2 Batesalonika 3
3
Mutitembezelele
1Tjebupelo zwikamu, mutitembezelele kuti dzene tshene dama la She lingaandama tjinyolotjo, likakunda, sekwa lakathama mu muli. 2Kakale mutembezele kuti dzene tingasunungugwa mu bathu bakabipa ne babi, ngobe ate mmwe ne mmwe unogalamoyo.
3Koga She banogalikabgwe, ndizo banowomusimisa bakamubakilila mu bubi. 4Todwilila tigalabgwe mu muli muna She, kuti mowodwilila muthama zwithu zwatinomutuma.
5Dzene tshene She bangalingisa mimoyo yenyu ku ludo gwe Ndzimu ne mukudzikitadza kwa Kirisiti.
Mmwe ne mmwe wakafanila shinga
6Muzina la She wedu Jesu Kirisiti, tomulaya zwikamu, kuzwidusa mu ikamu tjimwe ne tjimwe tje simbe kakale tjisingatjile kuyendidzana nge kudiya kwamakaamutjila mutili. 7Ngobe imwi nge kwenyu moziba kutobela tjilakidzilo tjedu. Takabe tisisimbe ti namwi, 8kakale akuna watakajila zojiwa zwizwe tisalipa. Koga takashinga siku ne sikati, tishinga titukutila kuti ndizo tisibe ntolo kummwe wenyu. 9Takathama ikoku kusi kuti atina fanilo mu bhatsho iyeyi, koga takabe tizwithama tjilakidzilo kumuli tjamungatobela. 10Ngobe ne ti namwi, takamupa ndayo iyeyi, “Ha nthu asingashinge aatowoja.”
11Tohwa kuyi bamwe pakati kwenyu ndi bomashwaushingani, abatoshinga; tjabanoziba koga hwunginikana nge zwithu zwe bamwe. 12Bathu bakajalo tobalaya kakale tobakulumbidza muna She Jesu Kirisiti kuti badzikame bashingile zojiwa zwabanoja.
13Ngono imwi, zwikamu, musitongo nyadziwa ngoshinga tjakalulwama. 14Ha mmwe asingahwe ndayo yedu mu lukwalo igogu, munlonge zhisho. Musishingidzane naye, kuti ndizo abhakhwe nge shoni. 15Musintole se tjita koga muntjemele se ikamu.
Matama e bupelo
16Ngwenu dzene tshene She we mbakiso nge kukwe angamupa mbakiso mu zwibaka zose nenge mu zila dzose. She ngababe namwi mose.
17Imi Paulo ndozwikwalila nge luboko gwangu dumiliso iyeyi, ngono ikoku ndigo lutjwayo gwe lukwalo gwangu gumwe ne gumwe. Ndiko sekwa ndinokwala.
18Dzene tshene ngoni dza She wedu Jesu Kirisiti dzingabe namwi mose.
Kalanga Bible © Bible Society of Botswana, 2008, 2018.