1 Samuele 26
26
Dafite unoletjedza Saulo etjila
1 #
Njimbo 54
Bazifu bakazha kuna Saulo ku Gibiya bakandwa bakati, “Apa Dafite azobgwata mu Dombo le Hakhila, lakalingisana ne Jeshimoni kene?” 2Ndizo Saulo kabe emilika edelukila ku tjilambanyika tje Zifu, ana balume be Iziraela bakashalugwa bali Zwiwulu zwitatu (3 000), kunoshaka Dafite mu tjilambanyika tje Zifu. 3Saulo wakakotokela pa wunde ne zila mu duthu le Hakila, lakalingisana ne Jeshimoni, koga Dafite kagala mu tjilambanyika. Wakati asinoziba kuti Saulo wakanlonda mu tjilambanyika, 4Dafite katuma shodzi, kaziba dumbu kuti Saulo wakaswika. 5Ndizo Dafite kamilika kazha pakabe Saulo akakotokelapo, kabona panolala Saulo na Abineri nkololo wa Neri nlauli we ikwata tjitje. Saulo wakabe alilele mukati kwe bukotokelo, babhayani ibo bakampoteleka.
6Ndizo Dafite kabhuzwa muna Ahimeleke we Nhiti ne ku nnung'una wa Joabu Abishayi nkololo wa Zeruya kati, “Apa ndiani unowodelukila nami mu bukotokelo kuna Saulo kene?”
Abishayi kadabila eti, “Ndowoyenda namwi.”
7Dafite na Abishayi bakabe beyenda ku ikwata busiku, Saulo kabe akaizela mu bukotokelo ne thumo lile lakabhayila pasi ku misholo iye, ngono Abeneri ne babhayani bakayizela bakampoteleka. 8Abishayi kadwa Dafite kati, “Nasi Ndzimu walonga tjita tjenyu mu maboko enyu, ndizo ngwenu tjimani ndinkothomelele pasi kang'ompela nge thumo, anditowombhaya kabili!”
9Koga Dafite kadwa Abishayi kati, “Usimbulaye! Apa ndiani ungamilidzila nzhodziwa wa Yahwe luboko, ebe asingabe nlandu kene?” 10Dafite kabe eti, “Ndowotuna ndi Yahwe banotjila, unowolobgwa ndi Yahwe nge kwabo, kene zhuba lile le kufa lowoswika, pamwe unowongina mu ngwa ebe efa. 11#1 Samuele 24:6Yahwe badziba kuti ndisimilidzile nzhodziwa wa Yahwe luboko, koga ngwenu, tola thumo ne ikuyu tje vula zwipa misholo iye tiyende.” 12Ndizo Dafite katola thumo ne ikuyu tje vula zwakabe zwili pa misholo ya Saulo, bakabe bezwiyendila zwabo. Akuna wakabona kene wakaziba nge kwaikoku, nakuto ali nng'ompela wakamuka, bose bakabe bakafa nge hwope, ngobe Yahwe bakabe babatshambilidza nge hwope.
13Ndizo Dafite katjolukila seli kwe nkuku, kama pezhugwi kwe duthu kuli kuthambgwana, kwakabe kwakaashama pakati kwabo. 14Dafite kakambidza ikwata na Abineri nkololo wa Neri, kati, “Abineri! Autodabila kene?” Abeneri kadabila eti, “Uani iwe unodana mambo kene?” 15Dafite kwadwa Abineri kati, “Apa auteli nlume kene? Ndiani unofanana nawe mu Iziraela kene? Hwutini usagala ukalinda tetshi uwo mambo kene? Ngobe kuna nthu wazha kangina awobulaya she mambo. 16Kuthu ikoku kwawathama akuzolulwama, ndotuna na Yahwe banotjila, wakafanilofa iwe ne bathu babo, ngobe auzotjengeta tetshi uwo, nzhodziwa wa Yahwe. Thumo ne ikuyu tje vula zwa mambo zwingayi zwabe zwili pa misholo yabo kene?”
17Saulo kaziba hwi la Dafite, kabe eti, “Apa i hwi lilo ilele kene, nkololo wangu Dafite?”
Dafite kabe eti, “Ee, i hwi langu, tetshi wangu mambo wangu.” 18Kapapha kakale kati, “Hwutini tetshi wangu betobelele nlanda wabo kene? Ndakathamani, nlandu wandathama ndiupi kene? 19Ndizo ngwenu tetshi wangu mambo, teedzani matama e nlanda wenyu. Ha kuli kuti Yahwe ndibo bakamudzonga kundigwisanya namwi, ngabaamutjile tjipo, koga ha kwakathamwa nge bathu, ngababe nge bhiso mbeli kwa Yahwe! Ngobe bandidusa mu gobe langu mu thaka ya Yahwe, bebe beti, ‘Yenda unoshingila midzimu ipoga.’ 20Ngono ngwenu, musiletje malopa angu etebukila pasi kulekule pasipo Yahwe. Ini mambo be Iziraela bangabhuda benovima butata gunonga imi? Ini bangandivima kungapa se hwali mu matombo.” 21Ndizo Saulo kabe eti, “Ndakatjinya, shanduka, nkololo wangu Dafite, ngobe nasi watola butjilo gwangu guli gunosheteka, andingatjagwise kukubulaya kakale. Ndakathama bulengwe, ndaleyanya kukulu kulu kwazo.” 22Dafite kadabila eti, “Thumo la mambo wangu yele! Tumani mmwe bazhuzha benyu azhe alitole. 23Yahwe banolipila mmwe ne mmwe ndulamo iye ne kugalikabgwe kukwe, ngobe Yahwe babe bamulonga mu maboko angu nasi, koga ndabe ndisingake amilidzila nzhodziwa wa Yahwe luboko gwangu. 24Sekwa ndabigilidza butjilo gwenyu nasi, sa ikoku, Yahwe ngababigilidzi butjilo gwangu babuye bandigwile mu mbatsha dzose.” 25Ndizo Saulo kadwa Dafite kati, “Ukombolegwe iwe, nkololo wangu Dafite! Unowothama zwithu zwikulu kwazo ubuya ukunda nge malebeswa.” Ndizo Dafite kabe ezwiyendigwazwe na Saulo kabgwilila kanyi kukwe.
Kalanga Bible © Bible Society of Botswana, 2008, 2018.