2 Bomambo 20
20
Bugwele gwa Hezekiya ne pola kukwe
(Isaya 38:1-8, 21-22; 2 Zwiyitikalo 32:24-26)
1Kwakati mu mazhuba iyawo Hezekiya kagwala kwaakabe pejo ngofa. Isaya nlebesambeli nkololo wa Amozi, kayenda kunli kan'dwa kati, “Yahwe bakati, ‘Lulwamisa zwe nsha uwo ngoti unowofa, autowopola.’ ” 2Ipapo Hezekiya kashanduka kalinga ku guma ngono katembezela Yahwe eti, 3“Yahwe ndomukumbila, alakanani sekwa ndakatjila mbeli kwenyu, ndigalikabgwe nge buzhalo, ndishinga nge moyo wangu wose kakale ndishinga zwakanaka mbeli kwenyu.” Hezekiya kalila zwinogwadza. 4Ngono kwakati Isaya asathu kabhuda mu nsha upakati, dama la Yahwe likazha kunli liti, 5“Shanduka udwe Hezekiya ntungamili we bathu bangu uti, ‘Etji nditjo tjinolebgwa ndi Yahwe Ndzimu wa tate babo Dafite, nda hwa ntembezelo uwo, ndabona mishodzi iyo, bona, ndowokupodza ngono mu zhuba le butatu unowoyenda ku ng'umba ya Yahwe. 6Ndowopapha butjilo gugo nge makole ali gumi lina mashanu (15). Ndowosunungula iwe ne nzi nkulu iwoyu mu luboko gwa mambo we Asiriya. Ndowobakilila nzi nkulu iwoyu nge kwangu ne ngekwe nlanda wangu Dafite.’ ” 7Ipapo Isaya kati, “Zhisani tjiwunga tje phaya ngono mutjibige pa londa kuti ndizo apole.” 8Ngono Hezekiya kabhuzwa Isaya kati, “Tjilakidzo tjowobeni tjekuti Yahwe banowondipodza, nekuti ndiyende ku ng'umba ya Yahwe mu zhuba le butatu?” 9Ngono Isaya kandwa kati, “Yetji nditjo tjilakidzo kukuli tjinodwa kuna Yahwe tjekuti Yahwe banowothama tjabakakugadzabgwe. Apa unoshaka ntutshi uyende mbeli thambo dzili gumi, kene ubgwilile shule thambo dzili gumi kene?” 10Ngono Hezekiya kadabila eti, “Tjithu tjilelulelu kuti ntutshi uyende mbeli thambo dzili gumi, koyita ungabgwilila shule thambo dzili gumi.” 11Isaya we nlebesambeli kalilila kuna Yahwe ngono bakabgwiliza ntutshi shule thambo dzili gumi pawakabe wapinda tjilakidza tjibaka tja Ahazi.
Batumwa banodwa ku Bhabhiloni
(Isaya 39:1-8)
12Mu tjibaka itjetjo Merodakhi Baladani nkololo wa Baladani mambo we Bhabhiloni katumila hwalo ne zwipo kuna Hezekiya ngoti wakabe ahwa ngekwe bugwele gwa Hezekiya. 13Hezekiya kabaamutjila ngono kabalakidza dula le fumwa iye. Kabalakidza siliva ne golide ne zwipayisi ne mafuta e themba ipezhugwi, kabalakidza ne zwibhayano zwizwe, kabalakidza kose kwakabe kuli mu matula awe. Akuna tjimwe Hezekiya tjaakasiya mu ng'umba iye kene mu bumambo gugwe asabalakidza itjo. 14Ipapo nlebesambeli Isaya kazha kuna Mambo Hezekiya kan'dwa kati, “Balume ibaba badwa ngayi, bakatini?” Hezekiya kadabila eti, “Bazha kundili bedwa ku shango ikule, shango ye Bhabhiloni.” 15Isaya kabhuzwa eti, “Babonani mu ng'umba iyo?” Hezekiya kadabila eti, “Babona kose kungabong'wa mu ng'umba yangu, akuna tjimu matula angu tjandisabalakidza.” 16Ipapo Isaya kabe edwa Hezekiya eti, “Ihwa kuti Yahwe bakatini? 17#2 Bomambo 24:13; 2 Zwiyitikalo 36:10Bona, mazhuba anozha anowoti zose zwimu ng'umba iyo naizo zose zwetjinga zwakakubunganyiwa ndi botate babo mu matula kuswikila nasi zwikasengegwa ku Bhabhiloni, akuna tjinowosala, koleba Yahwe. 18#2 Bomambo 24:14, 15; Daniyele 1:1-7Bamwe be bakololo babo bawakazwala banowotapiwa, banowobe ngomwa mu ng'umba ye bumambo ya mambo we Bhabhiloni.” 19Ipapo Hezekiya kabe eti kuna Isaya, “Dama la Yahwe lawaleba lakalulwama.” Wakajalo ngobe wakakumbula eti, “Mbakiso ne mbakililo zowobepo mu mazhuba angu.”
Bhelelo le mbuso wa Hezekiya
(2 Zwiyitikalo 32:32-33)
20Mimwe mishingo ya Hezekiya na zose zwaakatubula na sekwaakathama tshime ne kuzhisa vula mu nzi nkulu zwakakwagwa mu lukwalo gwe zwiyitikalo gwa bomambo be Juda. 21Hezekiya kalala na botate babe ngono Manase nkololo uwe kan'gala thaka.
Kalanga Bible © Bible Society of Botswana, 2008, 2018.