2 Samuele 2
2
Dafite unobigwa mambo we Juda
1Shule kwa ikoku Dafite wakabhuzwa Yahwe eti, “Apa ndiyende ku mmwe we mizi mikulu ye Juda kene?” Yahwe bakan'dabila beti, “Yenda.” Dafite kabhuzwa eti, “Ndiyende kuna upi nzi?” Yahwe bakabe beti, “Ku Heburoni.” 2#1 Samuele 25:42, 43Ndizo Dafite katathilako, kayenda ne bakadzi babe babili, Ahinoami we N'jezerele na Abigaile tjilikadzi ya Nabali we N'karimeli. 3Dafite wakazha ne balume baakabe anabo, mmwe ne mmwe ne nsha uwe, ngono bakagala mu mizi ye Heburoni. 4#1 Samuele 31:11-13Ndizo balume be Juda bakazha, ngono bakazhodza Dafite kube mambo we ludzi gwa Juda.
Bakati bebudza Dafite beti, “Balume be Jabeshi Giliyadi ndibo bakabiganya Saulo.” 5Dafite katuma batumwa ku balume be Jabeshi Giliyadi, kuti babadwe bati, “Yahwe ngaba mukombolele ngobe makalakidza buthu igogu muna Saulo tetshi wenyu nge kumbiganya! 6Ngono ngwenu Yahwe ngababe ne lubu kumuli ne malebeswa, ngono namibo ndowomuthamila bubuya ngobe mathama kuthu ikoku. 7Ngono ngwenu simani mube ne tjilopa, ngobe Saulo tetshi wenyu wafa, ngono nsha wa Juda wandizhodza kube mambo wabo.”
Ishibosheti wabigwa mambo we Iziraela
8Koga Abineri nkololo wa Neri nlauli we babhayani ba Saulo wakatola Ishibhosheti nkololo wa Saulo, kanzhisa ku Mahanayimi. 9Kambiga mambo we Giliyadi ne Baashuri ne Jezirele ne Ifureimi ne Bhenjamini newe Iziraela yose. 10Ishibhosheti, nkololo wa Saulo, wakabe ana makole ali makumi manna (40) ha etangisa kubusa Iziraela, ngono wakabusa makole mabili. Koga be ludzi gwa Juda guka tobela Dafite. 11Tjibaka tjakatogwa ndi Dafite ali mambo mu Heburoni ebusa ludzi gwa Juda makole ali kutendeka ana mimwedzi ili mitathatu.
Ngwa ye Iziraela ne Juda
12Abineri nkololo wa Neri ne balanda ba Ishibhosheti nkololo wa Saulo, bakabhuda mu Mahanayimi beyenda ku Gibiyoni. 13Joabu nkololo wa Zeruya ne balanda ba Dafite, bakabhuda bakanobashangamidza ku dziba la Gibiyoni. Goko limwe lakagala ku ndzibo mmwe we dziba, limwe likagala ku ndzibo mmwe we dziba. 14Abineri kati kuna Joabu, “Bazhuzha ngabamilike bagwisane mbeli kwedu.”
Joabu kabe eti, “Kwakalulwama, ngabamilike.”
15Ndizo bakamilika bakapinda bebagwa, bali gumi lina babili (12) ba Bhenjamini kuna Ishibhosheti nkololo wa Saulo, ne balanda ba Dafite bali gumi lina babili (12). 16Mmwe ne mmwe wakabe ezhwabula wakalingisana naye nge mavudzi ebe embhaya nge thumo mu mbadu, ndizo bakawila pasi bakafa bose. Pathu ipapo mu Gibiyoni pakabe kodang'wa Helikatihazurimu. 17Mu zhuba ilelo kwakabe ngwa inotjisa kwazo, Abineri ne Baiziraela bakakundiwa nge balanda ba Dafite. 18Bakololo ba Zeruya nge butatu bakabe bali ipapo, ili Joabu na Abishayi na Asahele. Asahele wakabe elabuka se phala, 19katatana na Abineri akansendama Abineri kusina kwaangadzetelako. 20Abineri katjebuka shule, kandwa kati, “Apa ndiwe Asahele kene?”
Kadabila kati, “Ee, ndimi.”
21Abineri kandwa kati, “Tendebukila ku luji kene ku lumeshwe, utatane ne mmwe we babhayani untolele tjaanowobe anatjo.” Koga Asahele kabe asingashake misa kutatana naye. 22Abineri kazwibgwilulula kakale kati, “Shanduka udwe shule kwangu, ini ushakakuti ndikubulaye? Ndowo lingana ne nkulu uwo Joabu tjini kene?” 23Koga kalamba shanduka, ndizo Abineri kambhaya ne bhato le thumo lile mu ntumbu, thumo libe linothuka ku shule, ebe ewa efila ipapo. Koga bose bakati beswika pakabe Asahele afilapo, bakama koga kukasibe ne unozunguzika.
24Koga Joabu na Abishayi bakatatana na Abineri, kukati zhuba lingina bakaswika pa duthu la Amma lakalingisana ne Giya pa zila inoyenda ku tjilambanyika tje Gibiyoni. 25Bathu be Bhenjamini bakazwibumba shule kwa Abineri, bakabe tjithu tjing'ompela, bakama zubuyanana pezhugwi kwe duthu. 26Ndizo Abineri kakambidza Joabu kati, “Apa thumo lowolilila tjose kene? Apa autoziba kuti ku bupelo kowogwadza kene? Kowodza kukabe lini usathu ukamisa bathu babo kutatana ne hama dzabo kene?”
27Joabu kadabila kati, “Ndotuna nge Ndzimu unotjila, ha wabe usalebeleka bathu bangu babe bowotatana namwi kuswikila mangwanana.” 28Ndizo Joabu kalidza lunyanga ngono babhayani bose bakama pabakabe balipo, bakasitjatatamile Baiziraela kene kuli kugwa nabo.
29Abineri ne bathu babe bakalalila beyenda busiku gose bakapalama nkuku we Jorodani, bakanotjuluka gwizi gwe Jorodani, bakayenda kakale mangwanana wose bakanoswika ku Mahanayimi.
30Joabu kashanduka mukutatana na Abineri, kakubunganya bathu bose, ngono kawana balanda ba Dafite bali gumi lina zhanalume (19) basipo, kuzhe kwa Asahele. 31Koga balanda ba Dafite bakabe babulaya balume be ludzi gwa Bhenjamini bali mazana matatu ana makumi ali kutathatu (360) bakabe bana Abineri. 32Joabu ne bathu babe bakatola itumbu tja Asahele bakambiganya kwakabe kwabiganyiwa tate babe mu Bhetelehema. Ndizo bakalala beyenda busiku gose, kukati kuyedza bakabe beswika ku Heburoni.
Kalanga Bible © Bible Society of Botswana, 2008, 2018.