2 Samuele 10
10
Dafite unokunda Baamoni ne Basiriya
(1 Zwiyitikalo 19:1-19)
1Kwakati shule kwa ikoku, mambo we Baamoni kafa, ngono nkololo uwe Hanuni kan'gala thaka. 2Dafite kabe eti, “Ndowothamila Hanuni nkololo wa Nahashi buthu, sekwa tate babe bakandithamila buthu.” Ndizo Dafite katuma batumwa kunomila mu bumo gugwe kunfumidza ngekwa tate babe.
Kwakati bamilili ba Dafite baswika mu shango ye Baamoni, 3batungamili be Baamoni bakadwa Hanuni tetshi wabo bakati, “Apa mokumbula kuti Dafite unoteta tate benyu, ngotumila batumwa kuwomila kumuli kene? Apa aazobatumila kuwoshola nzi bali shodzi kuti baukulile kene?”
4Ndizo Hanuni kabe ebhata batumwa ba Dafite, ebatesela ndedu lushaya gumwe gwe mmwe ne mmwe wabo, ebe etjeka zwiambalo zwabo kuma muthunji, ebe ebatata. 5Kwakati Dafite abudziwa ngekwako, katuma batumwa kunobashanganidza, ngobe bakabe balengudzika kwazo. Mambo bakabadwa bakati, “Mugale ku Jerikho kuswikila ndedu dzenyu dzikula ndizo mukobuya.”
6Kwakati Baamoni batjibona kuti bazwigwisanya na Dafite, bakatapa babhayani be makumbo bali zwiwulu zwili makumi mabili (20 000) be Baaramu kudwa ku Bhetirehobhu ne Baaramu be Zoba, na Mambo we Maakha ana balume bali tjiwulu (1 000), nenge balume bali zwiwulu zwili gumi lina kubili (12 000) banodwa ku Tobi. 7Kwakati Dafite ehwa ikoku, katuma Joabu ne goko lose le babhayani. 8Baamoni bakabhuda bakama bali mu ndongoloso ye ngwa pa nkoba we nzi wabo, koga Baaramu be Zoba ne be Rehobu ne balume be Tobi ne Maaka bakabe bali kupoga ku shango.
9Kukati Joabu ebona kuti ngwa yankomba mbeli na shule, kashalula bamwe be babhayani banogalikabgwe, kabalingisanya ne Baaramu. 10Bamwe balume bakasala kabalonga mu maboko Abishayi nnung'una uwe kube pasi kukwe, kabalingisanya ne Baamoni. 11Kabe endwa eti, “Ha Baaramu bangandikulila, unowozha kuwondibhatsha, ngono ha Baamoni bangakukulila, ndowozha kuwokubhatsha. 12Ube ne tjilopa, tigwe takasima tigwila bathu bedu ne mizi ye Ndzimu wedu, Yahwe ngabathame tjabanobona tjakabalulwamila.”
13Ndizo Joabu ne baakabe anabo bakasedzela mu ngwa kugwa ne Baaramu, Baaramu bakantizha. 14Kwakati Baamoni bebona Baaramu betizha naibobo bakatizha Abishayi bakangina mu nzi. Ndizo Joabu kabgwilila ku Jerusalema. 15Shule kwe Baaramu basinobona kuti bakundiwa ne Baiziraela bakazwikubunganya. 16Hadadezeri kadusa hwi kudana Baaramu bakabe bali seli kwe Gwizi gwe Yufuratesi, ngono bakazha ku Helamu, Shobaki nlauli we babhayani ba Hadadezeri akabatungamilila. 17Kwakati Dafite ebudziwa ngekwako, kakubunganya Baiziraela bose, bakatjuluka Jorodani bakayenda ku Helamu. Baaramu bakazwilulwamisila ngwa bakashanganidza Dafite kugwa naye. 18Koga Baaramu bakamadzuka betizha Baiziraela, Dafite kabulaya bayendisi be koloyi dze ngwa bali mazana ali kutendeka (700) ne babhayani be makumbo bali zwiwulu zwili makumi manna (40 000), bakaloba bakakubadza Shobaki nlauli we ngwa yabo, kafila ipapo. 19Kwakati bomambo bose bakabe bali makulukota a Hadadezeri bebona kuti bakundiwa nge Iziraela, bakathama tjidumilano nabo bakabe balanda babo. Ndizo Baaramu bakatja bakasitjafe babhatsha Baamoni kakale.
Kalanga Bible © Bible Society of Botswana, 2008, 2018.