1 Samuele 3
3
Yahwe banozwilakidza kuna Samuele
1Mbisana Samuele wakabe eshingila Yahwe ali pasi kwa Eli. Mu misi iyeyo dama la Yahwe lakabe lisingahwiwe hwiwe koga, ne mibono yakabe isakawanda. 2Mu tjibaka itjetjo Eli wakabe asingatjabonesese mesho awe abe ne lidandi, wakabe alilele mu ng'umba iye. 3Luvone gwe Ndzimu gwakabe gusathu gukadzima, ngono Samuele wakabe alilele mu Ng'umba ya Yahwe, kwakabe kuna Bhokisi le Tjidumano tje Ndzimu. 4Ipapo Yahwe bakadana Samuele, Samuele kadabila eti, “Ndipano.” 5Kalabukila kuna Eli kaswika eti, “Ndipano, mandidana.”
Koga Eli kandwa kati, “Andizotongo dana, bgwililazo unoizela.” Ndizo kayenda kanoizela.
6Yahwe bakadana kakale bakati, “Samuele!” Ngono Samuele kamuka kayenda kuna Eli kaswika kandwa kati, “Ndabuya mandidana.” Eli kandwa kati, “Andizotongodana nkololo wangu bgwililazo unoizela.”
7Mu tjibaka itjetjo Samuele wakabe asathu kaziba Yahwe, ngobe dama la Yahwe wakabe asathu kalizumbunuligwa.
8Yahwe bakadana Samuele kakale gwe butatu. Samuele kamuka kayenda kuna Eli, kaswika kandwa kati, “Ndabuya mandidana.” Ndizo Eli kabona kuti Yahwe bakabe bedana mbisana. 9Ipapo Eli kandwa kati, “Bgwilila unoizela, ngono ha ungahwa bekudana kakale udabile uti, ‘Lebelekani zwenyu Yahwe, nlanda wenyu wakateedza.’ ” Ndizo Samuele kabgwilila kanoizela ku bulalo gugwe. 10Yahwe bakazha bakama ipapo, bakadana kakale, sekwa batongodana, “Samuele! Samuele!”
Samuele kadabila eti, “Lebelekani zwenyu nlanda wenyu wakateedza.”
11Ipapo Yahwe bakadwa Samuele bakati, “Bona, ndi pejo ngothama tjimwe tjithu mu Iziraela, tjinowothama kuti zebe dze mmwe ne mmwe unotjihwa unowolobgwa nge hana. 12Mu zhuba ilelo ndowothamila Eli zose zwandakaleba ngekwe nsha uwe, kudwa mu kutangisa kunoti ku bupelo. 13Ngono ndombudza kuti ndi pejo ngoloba nsha uwe nge kusingapele, ngekwe jinyo laanoziba, bakololo babe bakabe betuka Ndzimu, ngono kasitongo batjemela. 14Ndizo ndotuna nditunila nsha wa Eli nditi jinyo le nsha wa Eli alingalipigwe nge tjibhayilo kene kudusa tjipo nge kusingapele.”
15Samuele wakaizela kuswikila mangwanana, ndizo kazhula mikoba ye Ng'umba ya Yahwe. Samuele wakabe etja kubudza Eli mbono. 16Koga Eli kadana Samuele kati, “Samuele nkololo wangu.”
Samuele kadabila eti, “Ndipano.” 17Eli kambhuzwa kati, “Apa Yahwe balala bakudwani kene? Usindisumbikile itjo. Ndzimu ngaukulobe, ha ungandisumbikila tjimwe ne tjimwe tjawalala wakubudza.” 18Ndizo Samuele kambudza tjimwe ne tjimwe, kukasibe ne tjaanonsumbikila. Iye kabe eti, “Ndibo Yahwe, ngabathame sekwa kungabe kwakabalulwamila.”
19Samuele kakula, Yahwe banaye, ngono abazotongo thama kuti kube ne matama abo angawila pasi. 20Ndizo Iziraela yose, kudwa ku Dani kunoti ku Bheerisheba ikaziba kuti Samuele nlebesambeli wa Yahwe. 21Yahwe bakadwilila bezwilakidza ku Shilo, ngono Yahwe bakazwilakidza kuna Samuele nge dama labo.
Kalanga Bible © Bible Society of Botswana, 2008, 2018.