3 Johani 1
1
Matama e kutanga
1 #
Mishingo 19:29; Baroma 16:23; 1 Bakorinta 1:14 Ndimi nkulu we gubungano.
Ku n'diwa wangu Gayo, wandinoda nge malebeswa.
2N'diwa, ndotembezela kuti kose kukuyendile zubuyanana ne kuti ube ne mamuko koga sekwa wakalulwama mu tjimeya. 3Ndakashatha kwazo pakaswika zwimwe zwe zwikamu, ngono zwitendeka ngekwe malebeswa e butjilo gugo, dumbu sekwa utobela malebeswa. 4Akuna kumwe kushatha kunopinda ikoku kwandingabe nako, ndihwa kuti bana bangu banotobela malebeswa.
Gayo unokudziwa
5N'diwa, unothama zubuyanana ha ubhatsha zwikamu, nenguba zwili bazhi, 6bakabudza gubungano le Ndzimu ngekwe ludo gwenyu mu lili. Unowobe uthama zubuyanana ha ubatuma nge zila inodiwa nge Ndzimu. 7Bakati beyenda kunoshinga nshingo wa Kirisiti, bakasidume kuamutjila tjinodwa ku bathu basi bagalimoyo. 8Ndizo takafanila kubhatsha balume bakajalo, kuti tishanganyile nabo mishingo yabo ye malebeswa.
Diyotirefesi na Demetiriyo
9Ndakwalila tjimwe ku gubungano le Ndzimu, koga Diyotirefesi, iye unoda kuzwitungamidza, aana hanya ne bukulu gwedu aatotiamutjila. 10Ndizo ndowoti, ndizha ndowolebeleka ngekwe tjaanothama, etitilika nlandu nge manyepkhwa. Naiko ikoku akuton'gadzamoyo, ndizo aatoamutjila zwikamu, kakale unodzibisa ibabo banobe beshaka kuamutjila zwikamu, ebuya ebatata mu gubungano le Ndzimu.
11Badiwa, musiyedze bubi, koga yedzani ndulamo. Iye unothama ndulamo nge we Ndzimu. Iye unothama bubi aazobona Ndzimu.
12Mmwe ne mmwe wakapa butendeki gunoma na Demetiriyo, ngono ne malebeswa anoma naye. Naswibo totendeka nge kukwe, ngono moziba kuti butendeki gwedu malebeswa.
Matama e bupelo
13Ndina zwithu zwinjinji zwandinoshaka kumukwalila nge kwazo, koga anditowomukwalila nge kwazo nge peni ne inki. 14Ndizo ndogalabgwe kumubona tjinyolotjo, ngono towolebeleka takalingisana.
15Mbakiso ngaibe namwi.
Bazwalani banomudumilisa. Dumilisani bazwalani, mmwe ne mmwe wabo.
Kalanga Bible © Bible Society of Botswana, 2008, 2018.