1 Samuele 13
13
Ngwa ne Bafilisitiya
1Saulo wakabe ana makole ali makumi matatu ha etangisa kubusa, ngono kabusa Iziraela makole mabili. 2Saulo wakashalula balume bali zwiwulu zwitatu (3 000) mu Iziraela, bali zwiwulu zwibili (2 000) bakabe banaye ku Mikimashi ne ku shango ye matuthu ye Bhetele, ngono bali tjiwulu (1 000) bakabe bana Jonatani ku Gibiya mu Bhenjamini. Balume bakasala kabashandusila ku mizi yabo.
3Jonatani wakakunda kampa ye babhayani be Bafilisitiya bakabe bali ku Gebha, ngono Bafilisitiya bakahwa ngekwako. Ngono Saulo kalidza lunyanga shango yose eti, “Bahebheru ngabahwe!” 4Ndizo Baiziraela bose bakahwa kuti Saulo wakunda mphatho we babhayani be Bafilisitiya, nenge kuti Iziraela yatjibengiwa nge Bafilisitiya. Ngono bathu bakadang'wa kunobhatshana na Saulo ku Giligala.
5Bafilisitiya bakakubunganila kubhayana ne Iziraela, bakabe bana koloyi dze ngwa dzili zwiwulu zwili makumi matatu (30 000) ne batathi be mbizi bali zwiwulu zwili zwitathatu (6 000) ne babhayani banjinji se nsetje umu phili ye gungwa. Bakatathila bakakubungana ku Mikimashi ku bhezhuba kwe Bhetiaveni. 6Kwakati balume be Iziraela bebona kuti babe mu tjimo tjakamanikana, ngobe bathu bamanikana kwazo, bakabgwata mu makuhwu ne mu mwina ne mu shongwe ne mu zwikumbu ne mu matshime akakopogwa mu shongwe. 7Bamwe Bahebheru ibo bakatjuluka gwizi gwe Jorodani bakayenda ku shango ye Gadi ne Giliyadi.
Saulo wakabe atji ku Giligala, ngono bathu bose bakantobela betetema. 8#1 Samuele 10:8Wakalinda kwe mazhuba ali kutendeka, tjili tjibaka tjakabe tjabigwa ndi Samuele, koga Samuele aazozha ku Giligali, ngono bathu bakatangisa palala. 9Ndizo Saulo kabe eti, “Zhisani tjibhayilo tjinopisiwa ne tjibhayilo tje mbakiso.” Ngono kapisa tjibhayilo tjinopisiwa. 10Wakati koga epedza kupisa tjibhayilo, Samuele kabe eswika, ngono Saulo kabhuda kunonshanganidza endumilisa. 11Samuele kambhuzwa kati, “Apa wathamani kene?”
Saulo kadabila eti, “Ndakati ndibona kuti bathu banopalala bendisiya, ne kuti imwi amuzozha nge zhuba lamakabiga, ngono Bafilisitiya bakubungana ku Mikimashi, 12azwidwa ati, ‘Ngwenu Bafilisitiya bawodelukila kundili ku Giligala, ngono andizokumbila bhatsho ya Yahwe.’ Ndizo azwisunga, athama tjibhayilo.”
13Samuele kadwa Saulo kati, “Wathama bulengwe, auzolondolodza nlayo wa Yahwe Ndzimu uwo, wabakakulaulila, ngobe Yahwe babe bowosimisa mbuso uwo mu Iziraela nge kusingapele. 14#Mishingo 13:22Koga ngwenu mbuso uwo autjowodwilila, naiko Yahwe batjizwishakila nlume upa moyo wabo, Yahwe bambiga kube ntungamili we bathu babo, ngobe iwe auzolondolodza nlayo wabo.”
15Ndizo Samuele kamilika kazwiyendilazwe kudwa mu Giligala. Bamwe bathu bakatobela Saulo kungina mu babhayani, bakayenda kudwa mu Giligala kunoti ku Gibeya mu ntuthu we Bhenjamini. Saulo wakabala bathu baakabe anabo, bakabe bali balume bali mazana ali kutathatu (600). 16Saulo ne nkololo uwe Jonatani ne bathu bakabe banabo bakabe begala mu Gebha mu ntuthu we Bhenjamini, Bafilisitiya ibo bakakubunganila ku Mikimashi. 17Mu mishasha ye Bafilisitiya kwakabhuda makoko e babhayani matatu, goko limwe lakalinga kuyendila ku Ofira, ku shango ye Shuali, 18limwe goko likalinga kuyendila ku Bhetihoroni, ngono limwe likalinga kuyendila ku n'gathu kudelukila ku nkuku we Zeboyimi kuyendila ku tjilambanyika.
19Ipapo kwakabe kusina nthuli mu shango ye Iziraela yose, ngobe Bafilisitiya bakabe bati, “Bahebheru bangadwa bezwithamila makanu kene mathumu.” 20Ndizo Baiziraela bakabe bogala beyenda benokuswisa zwikara zwabo ne bhosipiki ne mashathu ne sikili ku Bafilisitiya. 21Themba ye kuswiwa kwe ikara ne bhosipiki yakabe ili zwikwamu zwibili mu butatu zwe shekele ne ikwamu tje butatu tje shekele kukuswa mashathu ne kululwamisa lukombo gunobhaya ng'ombe dzitethegwa. 22Ndizo kwakati nge zhuba le ngwa, kukabe kusina bukanu kene thumo lingawang'wa mu luboko gwe mmwe we babhayani bakabe bana Saulo na Jonatani. Koga Saulo ne nkololo uwe Jonatani bakabe banazo.
23Ipapo mphatho we babhayani be Bafilisitiya wakabe wabhudila kuzhe ku nkoto we Mikimashi.
Kalanga Bible © Bible Society of Botswana, 2008, 2018.