1 Batesalonika 1
1
1 #
Mishingo 17:1
Ndimi Paulo, ndina Silivano,#1:1 Silivano: Ndiyezwe “Silasi.” na Timoti.
Ku gubungano le Batesalonika mu Ndzimu Tate na She Jesu Kirisiti:
Ngoni ne kunyalala ngakube namwi.
Butjilo ne bugalimoyo gwe Batesalonika
2Toboka Ndzimu misi yose nge kwenyu mose, timutembezelela mu mitembezelo yedu. 3Togala tikumbula mbeli kwe Ndzimu Tate bedu, nshingo wenyu unozwagwa nge bugalimoyo, kushinga kwenyu kukulu kunozwagwa nge ludo nenge kusimisila kwenyu kunozwagwa nge kugalabgwe muna She wedu Jesu Kirisiti. 4Zwikamu zwinodiwa nge Ndzimu, toziba kuti wakamushalula, 5ngobe ndebo mbuya yedu aizozha kumuli nge matama koga, yakazha nge masimba nge Meya yakayengemala nenge kuduma kwakapelela. Moziba sekwa takabe tizwiibhata tili gele pakati kwenyu tithamila imwi. 6#Mishingo 17:5-9Makabe bayedzi bedu ne ba She; nenguba makabe ne kudziyila kukulu, makaamutjila dama nge kushatha kunodwa mu Meya yakayengemala. 7Ndizo makabe tjilakidzilo ku bagalimoyo bose be Makedoniya ne Akaiya. 8Ngobe dama ngekwa She alizoti kubhuda mu muli, likazibgwa mu Makedoniya ne Akaiya koga, lakazibgwa kumwe ne kumwe nenge zila yamakabe mu kugalamoyo ndiyo mu Ndzimu. Ndizo akutjina tjatingaleba nge kwako, 9ngobe ibo nge kwabo banoleba nge sekwa makatiamutjila nenge sekwa makaletjedza thigamila midzimu, ngono motjithigamila Ndzimu unotjila, wakwako, 10nenge kulindila kuzha kwe Nkololo wawo edwa kudzimu, iye wawakamusa mu bafi. Jesu iye unotiangulila mu bushongola gonozha.
Kalanga Bible © Bible Society of Botswana, 2008, 2018.