1 Bomambo 6
6
Solomoni unobaka Ng'umba ye Ndzimu
1Shule kwe makole ali mazana ali manna ana makumi ali zhanakadzi (480) Baiziraela babhuda mu shango ye Egipiti, mu gole le bunna le mbuso wa Solomoni mu Iziraela, mu mwedzi we Zivi uli mwedzi we bubili mu gole, Solomoni katangisa kubaka Ng'umba ya Yahwe. 2Solomoni wakabaka Ng'umba ya Yahwe ili bulefu gwe thambo dzili makumi mabili ana kutendeka (27), bupabi guli thambo dzili zhanalume, kudwa pasi kuyenda pezhugwi ili thambo dzili gumi lina kutatu kuna gaswa (13.5). 3Ng'umba ye kutanga usathu ukangina ku bugalo gwakayengemala yakabe ili thambo dzili nna dzina gaswa (4.5) kuyenda pasi, ili bupabi gwe thambo dzili zhanalume gulizana ne bupabi gwe bugalo gwakayengemala. 4Kathama Ng'umba ye Ndzimu ina mafesitere matetjanana kuzhe, mukati ali mapabi. 5Kabaka zwing'umbana zwakatathikana zwakabhatana ne guma le Ng'umba ye Ndzimu kuipoteleka ne kupoteleka bugalo gwakayengemala. 6Budzilo gwa pasi gwakabe guli bupabi gwe thambo dzili mbili dzina zwipithu zwibili (2.2), budzilo gupakati gwakabe guli bupabi gwe thambo dzili mbili dzina zwipithu zwili kutendeka (2.7), budzilo gwe butatu, gwakabe guli bupabi gwe thambo dzili thatu dzina ipithu (3.1). Kupoteleka tjakuzhe kathama mathudzi e guma kuitila kuti makwasayile asipubuligwe mu guma le ng'umba.
7Mabgwe akabe ebaka Ng'umba ye Ndzimu akabe ebezhegwa kunokobolegwa mabgwe, kuti ha Ng'umba ye Ndzimu ibakiwa kusihwike nsindo we hamuli kene we shathu kene uli we gumwe butale.
8Nkoba we Ng'umba ye Ndzimu ku budzilo gupakati wakabe wakalinga ku burwa, ngono kuna matathilo kuyenda ku budzilo gwe bubili kudwa pasi kuyenda pezhugwi ne kudwa muna gwe bubili kuyenda pezhugwi kuna gwe bupelo. 9Solomoni wakabaka Ng'umba ye Ndzimu kaipedza, kathama denga nge thungo ne mapulanka e sida. 10Wakabaka dzimwe ng'umba kupoteleka Ng'umba ye Ndzimu yose. Bulefu gwe imwe ne imwe yadzo kudwa pasi kuyenda pezhugwi gwakabe guli thambo dzili mbili dzina ipithu tje bubili mu gumi (2.2), dzakabe dzakabhatshanyiwa ne Ng'umba ye Ndzimu nge mapango e sida.
11Dama la Yahwe likazha kuna Solomoni liti, 12“Ngekwe Ng'umba yaunobaka, ha utobela milayo yangu yose, ndowoshingikadza dama langu mukuli, landakaleba na Dafite tate babo. 13Ndowogala pakati kwe Baiziraela, andingalashe bathu bangu Baiziraela.”
14Solomoni wakabaka Ng'umba ye Ndzimu kaipedza.
Zwija zwimukati kwe Ng'umba ye Ndzimu
(2 Zwiyitikalo 3:8-14)
15Kazwimba guma le ng'umba tjamukati nge mapulanka e sida, kudwa pasi kunoswika ku thungo. Ngono budzilo kaguthama nge mapulanka e misipuri. 16#Kufuluka 26:33, 34Tjamukati kabaka ng'umba nge mapango e sida ili bugalo gwakayengemala gwakabe gudang'wa Bugalo gwakayengemala kupindisa edwa pasi enoti ku thungo. Bulefu gwayo kudwa pasi yakabe ili thambo dzili zhanalume. 17Ng'umba yakabe ili mbeli kwe Bugalo gwakayengemala kupindisa yakabe ili bulefu gwe thambo dzili gumi lina zhanakadzi (18). 18Mapango e miti ye sida akabe ali tjamukati kwe ng'umba akabe akakobolegwa zwifano zwe zwiteme ne maluba. Kuboneka mapango e sida koga, kusina bgwe linoboneka.
19Wakalulwamisa bugalo gwakayengemala gutjamukati gumukati kwe Ng'umba ye Ndzimu, kuti kubigwe Bhokisi le Tjidumano tja Yahwe. 20Bugalo gwakayengemala gutjamukati gwakabe guli bulefu gwe thambo dzili zhanalume ne bupabi gwe thambo dzili zhanalume kudwa pasi kuyenda pezhugwi thambo dzili zhanalume, guma le ng'umba lakabe lakadzulugwa nge golide lose. Tjibeso tje zwibhayilo tjakabe tjakabakwa nge mapango e sida. 21Solomoni kadzulula Ng'umba ye Ndzimu nge golide yakatjena mukati. Katjinjika ketani dze golide mbeli kwe bugalo gwakayengemala gutjamukati, kagudzulula nge golide. 22#Kufuluka 30:1-3Mukati kose kwakabe kwakadzulugwa nge golide. Wakadzululabo tjibeso tjinopisigwa zwibhayilo tje bugalo gwakayengemala gutjamukati nge golide.
23 #
Kufuluka 25:18-20
Mukati kwe bugalo gwakayengemala gutjamukati kabiga dzikherubhu mbili dzakabezhiwa nge lukuni gwe ntoba, imwe ne imwe ili bulefu gwe thambo dzili nna dzina zwipithu zwinna (4.4). 24Bhapilo le kherubhu lakabe lili bulefu gwe thambo dzili mbili dzina zwipithu zwibili (2.2), limwe bhapiro lili bulefu gwe thambo dzili mbili dzina zwipithu zwibili (2.2). Ndizo bulefu gwe kudwa ku theswi ye limwe bhapilo kunoti ku theswi ye limwe dzakabe dzili thambo dzili nna dzina zwipithu zwinna (4.4). 25Kherubhu imwe yakabe ilizana thambo dzili nna bo dzina zwipithu zwinna (4.4), bubili gwadzo dzakabe dzifanana kakale dzilizana. 26Bulefu gwe kherubhu dzose bubili gwakabe guli thambo dzili nna dzina zwipithu zwinna (4.4) imwe ne imwe yadzo. 27Wakabiga dzikherubhu dzakabapa mukatikati kwe Ng'umba ye Ndzimu dzakazhula mapapilo adzo kuti bhapilo le imwe kherubhu likuthe guma ku ndzibo mmwe likuthe guma ku ndzibo mmwe, mamwe mapapilo ekuthana pakati kwe ng'umba. 28Ngono kakuyunga dzikherubhu nge golide.
29Kakobolela zwifano zwe dzikherubhu ne zwe miti ye milala ne maluba mu makuma wose tjamukati na kuzhe. 30Budzilo gwe ng'umba kagudzila nge golide mukati na kuzhe. 31Nkoba we bugalo gwakayengemala gutjamukati kaguthamila matendele e mapango e mitoba. Pezhugwi kwe makoko ne makwasayile e nkoba kukabe midzibo ili mishanu. 32Kanakisa matendele mabili e mapango e ntoba nge dzikherubhu ne miti ye milala ne maluba kwakakobolegwa. Kadzulula dzikherubhu ne miti ye milala nge golide. 33Nkoba unonginila ku bugalo gwakayengemala kauthama nge makwasayile e ntoba midzibo ili minna. 34Ne matendele mabili anopetiwa e mapango e misipuri. 35Mu matendele kakobolela dzikherubhu ne miti ye milala ne maluba akazhuka, kati akobolela zwithu izwezwi kazwidzulula nge golide. 36Kabaka nsha wa mukati mitiliyane ili mitatu ye mabgwe akabezhiwa akawaligwa nge mapango e sida ntiliyane mmwe ne mmwe.
37Mu gole le bunna thiwa dze Ng'umba ya Yahwe dzakawagwa mu mwedzi unoyi Zivi. 38Mu mwedzi we buzhanakadzi unoyi Bhulu, mu gole le bugumi lina gole ling'ompela Solomoni ebusa, Ng'umba ye Ndzimu ikapela bakwa sekwa yakabe yakafanila bakwa ndiko. Solomoni wakatola makole ali kutendeka eibaka.
Kalanga Bible © Bible Society of Botswana, 2008, 2018.