1 Samuele 1
1
Elikana ne nsha uwe ku Shilo
1Kwakati ntolo kukabe kuna mmwe nlume we Ramataimu Zofimu mu shango ye matombo e Ifureimi, we zina lakabe liyi Elikana nkololo wa Jerohamu, Jerohamu ali nkololo wa Elihu, Elihu ali nkololo wa Tohu, Tohu ali nkololo wa Zufu we N'ifureimi. 2Elikana wakabe ana bakadzi babili, mmwe edang'wa Hana, mmwe kuyi Penina. Penina wakabe ana bana, koga Hana asina bana. 3Gole ne gole nlume iwoyu wakabe edwa mu nzi wa kanyi kwabo etathila ku Shilo enonamata ne pisila Yahwe Ndzimu Masimbawose zwibhayilo, ikoko kwakabe kuna bana ba Eli babili bali bapirisiti ba Yahwe, Hofuni na Finihasi. 4Kwakabe kuti zhuba ha laswika lekuti Elikana apise tjibhayilo, wakabe edusa mitezho ye nyama epa nkadzi uwe Penina ne bakololo ne bakololokadzi babe bose. 5Koga se akabe eda nkadzi uwe Hana, wakabe empa ntezho uwe kabili, nenguba Yahwe bakabe bannyima mbeleko. 6Ngono nlongwana uwe wakabe egala entanga ngoti Yahwe bakannyima mbeleko. 7Kwakadwilila kwakajalo gole ne gole. Wakabe eti ha eyenda ku Ng'umba ya Yahwe, nlongwana uwe wakabe entanga kudzina elila ebuya elamwa zojiwa. 8Nlume wa Hana, Elikana wakabe esondwa eti, “Hana, apa unolilani kene? Ini usingaje kene? Wakashobeswa moyo ngeni kene? Apa anditokugadzamoyo kupinda bakololo bali gumi kene?”
Hana na Eli
9Kwakati bali mu Shilo, bapedza kuja ne kung'wa, Hana kamilika. Ipapo mpirisiti Eli wakabe ali gele tjigalo pa hwunde ne phanda ye nkoba we Ng'umba ya Yahwe. 10Nge kuhwa zogwadza, Hana kalila kwazo, ngono katembezela kuna Yahwe. 11#Mbalo 6:5Ndizo katuna kati, “Imwi Yahwe Ndzimu Masimbawose, ha mabe mungalinga kudziyidzika kwe nlandakadzi wenyu, ngono mukandikumbula, mukasikangang'we nlandakadzi wenyu, koga mukapa nlandakadzi wenyu mwana we tjilisana, ipapo ndowompa Yahwe butjilo gugwe gose, ngono akuna lupando gunowontesela mu nsholo uwe.” 12Wakati akadwilila etembezela mbeli kwa Yahwe, Eli wakabe akalingisisa nlomo uwe. 13Hana wakabe etembezelela mu moyo, milomo iye izunguzika, koga hwi lile lisingahwike, ndizo Eli kakumbula kuti wakalaladza. 14Ngono kambhuzwa eti, “Apa kowodza kukabe lini wakalaladzazo kene? Thubukana ne nkumbi uwo iwoyo!” 15Koga Hana kan'dabila eti, “Akuzojalo tetshi wangu, imi ndi nkadzi wakadziyidzika kwazo, andizotongo ng'wa nkumbi we zhambi nakuto guli busukwa dumbu, ndadusila Yahwe meya yangu. 16Musitole nlandakadzi wenyu se nkadzi usi we tjimwe, tjinga kwandatembezela nge shungu nenge kuhwa zogwadza kukulu kwazo kuswikila ngwenu.” 17Eli kan'dabila eti, “Yenda nge mbakiso, Ndzimu we Iziraela ukupe tjaunokumbila muuli.” 18Hana kadabila eti, “Dzene tshene mungabe ne ngoni mu nlandakadzi wenyu.” Ipapo nkadzi iwoyo kayendazwe, kaja, ne buso gugwe gwakashaladuka asitji mu kuhwa zogwadza.
Kuzwagwa ne piwa Ndzimu kwa Samuele
19Tjimuka mangwanana Elikana ne be nsha uwe bakanamata Yahwe, kudwa ipapo bakabgwilila kanyi kwabo ku Rama. Elikana kawalilana ne nkadzi uwe Hana, ngono Yahwe bakankumbula. 20Kuyenda nge tjibaka Hana kazwisenga kawana mwana we tjilisana kantumila zina eti Samuele, edwa kuti, “Ndakankumbila kuna Yahwe.” 21Nlume iwoyo Elikana ne nsha uwe bakayenda ku Shilo kunopisila Yahwe zwibhayilo zwe gole ne kunoshingikadza kutuna kukwe. 22Koga Hana kasiyende, kadwa nlume kati, “Kowoti mwana asinopkhwisiwa, ndowontola anon'yisa kuna Yahwe, ngono unowogalako tjatjose.” 23Nlume uwe Elikana kanshandula eti, “Thama tjaunobona tjakakululwamila, galazo kuswikila umpkhwisa. Koga Yahwe bashingikadze dama labo.” Ndizo Hana wakagala mu nzi elela mwana uwe kuswikila empkhwisa. 24Kwakati asinobe ampkhwisa, atji ntikinini kantola kayenda naye, akatakula nkong'wana we makole matatu akasenga hwomo ye bgwisa gwe tjiwunga ne gukhwa le nkumbi we zhambi, kan'yisa ku Ng'umba ya Yahwe ku Shilo. 25Ndizo bakabhaya nkong'wana, bakayisa mwana kuna Eli. 26Ngono Hana kadwa Eli kati, “Tetshi wangu! Se mutjatjila tetshi wangu, ndimi nkadzi wakabe alimile ipapa mbeli kwenyu, nditembezela Yahwe. 27Ndakatembezela ndikumbila mwana iwoyu, ngono Yahwe bakandipa tjandakakumbila mubali. 28Ndizo imi ndampila kuna Yahwe, butjilo gugwe gose unowobe wa Yahwe.”
Ngono bakanamata Yahwe ikoko.
Kalanga Bible © Bible Society of Botswana, 2008, 2018.