2 Zwiyitikalo 8
8
Bhudilila kwa Solomoni
(1 Bomambo 9:10-28)
1Ku bupelo gwe makole ali makumi mabili, Solomoni asinobe abaka Ng'umba ya Yahwe ne iye, 2Solomoni kamusa mizi mikulu yaakabe apiwa ndi Huramu ngono kabiga Baiziraela muili. 3Solomoni kayenda ku Hamatizoba ngono kaitapa, 4kabaka nzi we Tadimori mu tjilambanyika ne mizi mikulu yose ye matula yaakabe abaka mu Hamati. 5Solomoni kamusa Bhetihoroni wakatathila ne Bhetihoroni wakakungulukila kube mizi ye matizhilo yakabakwa nge makuma ne mikoba ne zwizhalilo zwe butale, 6kamusa ne Bhaalati ne mizi yose ye matula ya Solomoni yaakabe anayo ne mizi mikulu yose yakabe igala koloyi dzidze dze ngwa ne yakabe igala bataswi babe be mbizi ne tjimwe ne tjimwe tja Solomoni tjaakabe eshaka kutjibaka mu Jerusalema neku Lebanoni ne mu shango ye mbuso uwe wose. 7Malimbelimbe e bathu be Bahiti ne Baamori ne Baperizi ne Bahivite ne Bajebusi ibo bakabe basi be Iziraela, 8hwuti, Baiziraela bakabe basabalobesa bose, ibabo ndibo Solomoni baakathama balanda kudzina kube nasi. 9Koga Baiziraela ibo Solomoni kasibathame balanda ku nshingila koga bakabe babhayani ne balauli be babhayani babe ne balauli be koloyi dzidze dze ngwa ne bataswi babe be mbizi. 10Mambo Solomoni wakabe ana batungamili bali mazana mabili ana bali makumi mashanu (250) bakabe bali balingilili bana simba mu bathu.
11Solomoni kadusa nkololokadzi wa Faro mu nzi nkulu wa Dafite ku ng'umba yaakabe ambakila ngono kabe eti, “Nfumakadzi wangu angagale mu ng'umba ya Dafite mambo we Iziraela ngobe magalo mamwe ne mamwe akatongogala Bhokisi le Tjidumano akayengemala.”
12Ipapo Solomoni wakadusila Yahwe zwibhayilo zwinopisiwa mu tjibeso tjinopisigwa zwibhayilo tja Yahwe tjaakabe abaka mbeli kwe Ng'umba ye Ndzimu, 13#Mbalo 28:9, 10; Mbalo 28:11-15; Kufuluka 23:14-17; 34:22, 23; Mbalo 28:16—29:39; Matama 16:16wakadusa zwibhayilo zwinopisiwa kuyendidzana na zose zwinoshakiwa mu milayo ya Mushe ngekwe mazhuba wose akayengemala ali mazhuba e Ndzimu ekunyaluluka abo Sabata neye Mwedzi ugala ne mizano mitatu ye gole ne gole: Nzano we tjiwunga tjisina mbidzo ne Nzano we zwavung'wa mu minda ne Nzano we Mishasha. 14Kuyendidzana nge milayo ya Dafite tate babe wakabiga makupo e bapirisiti nge mishingo yabo ne Balevi nge nshingo wabo we kumba mu misi ye mazhuba wose e mishingo, kabiga balisi be mikoba ku mikoba ngo siyana kwayo, koga Dafite sekwa akalaula. 15Ndizo abazopambuka muna tjakabetjadwiwa bapirisiti ne Balevi ndi mambo muna zose ngekwe zwe matula. 16Nge tjibaka itjetjo ndiyo mishingo yose iyeyi yakashingwa ndi Solomoni. Kudwa tjose mu tjibaka tje kuteyiwa kwe Ng'umba ya Yahwe kudzina inopelela.
17Ipapo Solomoni kayenda ku Eziyonigeberi mamilo e zwikepe ne ku Eloti ku nsupho we gungwa mu shango ye Edomu. 18Mambo Huramu kantumila zwikepe ne balanda ne bamwe balanda bana luzibo nge gungwa ngono bakayenda ku Ofira kose ne balanda ba Solomoni ngono bakanotola talenta dze golide dzili zana lina makumi mashanu (150), ngono bakadziyisa kuna Mambo Solomoni.
Kalanga Bible © Bible Society of Botswana, 2008, 2018.