1 Samuele 19
19
Dafite unosumikilisiwa ndi Saulo
1Saulo wakabudza nkololo uwe Jonatani ne balanda babe bose ngekwe kubulaya Dafite. Koga Jonatani wakabe ne ludo gukulu kwazo muna Dafite. 2Jonatani kadwa Dafite kati, “Tate bangu Saulo banogwisa zila ye kukubulaya, tjimuka mangwanana uzwitjengete, utizhe unobgwata. 3Ndowobhudila kuzhe, anoma na tate pa shango pa unowobe ulipo, alebeleka na tate nge kuko, ngono ndowokubudza tjandinowobe ndabona.” 4Jonatani wakaleba bubuya ngekwa Dafite na tate babe Saulo, ebadwa eti, “Mambo ngabasithame tjibi ngekwe nlanda wabo Dafite, ngobe iye akuna tjaakamutjinya nditjo, nenge zwaakathama, zwaakabe ne mbuzilo wulu kwazo mu muli. 5Wakalonga butjilo gugwe mu mbatsha paakabulaya Nfilisitiya, ngono Yahwe bakazhisila Iziraela yose kukunda kukulu kwazo. Makakubona, mukashatha, ngono ini mungathama tjibi nge kutebula malopa asina nlandu nge kubulaya Dafite asina nlandu kene?” 6Saulo katola dama la Jonatani, katuna kati, “Ndolebesa, na Yahwe banotjila, Dafite aatowobulawa.” 7Ndizo Jonatani kadana Dafite kanlondela zose zwalebgwa. Kantola kan'yisa kuna Saulo, ngono Dafite kabgwiliziwa mu nshingo uwe wa kale.
8Ngwa ikamuka kakale, ngono Dafite kabhuda kanogwa ne Bafilisitiya. Kagwa nabo nge masimba kababulaya kwazo, bakadwa panli bakatizha.
9Ngono meya mibi inodwa kuna Yahwe ikadelukila muna Saulo, aligele mu ng'umba iye akabhata thumo nge luboko, kukati Dafite elidza harepa, 10Saulo kagwiso kothomelela Dafite mu guma nge thumo, koga kalidzeta, kuti thumo linobhaya mu guma. Dafite katizha, kanyeluka mu busiku igogu.
11 #
Njimbo 59
Saulo wakatumila balume ku ng'umba ya Dafite kuilinda, kuti bambulaye mangwanana. Koga nkadzi wa Dafite Mikhali kanluma zebe kati, “Ha usingake ukatizha busiku igogu kuzwitjidza, mangwana unowobulawa.” 12Mikhali kathukisa Dafite nge fesitere, katizha kapudzumuka lufu. 13Mikhali katola ifano tje ndzimu wakabezhiwa katjikushika pa bulawo, katjisazamidza nsazamilo we bukuse gwe mbudzi, katjifukidza nge ngubo. 14Kwakati Saulo atuma bathu kunobhata Dafite, Mikhali kabadwa kati, “Unogwala.” 15Ndizo Saulo kabgwiliza bathu kuti banobona Dafite, kabadwa kati, “Munsenge nge bulawo gugwe muzhise ku ndili, ndimbulaye.” 16Kwakati balume bengina mukati, bakawana tjifano tje ndzimu wakabezhiwa tjili lele pa bulawo, ne nsazamilo we bukuse gwe mbudzi pa misholo yatjo. 17Saulo kadwa Mikali kati, “Hwutini wanditjebela kwakajali, waletjedza tjita tjangu tjiyenda, kuti ndizo apudzumuke kene?”
Mikali kashandula Saulo eti, Wakandidwa kati, “Undiletje ndiyende, ndisidwe ndikubulaya.”
18Kwakati Dafite atizha apudzumuka, kayenda kuna Samuele ku Rama, kaswika kambudza zose zwaakathamwa ndi Saulo. Ndizo iye na Samuele bakayenda ku Naioti bakanogalako. 19Saulo kalumwa zebe kuyi, “Dafite uku Naioti ku Rama.” 20Ndizo Saulo katuma bathu kunotola Dafite. Kwakati bebona goko le balebesambeli lili mu kulebesambeli na Samuele alimile ali iye nsholo wabo, meya ye Ndzimu ikabhata batumwa ba Saulo, naibo bo bakabe mu meya bakalebesambeli. 21Kwakati Saulo ebudziwa ngekwe kuthu ikoku, katuma bathu bamwe, naibo bakalebesambelibo. Saulo katuma bathu kakale gwe butatu, na ibo bakalebesambeli bo. 22Ndizo Saulo kazwiyendigwa ku Rama. Kaswika pa tshime gulu limu Seku, kabhuzwa kati, “Bangayi Samuele na Dafite kene?” Ngono mmwe kan'dabila kati, “Baku Naioti ku Rama.” 23Kayenda ko, wakati akalinga Naioti mu Rama, meya ye Ndzimu ikadelukila munli. Kwakati akabhata eyenda, kalebesambeli, kudzina enoswika ku Naioti mu Rama. 24#1 Samuele 10:11, 12Kazwiambula zwiambalo, na iyebo kalebesambeli mbeli kwa Samuele. Kakandalala ali mbujo sikati ilelo lose ne busiku igugo gose. Ndipo pakatangisa ndebeleko inoti, “Apa Saulo na iyebo upakati kwe balebesambeli?”
Kalanga Bible © Bible Society of Botswana, 2008, 2018.