be balauli be babhayani bali zana, kabadwa kati, “Lulwamisani goko le babhayani bali mazana mabili (200) ne balume bali makumi ali kutendeka (70) bakatatha mbizi ne balume bali mazana mabili (200) bakabhata mathumo, kuyenda ku Sizariya nge tjibaka tje buzhanalume busiku guno. 24Muwanile Paulo mbizi kuti atathe, kuti ndizo anoswika zubuyanana ku mbusi Felikisi.” 25Ngono kakwala lukwalo eti,
26“Ndimi Kilaudiyo Lisiyasi, kuna Mbilimangenje, Mbusi Felikisi, Dumiliso. 27Nlume iwoyu wakabhakhwa nge Bajuta, ngono bakabe bali pejo nge kumbulaya koga azha ne babhayani bangu an'gwila, ngobe ndakabe ndahwa kuti n'gali we Roma. 28Ndakabe ndishako ziba kuti ini bempa nlandu ndizo anzhisa ku Gulukota labo. 29Ndakawana ili kuti nlandu waanobong'wa wakalingisana nge nlayo wabo, koga kwakabe kusina nlandu wakalizana kuti afe kene alongwe mu ng'umba ye busungwa. 30Ndakati ndabudziwa ngekwe nlangano unoyitiwa ngekwe nlume iwoyu, antumila ku muli tjinyolotjo. Kakale ndakadwa banombona nlandu kuti bamubudze nlandu uwe.”
31Ndizo babhayani, ngolondolodza ndayo, bakayenda na Paulo busiku, ngono bakanzhisa ku Antipatirisi. 32Tjimuka babhayani banoyenda nge makumbo bakabgwilila ku nzi we babhayani, ngono bakaletja babhayani be mbizi kuyenda naye. 33Kukati babhayani banoyenda nge mbizi beswika mu Sizariya bakayisa lukwalo ku mbusi, na Paulo bakansa kunli. 34Mbusi kabala lukwalo, ngono kabhuzwa kuti unodwa ku ntuthu upi. Wakati ehwa kuti unodwa ku Silisiya 35kati, “Ndowokuhwilila ha banokubona nlandu baswika.” Ipapo kalaya kuti Paulo alisiwe ali mu ng'umba ya Herode ye bushe.
Currently Selected:
Mishingo 23: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
