2 Samuele 24
24
Dafite unobala bathu
(1 Zwiyitikalo 21:1-27)
1Yahwe bakazhala bushongola kakale ngekwe Iziraela bakakulumbidza Dafite ngekwabo beti, “Yenda unobala bathu be Iziraela ne be Juda.” 2Ndizo mambo kadwa Joabu ne balauli be babhayani kati, “Yendani mungine mu njudzi dzose dze Iziraela, kudwa ku Dani kunoti ku Bheerisheba ubale bathu bose, kuti ndizibe kuti bangana.”
3Koga Joabu kadwa mambo kati, “Dzene Yahwe Ndzimu wenyu bangapaphidza bathu kwakatathikana kungabe ka zana (100) kupinda kwe tjilizanyu tjabali itjo, ngono dzene kungashingikala tetshi wangu mambo batjatjila. Apa ini tetshi wangu mambo mushaka kuti bathu babagwe?” 4Koga dama la mambo likadodomela muna Joabu ne balauli be babhayani. Ndizo Joabu ne balauli be babhayani bakayenda bedwa pana mambo kunobala bathu bose be Iziraela.
5Bakatjulukila seli kwe Jorodani bakanotangisa kudwa mu Aroeri ne mu nzi nkulu upakati kwe nkuku, kuyendila ku Gadi kunoti ku Jazeri. 6Bakanoswika ku ntuthu we Giliyadi ne ku Kadeshi mu ntuthu we Bahiti, ku ntuthu we Kadeshi, bakazha ku Dani, kudwa mu Dani bakanoswika ku Danijaani bakapoteleka bakanoti ne ku Sidoni. 7Ngono bakaswika ku dizhilo le Tire ne mizi yose mikulu ye Bahivi ne Bakanana, bebuya bebhudila ku burwa gwe Juda ku Bheerisheba. 8Ndizo shule kwe mwedzi ili zhanalume ina mazhuba ali makumi mabili (20), bakashanduklila ku Jerusalema basinopoteleka shango yose. 9Bakabikila mambo mbalo ye balume bose bakazwilizanila kugwa: Bakabe bali zwiwulu zwili mazana ali zhanakadzi (800 000) mu Iziraela ne bali zwiwulu zwili mazana ali mashanu (500 000) mu Juda.
10Dafite kalobgwa nge hana asinobe abala bathu. Ngono Dafite kati kuna Yahwe, “Ndatjinya kwazo muna tjandathama. Koga Yahwe, ndomukumbila nditi, dusani jinyo le nlanda wenyu, ngobe ndakathama bulengwe.” 11Kukati Dafite emuka tjimuka, dama la Yahwe likazha ku nlebesambeli Gadi, mboni wa Dafite liti, 12“Yenda unodwa Dafite uti, ‘Yahwe banolebeleka bakati, “Ndokupa zwithu zwili zwitatu, uzwishalulile tjing'ompela tjandingakuthamila itjo.” ’ ” 13Ndizo Gadi kayenda kuna Dafite kambudza tjalebgwa ndi Yahwe, ebuya embhuzwa eti, “Ndikupi kwaunozwishalulila mu butatu gwazo? Wuti kuzhe makole ali kutendeka etobedzana kuli bhamba mu shango iyo, kene mimwedzi mitatu utizha zwita zwizo zwakakutatamila, kene mazhuba matatu e bugwele mu shango?” 14Ndizo Dafite kashandula Gadi eti, “Ndomanikana kwazo, ngatiwile mu luboko gwa Yahwe ngoti ibo bana ngoni hwulu, koga tisiwile mu maboko e nthu.” 15Ndizo Yahwe bakazhisa bugwele mu Iziraela kudwa mu mangwanana kunoti mu tjibaka tjakabe tjabigwa. Kukafa bathu bali zwiwulu zwili makumi ali tendeka (70 000) kudwa mu Dani kunoti ku Bheerisheba. 16Kukati ntumwa we kudzimu atjimilidzila luboko gugwe ku Jerusalema ku ulobesa, Yahwe bakabuza moyo, bakadwa ntumwa we kudzimu wakabe elobesa bathu bakati, “Kwagala, tjishandusa luboko gugo!” Ntumwa wa Yahwe wakabe abe pa lutombo gwa Arauna we Njebusi. 17Kukati Dafite ebona ntumwa we kudzimu wakabe ebulaya bathu kadwa Yahwe kati, “Bonani, ndimi ndakatjinya, ndakathama kwakabipa pkhwizi idzedzi idzo dzakathamani kene? Ndomukumbila ngakulobgwe imi ne nsha wangu.”
18Mu zhuba ilelo Gadi kayenda kuna Dafite kandwa kati, “Tathila pezhugwi unobakila Yahwe tjibeso tjinopisigwa zwibhayilo mu lutombo gwa Arauna we Njebusi.” 19Ndizo Dafite wakahwilila Yahwe kanothama sekwa adwiwa ndi Gadi. 20Kukati Arauna elinga pasi, kabona mambo ne balanda babe bezha kunli, ngono Arauna kabashanganidza kawa nge zwidwi kakotamisa nsholo mbeli kwa Dafite. 21Arauna kabhuzwa eti, “Ini tetshi wangu mambo mazha ku nlanda wenyu?” Dafite kadabila eti, “Ndawotenga lutombo gugo kuti ndibakile Yahwe tjibeso tjinopisigwa zwibhayilo mu guli, kuti magwadzi apele mu bathu.”
22Arauna kashandula Dafite eti, “Tetshi wangu mambo bangatola tjipo tjabanowobe bebona tjakabalulwamila, mangabe ahwa, ne zwileyi ne majokwe e mangabe zwingabesiwa kuthama moto.” 23Arauna kabe eti kuna mambo, “Zwithu zose izwezwi ndomupa izo, dzene Yahwe Ndzimu wenyu, banga amutjila tjibhayilo tjenyu.”
24Koga mambo kadabila Arauna eti, “Aa, ndowotjilipa, andingaduse tjipo tjinopisiwa ndipa Yahwe Ndzimu wangu ndisalipa tjimwe.” Ndizo Dafite katenga lutombo ne mangabe nge shekele dze siliva dzili makumi mashanu (50). 25Dafite kabakila Yahwe tjibeso tjinopisigwa zwibhayilo. Kadusa tjibhayilo tjinopisiwa ne tjibhayilo tje mbakisano. Yahwe bakadabila kutembezela kukwe ne magwadzi kama mu Iziraela.
Kalanga Bible © Bible Society of Botswana, 2008, 2018.