1 Samuele 5
5
Bhokisi le Tjidumano mu Bafilisitiya
1Kwakati Bafilisitiya batapa Bhokisi le Tjidumano tje Ndzimu, bakalitola mu Ebheneza bakanoliyisa ku Ashidodi. 2Ndizo Bafilisitiya bakatola Bhokisi le Tjidumano tje Ndzimu bakanolilonga mu ng'umba ya Dagoni bakalibiga pa hwunde na Dagoni#5:2 Dagoni: Ndzimu wakabezhiwa wakabe uthigamigwa nge Bafilisitiya. 3Kwakati tjimuka mangwanana bathu be Ashidodi bemuka, bakawana Dagoni iwoyo, akawa nge buso mbeli kwe Bhokisi le Tjidumano tja Yahwe. Ngono bakatola Dagoni bakambgwiliza pa bugalo gugwe. 4Koga bakati bemuka tjimuka bakawana Dagoni iwoyo, akawa nge buso mbeli kwe Bhokisi le Tjidumano tja Yahwe, ngono nsholo wa Dagoni ne maboko awe wose zwakathubugwa zwili pa tjirepuli tje nkoba we ng'umba, kwasala mbili uwe koga. 5Ndizo wali bapirisiti ba Dagoni na bose banongina mu ng'umba ya Dagoni basingatshambe tjirepuli tja Dagoni ku Ashidodi na nasi.
6Shamu ya Yahwe yakalemela bathu be Ashidodi ne kupoteleka, kakale bakabatjisa ne kubalonga bugwele gwe malonda. 7Kwakati bathu be Ashidodi bebona tjinoshingikala, bakati, “Bhokisi le Tjidumano tje Ndzimu we Iziraela alizofanila gala naswi, ngobe watiloba shamu inogwadza ne ndzimu wedu Dagoni.” 8Ndizo bakadana boshe bose be Bafilisitiya, bakababhuzwa beti, “Apa tingathamani nge Bhokisi le Tjidumano tje Ndzimu we Iziraela kene?”
Ngono bakashandula beti, “Bhokisi le Tjidumano tje Ndzimu we Iziraela ngalifulusigwe ku Gati.” Ndizo bakafulusila Bhokisi le Tjidumano tje Ndzimu we Iziraela ku Gati. 9Koga bakati baliyisa ku Gati, Yahwe bakaloba nzi iwoyo nge shamu, bakazhisa kutja kukulu kwazo, bakaloba bathu be nzi iwoyo, bose bakulu ne batjetjana bakabhudiwa nge malonda. 10Ndizo bakatumila Bhokisi le Tjidumano tje Ndzimu ku Ekironi. Kwakati Bhokisi le Tjidumano tje Ndzimu liswika mu Ekironi, bathu be Ekironi bakalila beti, “Bazhisa Bhokisi le Tjidumano tje Ndzimu ku tili kutibulaya ne bakanyi kwedu.” 11Ndizo bakadana batungamili bose be Bafilisitiya bakabadwa bakati, “Bgwilizani Bhokisi le Tjidumano tje Ndzimu we Iziraela, ngalibgwilile kanyi kwalo, lisitongo dwa litibulaya ne bakanyi kwedu.” Bakajalo ngobe nzi wose wakabe utetema nge lufu. Shamu ye Ndzimu yakabalemela kwazo ipapo. 12Bakasala pafa bakabhudiwa nge malonda, ngono bakalilila midzimu yabo.
Kalanga Bible © Bible Society of Botswana, 2008, 2018.