2 Pita 2

Badiyi be manyepkhwa

1Koga balebesambeli be manyepkhwa na ibo bakabe yapo pakati kwe bathu, koga sekwa badiyi be manyepkhwa banowobe yapo pakati kwenyu, banowozhisa nge zila yakasumbikala zwidiyo zwinokolomola zwisizwe malebeswa, ne kuzwilandula She dumbu wakabadzutunula, ndizo banowozwitjimbidzila kuloba. 2Ngono banji banowotobela zila dzabo dze kuwalilana dzinobhatisa shoni, ngono nge zila ye badiyi ibaba, zila ye malebeswa inowogongobogwa. 3Mu bugovu gwabo, banowomulasha nge manyepkhwa, kuti ndizo batole mari mu muli. Kusumikilisiwa kwabo akubilobamilila ntolo, ngono kolomogwa kwabo kwakabalinda.

4Ngobe Ndzimu auzoletja batumwa be kudzimu bakabe batjinya, koga wakabaposela mu mwina umukatikati, iko kwabakabigwa busungwa gwe zhalima, bakalindila zhuba le kusumikilisiwa; 5#Kutangisa 6:1—7:24ha Ndzimu usakaletja shango ya ntolo, koga wakazhisa nkubila mu shango ye bathu bakabe betjinya, koga ukatjidza Nuwa, iye wakabe ediya ndulamo, ne bamwe bali kutendeka. 6#Kutangisa 19:24Ha Ndzimu wakalotesa mizi ye Sodoma ne Gomora, ikasala ili nlota, uthama tjilakidzilo tje tjinowoshingikala muna basina hanya nge Ndzimu. 7#Kutangisa 19:1-16Ha Ndzimu wakaangulila Lote, nlume we nlulwami, wakabe ehwisiwa zogwadza nge zila dzabo dze kuwalilana dzinobhatisa shoni, 8nlume iwoyo we nlulwami, wakabe egala pakati kwabo, ngono zhuba ne zhuba wakabe engina buyendasi bukulu kwazo nge kubona nenge kuhwa mishingo yabo yakabe isi mu nlayo. 9Ndizo akwakajalo She banoziba sekwa bangatjidza bathu banotjila se kunoshaka Ndzimu mu ndiko, ne kugadza bathu basakalulwama mu busungwa, kuswikila zhuba le sumikiliso, 10kwazo kwazo ibabo banosala shule njemulo dzisi idzo dze mibili yabo, ngono belingila pasi bushe gwe Ndzimu.

Badiyi ibabo, bathu bakasima moyo, kakale banozwikudza basingatje kuleba bubi ngekwa ibabo bakakudziwa. 11Koga batumwa be kudzimu, nenguba bana bukulu ne masimba anopinda e badiyi ibaba, abatobaleba bubi bebasumikilisa mbeli kwa She. 12Koga bathu ibaba se phuka dzisingalaugwe, zwibumbiwa zwinoloba dzakazwaligwa bhakhwa nenge kubulawa, dzisingaalakane, banotuka Ndzimu mu tjimwe ne tjimwe tjabasingahwisise. Ngono banowolobesiwabo se phuka dze shango. 13Banowolipiwa nge kuhwisiwa zogwadza koga sekwa bakathamabo. Mu bali kushatha hwupapamadza tjimwe ne tjimwe patjena masikati, tjabanoshinga tjinodzima nyota ye njemulo dze mibili yabo; zwibadzi zwinobhatisa shoni ha bezha bewoja zojiwa namwi, kakale bali mu kushatha, bethama zila dzabo dze bupitipiti. 14Nge mesho abo azhele bupongwe habatoguta thama jinyo. Banowonga basakasima. Bakawolobedza mimoyo yabo bugovu. Ndzimu wakabalonga bhiso! 15#Mbalo 22:4-35Bakafupatila zila yakatambunuka bakadzimila, bakatobela zila ya Bhalamu nkololo wa Bheore, wakabe eda mbuzilo ye bubi, 16ngono katjemelegwa jinyo lile nge donki, phuka isingalebeleke ikalebeleka se nthu, ikamisa mishingo ye bupengo yakabe ithamwa ne nlebesambeli.

17Bathu ibaba banofanana ne misenya yakawomelela, banofanana ne fulele itutudziwa nge dutu; Ndzimu wakababiganyidzila magalo mu zhalima dema dema. 18Banolebeleka matama makulu kulu asina tjaanodwa, banoshingisa njemulo dzabo dze kuwalilana kunobhatisa shoni dze tjinyama, kubhatshila bathu banobe kuli iko batjabhuda mu ndashiko. 19Banobagadzabgwe sununguko, ngono ibo bali basungwa be jinyo; ngobe nthu nsungwa we tjimwe ne tjimwe tjinonlaula. 20Ha bathu batizha zila dzinolonga bubi, dze shango, nge luzibo gwa She wedu kakale ali Ntjidzi wedu Jesu Kirisiti, bedwa bebhatshigwa kakale bebuya bekundiwa ndidzo, bathu bakajalo bamu ndashiko hwulu inopinda yabakabe bali muili kutanga. 21Kungabe kwakababhatsha, abakabe bati bukulu bakasizibe zila ye ndulamo pana kuti baizibe bedwa beti shule befupatila ndayo yakayengemala yabakapiwa. 22#Makungulupeswa 26:11Kwakabashingikalila nge malebeswa mapeswa anoti, “Mbgwa inobgwilila ikanoja matho ayo” kakale “Ngulube yaangudziwa inobgwilila ikanobumbuluka mu dope.”

Currently Selected:

2 Pita 2: KBTP

Highlight

Compare

Copy