Mishingo 21
21
Paulo unoyenda ku Jerusalema
1Tikati tathubukana nabo, tikayenda nge gungwa takatambunukila ku Kosi, tjimuka tikanoti ku Rodesi, kudwa ipapo tikayenda ku Patara. 2Takawana ikepe tjitjulukila ku Fenikiya tikatatha ngono tikayenda nge gungwa. 3Tikapinda nzi we Sipuro tili ku burwa tiwubonela kujana ngono tikadwilila tiyenda nge gungwa ku Siriya. Takadeluka ku Tire ikepe tjedu kwatjakabe tjakafanilo tula thundu yatjoko. 4Tikati tiwana badiyiwa ikoko, tikagala nabo mazhuba ali kutendeka. Nge Meya, bakakumbila Paulo kuti asipindile ku Jerusalema. 5Koga kukati mazhuba edu ikoko awila, tikadwilila mu zila yedu. Bagalimoyo bose ne bakadzi babo ne bana babo bakatidusa mu nzi, ngono ipapo mu phili dze gungwa tikatembezela tikawonekana. 6Kudwapo tikatatha ikepe, ngono ibo bakabgwilila kanyi.
7Takati tawidza gwendo gwedu kudwa ku Tire tikaswika ku Pitolemeo ngono takadumilisa zwikamu tikagala nabo zhuba ling'ompela. 8#Mishingo 6:5; 8:5Takapinda tjimuka tikanoti ku Sizariya ngono tikaswika ku ng'umba ya Filipo nsumikili mmwe we bali kutendeka tikagala naye. 9Wakabe ana bakololokadzi bali banna basakalobogwa bakabe belebesambeli. 10#Mishingo 11:28Tikati tagala ikoko mazhuba mashomanana, nlebesambeli unodang'wa Agabho kaswika edwa ku Judiya. 11Kazha ku tili, ngono katola mwandabula wa Paulo kazwisunga ndiwo maboko ne makumbo, ngono kati, “Meya yakayengemala ikati, ‘Nge zila iyeyi Bajuta be Jerusalema banowosunga mweni we mwandabula iwoyu, ngono banowompa Bezwitjaba.’ ”
12Tikati tihwa ikoku, iswi ne bathu bakabe bali ipapo tikakumbila Paulo kuti asiyende ku Jerusalema. 13Ipapo Paulo kadabila eti, “Apa ini mulila muhwisa moyo wangu zogwadza kene? Andizozwilulwamisila kusungwa koga, koga ne kufila ku Jerusalema ndakaguzwilulwamisila ndifila zina la She Jesu.”
14Kukati Paulo asingadumane naswi tikatoboka ngono tikati, “Kuda kwa She ngakuyitiwe.”
15Shule kwe mazhuba iyawa takazwilulwamisa, ngono tikatathila ku Jerusalema. 16Bamwe batobeli be ku Sizariya bakayenda naswi bakatiyisa ku nzi wa Munasoni kwatakabe takafanila gala. Wakabe ali nlume unodwa ku Sipuro kakale ali mmwe we badiyiwa be kutanga.
Paulo unoyenda kunobona Jakubo
17Takati tiswika ku Jerusalema, zwikamu zwikatiamutjila zubuyanana. 18Tjimuka, Paulo kayenda naswi kunobona Jakubo, ngono bakulu bose bakabe bali yapo. 19Paulo kabadumilisa, ngono kabika nge buzhalo kuti Ndzimu wakathamani pakati kwe Bezwitjaba nge kuushingila kukwe. 20Bakati behwa ikoku, bakakudza Ndzimu. Ipapo bakati kuna Paulo, “Ikamu Paulo unobona kuti zwiwulu zwingapani zwe bathu pakati kwe Bajuta zwagalamoyo? Ngono bose bakatukutilila kulondolodza nlayo. 21Bakabudziwa nge kuko kuti unodiya Bajuta bose banogala ne Bezwitjaba kufupatila Mushe, ubabudza kuti basithumbile bana babo kene kulondolodza tjilenje. 22Towothamani? Nge malebeswa banowohwa kuti wazha, 23#Mbalo 6:13-21ndizo shinga tjatinokubudza. Tina balume banna bakatuna. 24Tola balume ibaba uzwitjenapadze kang'ompela nabo ulipe tjinyikilo dzabo kuti misholo yabo itesegwe. Ipapo mmwe ne mmwe unowoziba kuti akuna malebeswa mu ndebo dzinolebgwa nge kuko ne kuti iwe unotjilila mu kuhwa nlayo. 25#Mishingo 15:29Koga ngekwe Bezwitjaba bakabe bagalimoyo takabatumila lukwalo tibabudza kuti takalebeleka tikapedza titi basitongo ja zojiwa zwakapiwa midzimu kene malopa kene phuka yakasiniwa nenge kuti bazwidzibe mu bupombgwe.”
26Tjimuka Paulo katola balume ibabo ngono kazwitjenapadza nabo. Ipapo kayenda ku Ng'umba ye Ndzimu kupa zibiso ye kuti mazhuba ekutjenapadziwa anowowila lini nenge kuti tjibhayilo tjithamigwe mmwe ne mmwe wabo.
Paulo wakabhakhwa mu Ng'umba ye Ndzimu
27Kukati mazhuba ali kutendeka abe pejo ngopela, bamwe Bajuta banodwa ku Ezhiya bakabe babona Paulo ku Ng'umba ye Ndzimu, bakadzonga mbunga wose, kakale bakambhata 28bemimila beti, “Balume be Iziraela, mutibhatshe! Oyu ndiye nlume unodiyila bathu bose ntome ngekwe bathu bedu ne nlayo wedu nenge bugalo igogu. Pezhugwi kwa ikoko, wakazhisa Bagiriki kabalonga mu Ng'umba ye Ndzimu, ngono bakatemapadza bugalo igogu gwakayengemala.” 29#Mishingo 20:4Bakabe batongo bona Tirofimo N'efeso ali mu nzi ana Paulo, ngono bakaalakana kuti Paulo wakabe anzhisa ku Ng'umba ye Ndzimu.
30Nzi nkulu wose ukadzongeka, ngono bathu bakazha bose bakalabuka. Bakabhata Paulo ngono bakankakatila kuzhe kwe Ng'umba ye Ndzimu, ngono tjinyolotjo mikoba ikazhaligwa. 31Bakati batjagwisa kumbulaya, matama ekuti nzi wose we Jerusalema wapanduka kaswika ku Nkulu we babhayani be Roma. 32Tjinyolotjo katola babhayani ne balauli be babhayani bali zana ngono bakalabukila ku mbunga. Kukati bapanduki bebona Nkulu ne babhayani bakamisa kuloba Paulo. 33Nkulu we babhayani kazha kansunga, ngono kati asungwe nge ketani mbili. Ipapo kabhuzwa kuti ndiani nenge kuti watjinyani. 34Bamwe mu mbunga bakamimila beleba tjimwe, koga bamwe belebabo tjipoga, ngono Nkulu we babhayani kasitubule kuhwa malebeswa nge zhoba, kalaya kuti Paulo ayisiwe ku nzi we babhayani. 35Paulo kati eswika pa datho kudzongeka kwe mbunga kwakabe kuli kukulu kwaakadzina kasengwa nge babhayani. 36Mbunga wakatobela ukadwilila mbeli umimila uti, “Mumbulaye!”
Paulo wakazwileba mbeli kwe Nkulu we babhayani
37Kukati babhayani babe pejo ngolonga Paulo mu nzi we babhayani, kabhuzwa Nkulu we babhayani kati, “Apa ndingaleba tjimwe nawe?”
Kadabila eti, “Unoziba Tjigiriki kene? 38Apa ate iwe N'egipiti wakatangisa bupanduki, ngono kabe ntungamili we bapanduki be babulayi bali zwiwulu zwili zwinna (4 000) ku tjilambanyika mazhuba akapinda kene?”
39Paulo kadabila kati, “Imi ndi Njuta, unodwa ku Taso mu Silisiya, ndili n'gali we nzi wakalumba. Ndokumbila kuti mundiletje ndilebeleke ne bathu.”
40Paulo kati adumigwa nge Nkulu we babhayani kama mu datho ngono kanyaladza bose nge maboko awe, kukati kwabe ne kunyalala kukulu kati ku bali nge Tjihebheru:
Currently Selected:
Mishingo 21: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
