2 Samuele 21
21
Bana be bana ba Saulo banobulawa
1Ipapo mu mazhuba a Mambo Dafite, kukabe ne bhamba kwe makole matatu etobedzana, ngono Dafite kabhuzwa kuna Yahwe. Ngono Yahwe bakashandula beti, “Ndingekwe nlandu we lopa lakatebugwa ndi Saulo ne be nsha uwe, ngobe wakabulaya Bagibiyoni.” 2#Joshuwa 9:3-15Ndizo mambo kadana Bagibiyoni kuwolebeleka nabo. (Ipapo Bagibiyoni bakabe basi be bamwe be Baiziraela, koga bakabe bali malimbelimbe e Baamori, bakati bathu be Iziraela bakabagadzabgwe kubatjidza, koga Saulo kashoko balobesa mu kushingayilila bathu be Iziraela ne be Juda kukwe). 3Ndizo Dafite kabhuzwa Bagibiyoni kati, “Ini tjamunoda kuti ndimuthamile itjo? Ndimufupe ngeni kuti mukombolele thaka ya Yahwe.” 4Bagibiyoni bakanshandula beti, “Atina fanilo dzekushaka siliva kene golide kuna Saulo kene kuna be nsha uwe, naiko akuteli mutili kuti tingabulaya mmwe nthu mu Iziraela.” Mambo kabhuzwa kati, “Ngono mukati ndimuthamileni?” 5Bakadwa mambo bakati, “Iye nlume wakatipaladza ebuya etilukila gwanga kutilobesa, kuti ndizo tishaye bugalo mu mituthu yose ye Iziraela, 6mutipe bana be bana babe be tjilume bali kutendeka, kuti ndizo tibabulaye nge kubalembeledza mbeli kwa Yahwe ku Gibiyoni ya Saulo mu dombo la Yahwe.” Mambo kabadwa kati, “Ndowomupa ibo.”
7 #
1 Samuele 20:15-17; 2 Samuele 9:1-7 Koga mambo kasiya Mefibosheti mwana we mwana wa Saulo wa Jonatani, ngekwe kutuna kuna Yahwe kwakathamwa ndi Dafite na Jonatani nkololo wa Saulo. 8#1 Samuele 18:19Mambo katola bakololo babili ba Rizipa nkololokadzi wa Aiya waakazwala na Saulo, Arimoni na Mefibosheti ne bali bashanu ba Merabhu nkololokadzi wa Saulo waakazwala na Adiriele nkololo wa Bharizilai we N'meholati. 9Dafite kabalonga mu maboko e Bagibiyoni, bakabasungilila pezhugwi kwe dombo mbeli kwa Yahwe, bakafa bose butendeka gwabo. Bakabulawa mu tjibaka tjekuvuna mu mazhuba e kutanga kuvungwa bhali.
10Kudwa ipapo Rizipa nkololo wa Aiya katola jila le saka kaliwala pa lutombo, kudwila kutangisa kwe kuvung'wa kudzina vula izha ina pezhugwi kwe zwitumbu, wakatata nyuni masikati ne zwibandana busiku kuti zwisitongoja zwitumbu.
11Kukati Dafite abudziwa tjathamiwa ndi Rizipa nkololokadzi wa Aiya nkadzi wa Saulo, 12#1 Samuele 31:8-13Dafite kayenda kanotola mafupa a Saulo ne e nkololo uwe Jonatani ku bathu be Jabeshi mu Giliyadi, bakabe babakwiba mu lubala gwe Bhetishani, pakabe Bafilisitiya basungilila zwitumbu pezhugwi kwe Dombo le Gilibhowa. 13Dafite kanozha ne mafupa a Saulo ne mafupa e nkololo uwe Jonatani, bebe bekubunganya mafupa a ibaba babakabe basungilila 14Ndizo bakabiganya mafupa a Saulo ne e nkololo uwe Jonatani mu shango ya Bhenjamini mu Zela, mu ikumbu tja Kishi tate babe, bakathama kose kwakabe kwalebgwa ndi mambo. Shule kwa ikoku Yahwe bakadabila mitembezelo yabo bekumbilila shango.
Ngwa ne Bafilisitiya
(1 Zwiyitikalo 20:4-8)
15Kukabe ne ngwa kakale pakati kwe Bafilisitiya ne Iziraela, ngono Dafite kayendabo ne babhayani babe, bakagwa ne Bafilisitiya, ngono Dafite kanyala kwazo. 16Ipapo Ishibhenobho mmwe we bakololo be makwelemba wakabe ana thumo linolema kwe shekele dzili mazana matatu (300) e phangula, kakale akadedela bukanu butshwa, ekumbula kubulaya Dafite. 17#1 Bomambo 11:36; Njimbo 132:17Koga Abishayi nkololo wa Zeruya kazha kan'gwila, kaloba Nfilisitiya kambulaya. Ndizo babhayani ba Dafite bakatuna beti, “Musitjabe mubhuda naswi akuyendiwa ku ngwa, kuti ndizo luvone gwe Iziraela gusidzime.”
18Shule kwa ikoku kukabe ne imwe ngwa ne Bafilisitiya ku Gobu, Sibhekayi we Nhushahi kabulaya Safu, wakabe ali mmwe we bakololo be makwelemba.
19Kukabe ne imwe ngwa kakale ne Bafilisitiya ku Gobu, Elihanani nkololo wa Jaareoregimu we Nbhetelehema, kabulaya Goliati we N'giti wakabe ana thumo lina mpini nkodu se nsemo we mutjini unoluka.
20Kukabe ne imwe ngwa kakale ku Gati, kwakabe kuna nlume wakakulila pezhugwi, ana zwinyala zwili zwitathatu mu luboko gung'ompela, ne zwitathatu zwe gumbo ling'ompela, zose zwili makumi mabili ana zwili nna (24), na iyebo wakabe ali we bakololo be makwelemba. 21Wakati edadila Iziraela, Jonatani nkololo wa Shimeyi, nnung'una wa Dafite kambulaya.
22Bunna igogu bakabe bali bakololo banodwa mu makwelemba e Gati, ngono bakafila mu maboko a Dafite ne mu maboko e babhayani babe.
Kalanga Bible © Bible Society of Botswana, 2008, 2018.