1 Samuele 23
23
Dafite unotjidza nzi we Keila
1Kwakati Dafite ebudziwa kuyi, “Bona, Bafilisitiya banogwa ne Keila, kakale bakabatolela mbuwa.” 2Dafite kabhuzwa kuna Yahwe kati, “Apa ndingayenda anonginilila Bafilisitiya ibaba kene?” Yahwe bakashandula Dafite beti, “Yenda unonginilila Bafilisitiya ibaba, utjidze Keila.” 3Koga bathu ba Dafite bakandwa bakati, “Iswi totja imomu mu Juda, ngono kutja kwedu kowobe kungapani, ha tingayenda ku Keila, kunogwa ne ngwa dze Bafilisitiya kene?” 4Ndizo Dafite kakumbila Yahwe kakale, Yahwe bakan'dabila beti, “Ee, delukila ku Keila, ndowothama kuti ukunde Bafilisitiya.” 5Ndizo Dafite ne bathu babe bakayenda ku Keila, bakagwa ne Bafilisitiya, bakatakula zwithuwo zwabo, bakabakulila kukulu kwazo. Dafite kagwila bathu be Keila. 6Kwakati Abiathari nkololo wa Ahimeleki etizhila kuna Dafite ku Keila, kazha akabhata efodi. 7Saulo wakabudziwa kuti Dafite wabe ku Keila, ngono kabe eti, “Ndzimu wandipa iye mu maboko, wazwizhalilila ngongina mu nzi una mikoba ne mazhalilo.” 8Saulo kadanila bathu bose ku ngwa, kunokombeledza Keila, kulalila Dafite ne bathu babe. 9Kwakati Dafite asinoziba kuti Saulo unonlukila gwanga gwe kumbulaya, akadwa Mpirisiti Abiathari kati, “Zhisa efodi ngeno.” 10Dafite kati, “Ndomutembezela, Yahwe Ndzimu we Iziraela, nlanda wenyu wahwa kuti Saulo unoshakazha ku Keila, kowokolomodza nzi nkulu nge kwangu. 11Ngono ngwenu, apa Saulo unowozha sekwa akahwa nlanda wenyu kene? Ndomutembezela, Yahwe Ndzimu we Iziraela, ndomukumbila, budzani nlanda wenyu.” Yahwe bakadabila beti, “Unowozha.” 12Ndizo Dafite kabhuzwa eti, “Apa bagali be Keila banowotipa Saulo mu maboko imi ne bathu bangu kene?” Yahwe bakashandula beti, “Banowomulonga mu maboko awe.” 13Ndizo Dafite ne bathu babe, bakabe bangabe mazana ali kutathatu (600), bakamilika bakabhuda mu Keila, bakayenda bengina ntuthu ne ntuthu. Kwakati Saulo asinobudziwa kuti Dafite watizha mu Keila, kasitjayendeko. 14Dafite kagala mu matizhilo mu tjilambanyika, mu matuthu e Tjilambanyika tje Zifu. Saulo kanshaka mazhuba wose, koga Yahwe bakasithame kuti ambone. 15Kukati Dafite atji mu Tjilambanyika tje Zifu ku Horeshi, kaziba kuti Saulo unoshaka kumbulaya. 16Nkololo wa Saulo Jonatani kamilika kayenda kuna Dafite ku Horeshi, kambatsha kuti awane simba muna Yahwe. 17Kandwa kati, “Usitje, ngobe tate bangu Saulo abatjowokubulaya, unowobe mambo we Iziraela, imi ndowokubhata thudzi, na ibo tate bangu Saulo banoziba kuthu ikoku.” 18#1 Samuele 18:3Bubili gwabo bakathama tjidumano mbeli kwa Yahwe, Jonatani kabe ebgwilila kanyi, Dafite kabe esala ku Horeshi. 19#Njimbo 54Ndizo Bazifu bakatathila ku Gibiya kuna Saulo kunon'dwa beti, “Dafite wakabgwata kanyi kwedu, mu matizhilo e Horeshi mu duthu le Hakhila, liku burwa gwe Jeshimoni. 20Ngwenu mambo, mungazha zwenyu pamunowobe mawana tjibaka, iswi kowobe mu mathudzi edu kunlonga mu maboko a mambo.” 21Saulo kabadwa kati, “Yahwe bamukombolele, ngobe mandiyitila hanya. 22Yendani munobona kakale, ipo paayapo dumbu, ne kuti wakabong'wa ndiani ikweno, ngobe ndakabudziwa kuti i jenjedu gulu. 23Mushake kose, mu zibe mabgwatilo awe wose kwaanozwisumbikako, mube mubuya mowondibudza ha motjizibisisa. Ndizo ndowoyenda namwi, ngono ha kuli kuti uyapo mu shango, ndowonvima pakati kwe zwiwulu (10 000) zwe Juda.”
24Bakamilika bakayenda ku Zifu kutangila Saulo. Dafite ne bathu babe bakabe bali mu tjilambanyika tje Maoni, mu Araba ku burwa gwe Jeshimoni. 25Saulo ne balanda babe bakatangisa kunshaka. Kwakati Dafite abudziwa ngekwako, kadelukila ku shongwe kanogala mu tjilambanyika tje Maoni. Kukati Saulo ehwa ikoku, katobela Dafite mu tjilambanyika tje Maoni. 26Saulo wakabe eyenda ali ntha imwe ye dombo, Dafite ne bathu babe beyendabo bali ntha imwe ye dombo, beyenda belibilidza kuti batizhe basiye Saulo, koga Saulo ne balanda bakakomba Dafite ne bathu babe kuti bababhate. 27Kukaswika ntumwa kuna Saulo, kandwa kati, “Tjimbidza ubuye, Bafilisitiya bangina nge ngwa mu shango kuwoitapa.”
28Ndizo Saulo kaletjedza kulonda Dafite, kabe eyenda enogwa ne Bafilisitiya, Ndizo wale pathu ipapo pakadang'wa kuyi Shongwe ye Kupudzumuka. 29Kudwa ipapo Dafite wakayenda kanogala mu matizhilo ye Enigedi.
Kalanga Bible © Bible Society of Botswana, 2008, 2018.