1 Samuele 16
16
Kuzhodziwa kwa Dafite
1Yahwe Bakabhuzwa Samuele bakati, “Apa kowodza kukabe lini ulilila Saulo, ha ndakanlamba kuti abe mambo we Iziraela? Zhadza lunyanga gugo mafuta umilike uyende, ndokutuma kuna Jesi we N'bhetilehema, ngobe ndakashalula mmwe we bakololo babe kube mambo.” 2Samuele kashandula eti, “Ndowoyenda tjini kene? Saulo ha angahwa nge kwako, unowondibulaya.” Ngono Yahwe bakan'dwa bakati, “Tola ng'ombe pholombe uswike uti, ‘Ndazha kuwopisila Yahwe tjibhayilo.’ 3Ukoke Jesi azhe ku tjibhayilo, ndowokulakidza tjaunowothama, unowondizhodzela iye wandinowokutendekela.” 4Samuele kathama tjaakadwiwa ndi Yahwe, wakati eswika ku Bhetelehema batungamili be nzi nkulu bakanshanganidza betetema, bakambhuzwa bakati, “Apa mazha nge mbakiso kene?” 5Samuele kabe eti, “Tjose nge mbakiso, ndazha kuwopisila Yahwe tjibhayilo, Muzwitjenepadze mungine nami mu tjibhayilo.” Katjenapadza Jesi ne bakololo babe, kabakoka kuzha ku tjibhayilo.
6Bakati basinozha, katilika Eliabu mesho kakumbula eti, “Tjoselele nzhodziwa wa Yahwe umbeli kwabo.” 7Koga Yahwe bakadwa Samuele bakati, “Usilinge mbumbiko eyi, kene tjimo tjekukula kukwe, ngobe ndanlamba, Yahwe abatobona sekwa kunobona bathu tjinyama, bathu banolinga mbumbiko ye nthu, koga Yahwe banolinga moyo.” 8Ndizo Jesi kadana Abinadabu, kampitsha mbeli kwa Samuele. Samuele kabe eti, “Ndodwa, Yahwe abazonshalula iwoyu.” 9Jesi akati Samma apindebo po. Samuele kabe eti, “Ndodwa Yahwe abazonshalula iwoyu.” 10Jesi kapitsha bakololo babe bali kutendeka mbeli kwa Samuele, ngono Samuele kadwa Jesi kati, “Yahwe abana wabashalula muna ibaba.” 11Samuele kabhuzwa Jesi kati, “Apa bakololo babo ndibo bose ibaba kene?” Ngono kadabila eti, “Kwasala we kologwe, ngono wakalisa pkhwizi.” Ipapo Samuele kwadwa Jesi kati, “Tuma mmwe anontola, atitowogala pasi kuswikila eswika ipapa.” 12Ndizo Jesi katuma nthu kanozha naye. Wakabe ekwidzima, ana mesho mabuya, kakale ali mbuya. Yahwe bakabe beti, “Milika unzhodze, ngobe ndiye iwoyu.” 13Ndizo Samuele katola lunyanga gwe mafuta, kanzhodzela mbeli kwe bakulu babe, ngono kudwa mu zhuba ilelo kuyendila mbeli, meya ye Yahwe ikadelukila muna Dafite nge masimba. Samuele kamilika kayenda ku Rama.
Dafite unolidzila Saulo
14Ipapo meya ya Yahwe yakabe isitjipo muna Saulo, meya mibi yakatumwa ndi Yahwe ikammukila. 15Ngono balanda ba Saulo bakandwa bakati, “Bona meya mibi inodwa ku Ndzimu yamumukila. 16Tetshi, idwani balanda benyu banoshaka nthu we nyambi mu kulidza herepa, kowoti meya yakabipa inodwa ku Ndzimu yadelukila mu muli, unowomulidzila herepa, ngono mowotebama.” 17Ndizo Saulo kadwa balanda babe kati, “Mundiwanile nthu ungalidza zwinozipa, munzhise kundili.” 18Mmwe we bazhuzha kadabila eti, “Ndakabona nkololo wa Jesi we N'bhetelehema we nyambi mu kulidza, nlume wakasima tjilopa, wakasima mu ngwa, i nyambi ye ndebo, kakale mbuya kulingwa, ngono Yahwe banaye.” 19Ndizo Saulo katuma batumwa kuna Jesi kunon'dwa beti, “Unditumile nkololo uwo Dafite unolisa pkhwizi.” 20Jesi wakatola donki katjibelesa tjiwunga ne gukhwa le nkumbi we zhambi ne tjibudzana, katuma nkololo uwe Dafite kunozwipa Saulo. 21Dafite kaswika kuna Saulo, kangina mu nshingo uwe. Saulo wakan'da kwazo, kanthama nsengi we zwibhayano zwizwe. 22Ndizo Saulo wakatumila dama kuna Jesi eti, “Ndokumbila kuti musunungule Dafite agalile tjose mu nshingo wangu, ngobe ndan'da.” 23Kwakabe kuti meya mbi inodwa ku Ndzimu idelukila muna Saulo, Dafite kabe etola herepa iye elidza, Saulo ebe ewiligwa etebama, meya mbi ibe ibhuda munli.
Kalanga Bible © Bible Society of Botswana, 2008, 2018.