2 Zwiyitikalo 11
11
Bulebesambeli gwa Shemaiya
(1 Bomambo 12:21-24)
1Kukati Rehoboamu eswika ku Jerusalema, kakubunganya babhayani bali zwiwulu zwili zana lina makumi ali zhanakadzi (180 000), kudwa mu nsha wose wa Juda ne ludzi gose gwa Bhenjamini. Akazwimisila kunogwa ne Iziraela kubgwilizila mbuso kuna Rehobhoamu. 2Koga dama le Ndzimu likazha kuna Shemaya we nlebesambeli, likandwa likati, 3“Lebeleka na Rehoboamu nkololo wa Solomoni mambo we Juda ne bathu bose ne ng'umba yose ya Juda neya Bhenjamini, ubadwe uti, 4‘Yahwe bakati musiyende kunogwa ne bakanyi kwenyu Baiziraela. Mmwe ne mmwe ngaabgwilile ku nzi uwe, ngobe tjashingikala tjodwa kundili.’ ” Ndizo bose bakahwa matama a Yahwe, bakashandukila ku nzi, sekwaleba Yahwe.
Rehoboamu unobaka matizhilo
5Rehoboamu kagala mu Jerusalema ngono kabaka mizi mikulu ye matizhilo mu Juda. 6Wakabaka Bhetelehema ne Etamu ne Tekowa ne 7Bhetizuri ne Soko ne Adulamu ne 8Gati ne Mareshahi ne Zifi ne 9Adoraimu ne Lakhishi ne Azekahi ne 10Zora ne Aijaloni ne Heburoni, iyeyi ndiyo mizi mikulu ye Juda ne Bhenjamini. 11Wakabaka matizhilo iyawa akasima ngono kabiga batungamili mu ali kabiga ne matula e zojiwa ne mafuta ne nkumbi we zhambi. 12Wakabiga zwivikisi ne mathumo mu mizi mikulu yose, eisimisa. Ndizo Juda ne Bhenjamini dzakabe dzili dzidze.
13Ngono bapirisiti ne Balevi bakabe bali mu Iziraela bakazha kunli bedwa mu magalo akathubukana abakabe begala. 14Balevi bakasiya shango yabo ye mafulilo ne thundu ngono bakazha ku Juda ne Jerusalema ngoti Jeroboamu ne bakololo babe bakabe babathubula mukushingila Yahwe, 15#1 Bomambo 12:31ngono kabiga bapirisiti babe kuti bashinge mu magalo pezhugwi ekunamata ne kutungamila mu kunamata midzimu ye zwifano zwe mbudzi ne phulu yaakabe athama. 16Ngono ibabo bakabe bakazwipa kutobela Yahwe Ndzimu we Iziraela bakabatobela kudwa mu njudzi dzose dze Iziraela bezha ku Jerusalema bewodusila Yahwe zwibhayilo Ndzimu wa botate babo. 17Bakasimisa bushe gwe Juda, kwe makole matatu bakathama kuti Rehoboamu nkololo wa Solomoni adzikame mu bumambo, ngoti bakatobela zila dza Dafite na Solomoni kwe makole matatu.
Nsha wa Rehoboamu
18Rehoboamu kalobola Mahalati, Mahalati ali nkololokadzi wa Jerimoti, Jerimoti ali nkololo wa Dafite, mme ba Mahalati bali Abihaile, Abihaile ali nkololokadzi wa Eliyabu mwana we mwana wa Jesi. 19Kanzwalila bakololo bali batatu ibo bakabe bali bo Jeushi na Shemariya na Zahamu. 20Kwakati shule katola Maaka nkololokadzi wa Abusalomu ngono iye kazwala Abija na Atai na Ziza na Shelomiti. 21Rehoboamu wakabe eda Maaka nkololokadzi wa Abusalomu kupinda bakadzi babe bose ne kupinda bakadzi batukunu bose. Rehoboamu wakabe ana bakadzi bali gumi lina bali zhanakadzi (18) ne balongwana babo bose bali makumi ali tathatu (60) ne bakololo bali makumi mabili ana bali zhanakadzi (28) ne bakololokadzi bali makumi ali tathatu (60), 22ngono Rehoboamu kabiga Abija nkololo wa Maaka kuti abe iye ntungamili mu banunguna babe ngoti wakabe eshaka kuti azhe ambige mambo. 23Rehoboamu kakobela bakololo babe mishingo nge butjenjedu ngono kababiga batungamili mu mituthu yose ye matizhilo ye Juda ne Bhenjamini. Ngono wakabatjengeta kwazo kakale kabashakila bakadzi banjinji.
Kalanga Bible © Bible Society of Botswana, 2008, 2018.