Mishingo 17

Mu Tesalonika

1Paulo na Silasi bakayenda bakapinda ne mu Amfipoli ne Apoloniya bakaswika ku Tesalonika, iko kwakabe kuna ng'umba ye mitembezelo ye Bajuta. 2Se wolobela kukwe Paulo kayenda ku ng'umba ye mitembezelo. Kagala tshipi thatu enyanyayidzana nabo ngekwe hwalo, ebala 3etjenesa Hwalo dze Ndzimu elakidza mudzili kuti Mesiya wakabe akafanila kudziyila ne kumuka mu bafi. Paulo kati, “Jesu iwoyu wandinoleba nge kukwe kumuli ndiye Mesiya.” 4Bamwe babo bakahwisisa, ndizo bakama na Paulo na Silasi; ne bafumakadzi bana mamo banjinji ne Bagiriki banjinji bakabe benamata Ndzimu.

5Koga Bajuta bakabe ne ndandala, ngono bakakubunganya bamwe bathu basibe tjimwe mu dzizila bakabumba mbunga. Bakadzonga nzi wose, ngono bakangina mu nzi we nlume wakabe edang'wa Jasoni, beti banowowana Paulo na Silasi kuti babazhise ku bathu. 6Koga bakati babasheta, bakazuzuta Jasoni ne zwimwe zwikamu bakabayisa mbeli kwe babusi be nzi bemimila beti, “Ibaba balume bakadzonga pamwe ne pamwe! Ngwenu batjizhabo ngeno, 7ngono Jasoni wakabagadza mu ng'umba iye. Bose banotjuluka milayo ya Kaisara, beti kuna mmwe mambo, unoyi Jesu.” 8Bathu ne balauli be nzi bakadzongeka ha behwa ikoku. 9Balauli bakalipisa Jasoni na ibabo bamwe, themba ye mari inoshakika kuti basunungugwe, ndizo bakabaletja bakayenda.

Mu Bhereya

10Kukati kube busiku, zwikamu zwikanyelusila Paulo na Silasi ku Bhereya. Bakati beswika bakayenda ku ng'umba ye mitembezelo ye Tjijuta. 11Bathu baikoko bakabe bakashaladuka kupinda Batesalonika. Bakaamutjila dama nge mazwihwo abo wose, ngono mazhuba wose bakabe belingisisa mu Hwalo dze Ndzimu kubona kene tjadiyiwa ndi Paulo tjili malebeswa. 12Bunji mubali bakagalamoyo; ne bakadzi be Tjigiriki banjinji bana mamo ne balume banjinji be Tjigiriki na ibo bakagalamoyo. 13Koga Bajuta mu Tesalonika bakati behwa kuti Paulo wakasumikilabo dama le Ndzimu mu Bhereya, bakazha ikoko bakatangisa kudzonga bathu. 14Tjinyolotjo zwikamu zwikadusa Paulo kayenda ku gungwa; koga Silasi na Timoti bakasala mu Bhereya. 15Balume bakabe bepelekedza Paulo bakayenda naye kunoti mu Atene ipapo bakashandukila ku Bhereya ne ndayilo inodwa muna Paulo kuti Silasi na Timoti bantobele tjinyolotjo.

Mu Atene

16Paulo kati atjakamilila Silasi na Timoti mu Atene meya iye ikakodzongeka mukati kukwe ha ebona nzi sekwa uli zhele midzimu. 17Ndizo kalebesana ne Bajuta ne Bezwitjaba banonamata Ndzimu mu ng'umba ye mitembezelo ne mu lubazhe mazhuba wose elebeleka ne bathu banopinda zwabo. 18Badiyi bamwe be zwidiyo zwe Tjiepikuri#17:18 Tjiepikuri: Zwidiyo zwa Epikuri wakafa 270 Kirisiti asathu kazwagwa, N'giriki we ntjenjeli nkulu wakabe ediya kuti shatho nditjo tjithu tjikulu mu butjilo. Batobeli ba Epikuri bakabe bedang'wa kuyi Baepikuri (Mishingo 17:18). ne be zwidiyo zwe Tjisitoiki#17:18 Tjisitoiki: Zwidiyo zwa Zeno wakafa nge gole la 265 Kirisiti asathu kazwagwa, N'giriki we ntjenjeli nkulu, wakabe ediya kuti shatho inowang'wa nge nthu usingatjatatane nge mizipo kakale asingatje kuhwisiwa zogwadza. bakanyanyayidzana naye. Bamwe babo bakabhuzwa beti, “Nlebanyi iwoyu katini?”

Bamwe bakadabila beti, “Unonga unoleba ngekwe midzimu ipoga.” Bakaleba ikoku, ngobe Paulo wakabe esumikila ngekwa Jesu nenge kumuka mu bafi. 19Ndizo bakatola Paulo bakanzhisa pa lubazhe gwe nzi iwoyo gunoyi Areopago, ngono bakati, “Toshaka kuziba kudiya ikoku kutshwa kwaunoleba nge kwako. 20Zwithu zwatinohwa uzwileba zwitshwa mutili, ngono toshaka kuziba kuti zodwani.” 21Bathu bose be Atene ne bataya bakabe begala ikoko bakapitsha tjibaka tjabo beleba kene behwilila tjimwe tjitshwa.

22Paulo kama pakati kwe lubazhe gwe Areopago kati, “Ndobona kuti mu zila dzose imwi Baatene mu banamati. 23Ngobe ndati ndipalama nzi wenyu ndilinga magalo amunonamata, ndawana tjibeso tjakakwagwa kuyi, ‘Ku Ndzimu usingazibgwe.’ Itjetjo tjamunonamata, nenguba musingatjizibe, nditjo tjandinoleba kumuli nge kwatjo ngwenu. 24#1 Bomambo 8:27; Isaya 42:5; Mishingo 7:48Ndzimu iwo wakathama shango ne tjimwe ne tjimwe tjimuili, ndi She we kudzimu ne shango, ngono autogala mu ng'umba dze mitembezelo dzakathamwa nge nthu, 25kene kuli kushaka tjimwe tjatingaunamata nge kuushingila, se uli iwo unopa butjilo ne meya inofemiwa ne tjimwe ne tjimwe ku mmwe ne mmwe. 26Wakathama zwitjaba zose kudwa mu nthu nng'ompela kuti bagale mu shango yose. Iwo nge kwawo wakabiga kale misi ne migathu ye magalo kwabanowogala. 27Wakathama ikoku kuti ndizo baushake, kuti pamwe bangaambamba bakauwana. Nenguba Ndzimu usi kule kule ne mmwe ne mmwe wedu ngoti; 28‘Muuli totjila tikayenda tikabepo.’

“Koga sekwa kalebgwa nge batetembeli bamwe benyu beti, ‘Nge malebeswa ti bana bawo.’

29“Se tili bana be Ndzimu, tisikumbule kuti mbumbiko yawo inonga ye tjifano tjakathamwa nge golide kene siliva kene bgwe, tjithamwa nge bunyambi ne njalakang'wa dze nthu. 30Misi ye kusaziba Ndzimu wakailinga ukaitjuludza mesho, koga ngwenu unolaya bose kumwe ne kumwe kuti bashandukile matjinyo abo. 31Ngobe wakabiga zhuba launowosumikilisa shango yose nge ndulamo nge nlume wawakashalula. Wakalakidza malebeswa a ikoku ku mmwe ne mmwe nge kumusa nlume iwoyo mu bafi!”

32Bakati behwa Paulo eleba ngekwe kumusiwa kwe bafi, bamwe babo bakanseka mahanya, koga bamwe bakati, “Toshaka kukuhwa ulebeleka ngekwa ikoku kakale.” 33Ndizo Paulo kadwa mubali. 34Koga bamwe balume bakabhatana naye, ngono bakagalamoyo, pakati kwabo kwakabe kuna Diyonisiyo we N'areopago;#17:34 N'areopago: Mmwe we Areopago. ne mmwe nkadzi edang'wa Damarisi ne bamwe.

Currently Selected:

Mishingo 17: KBTP

Highlight

Compare

Copy