1 Bomambo 13
13
1Ngono bonani, nlebesambeli we Ndzimu kadwa mu Juda kayenda ku Bhetele atumwa ndi Yahwe, kati eswikako kawana Jeroboamu alimile pa tjibeso tjinopisigwa zwibhayilo episa tjibhayilo. 2#2 Bomambo 23:15, 16Ngono nlebesambeli we Ndzimu kamimila etjemela tjibeso tjinopisigwa zwibhayilo nge dama la Yahwe eti, “Iwe tjibeso tjinopisigwa zwibhayilo, iwe tjibeso tjinopisigwa zwibhayilo! Yahwe banolebeleka bakati, ‘Bona, kowozwagwa nkololo mu ng'umba ya Dafite, unowodang'wa zina kuyi Josiya, ngono unowobhayila bapirisiti banopisila zwibhayilo zwe mafupa e bathu mukuli, pezhugwi kuko.’ ” 3Ngono mu zhuba ilelo zwalo, nlebesambeli we Ndzimu kapa tjilakidzo tjinoti, “Yahwe bapa tjilakidzo tjinoti, ‘Bona, tjibeso tjinopisigwa zwibhayilo tjowophatuka na pakati, milota imutjili ikatebukila pasi.’ ”
4Kukati Mambo Jeroboamu ehwa tjalebgwa nge nlebesambeli we Ndzimu emimila etjemela tjibeso tjinopisigwa zwibhayilo tjiku Bhetele, Jeroboamu kadusa luboko gugwe pa tjibeso tjinopisigwa zwibhayilo, katendeka nlebesambeli kati, “Mumbhate.” Ngono luboko gwa akantendeka nlebesambeli we Ndzimu ndigo gukalobgwa nge gulukadzi kasitjatubule kugubuzila kunli. 5Tjibeso tjikaphatuka na pakati, milota ikatebukila pasi, kuyendidzana ne tjilakidzo tjakapiwa nge nlume we Ndzimu sekwa akadwiwa ndi Yahwe. 6Mambo Jeroboamu kakumbila nlebesambeli we Ndzimu kati, “Unditembezelele kuna Yahwe, Ndzimu uwo, ubakumbile bapodze luboko gwangu.”
Nlebesambeli we Ndzimu katembezela ekumbila kuna Yahwe, ngono luboko gwa mambo gukapodziwa, gukabe sekwa gwagala guli iko. 7Ipapo mambo kadwa nlebesambeli we Ndzimu kati, “Atiyende tose ku nzi, unoja zojiwa, ndokowokupa mboko muna tjawandithamila.”
8Ngono nlebesambeli we Ndzimu kadwa mambo kati, “Nenguba mungandipa gwamu limwe le thundu yenyu, andingayende namwi. Nakuto kuli kunoja kene kung'wa mu ng'umba iyeyi ye bushe. 9Ngoti ndadwiwa nge dama la Yahwe liti, ‘Usitongoja tjiwunga nakuto kuli kung'wa vula, nenguba kuli kushanduka nge zila yawazha ndiyo.’ ” 10Ndizo kasitongo shanduka nge zila yaakazha ndiyo, kashanduka nge zila ipoga.
Nlebesambeli we Bhetele wa ntolo
11Ipapo kukabe kuna sholotjena ye nlebesambeli igala mu Bhetele. Mmwe we bakololo bayo kazha ku ili kayibudza zose zwashingwa nge nlebesambeli we Ndzimu mu zhuba ilelo mu Bhetele. Bakabudza tate babo zwaakaleba kuna mambo. 12Tate babo bakabhuzwa beti, “Watobela zila ipi?” Ngono bakololo babe bakanlakidza zila yakatobegwa nge nlebesambeli we Ndzimu wadwa ku Juda. 13Kadwa bakololo babe kuti bambelesele donki, ngono bakambelesela iyo kabe eitatha. 14Kabe elonda nlebesambeli we Ndzimu, kanon'wana aligele kusi kwe nti nkulu we pakayengemala. Ngono kambhuzwa kati, “Ndiwe nlebesambeli we Ndzimu unodwa ku Juda kene?” Kadabila eti, “Ndimi.”
15Kabe endwa eti, “Ngatiyende tose ku nzi unoja zojiwa.”
16Ngono kanshandula eti, “Andingashanduke nawe, naiko kuyenda ndinoja tjiwunga kene kung'wa vula nawe mu magalo iyawa. 17Ngoti ndakadwiwa nge dama la Yahwe kukayi, ‘Usitongoja tjiwunga kene kuli kung'wa vula ikweno, naiko usitongo shanduka nge zila yawakazha ndiwo.’ ”
18Nlebesambeli wagala ali mu Bhetele kandwa kati, “Namibo ndi nlebesambeli sawe, ntumwa we Ndzimu walebeleka nami nge dama la Yahwe eti, ‘Kanshaduse azhe nawe ku nzi, kuti awoja tjiwunga abe eng'wa vula.’ ” Koga wakabe enyepa.
19Ndizo nlebesambeli we Ndzimu kashanduka naye, kanoja tjiwunga mu ng'umba iye, ebe eng'wa vula. 20Bakati batjigele pa tafuli dama la Yahwe likazha ku nlebesambeli wagala ali mu Bhetele. 21Ngono kamilidza hwi kati ku nlebesambeli we Ndzimu wakadwa ku Juda, “Yahwe, Ndzimu uwo bakati auzohwa dama la Yahwe, ngoti auzothama tjawakadwiwa ndi Yahwe Ndzimu uwo. 22Koga wakashanduka ukawoja tjiwunga ukabuya ukang'wa vula mu magalo abakakudwa bakati, ‘Usitongoja tjiwunga nakuto kuli kung'wa vula muali.’ Unowofa, ngobe wathama ikoko, ngono itumbu tjitjo atjitowobiganyiwa ku zwikumbu zwakabiganyiwa botate babo.”
23Bakati basinoja tjiwunga bang'wa vula, nlebesambeli wagala ali mu Bhetele kabelesela nlebesambeli donki iwoyu waashandusa mu zila. 24Katatha donki kayenda, ngono kashangana ne shumba mu zila ikambulaya. Itumbu tjitje tjikawila mu zila ngono donki ikama patjili ne shumba ikama bo patjili. 25Ngono bathu bakabe bepinda nge zila bakabona itumbu tjitje tjakawila mu zila ne shumba ilimile patjili. Bakanoleba mu nzi nkulu wakabe nlebesambeli wagala ali mu Bhetele egala muuli.
26Kukati nlebesambeli wakanshandusa ehwa nge kwako, kabe eti, “Nlebesambeli we Ndzimu, usakahwa dama la Yahwe. Ndizo Yahwe bakampa shumba, ndiyo yakampalulanya ikambulaya, kuyendidzana ne dama labo labakandwa.” 27Ngono kadwa bakololo babe kati bambelesele donki, bakabe bethama tjaabadwa. 28Katatha donki kabhuda kayenda, kanowana itumbu tje nlebesambeli tjakawila mu zila, donki ne shumba zwili mile patjili. Ngono shumba isaja itumbu kene kuli kupalulanya donki. 29Nlebesambeli wagala ali mu Bhetele kamilidza itumbu tje nlebesambeli we Ndzimu katjibelesa mu donki, kashandukila natjo ku Bhetele kunlilila ne kumbiganya. 30Wakabiganya itumbu mu ikumbu tjitje, benlilila beti, “Yee mme wee, ikamu tjangu, ikamu tjangu!” 31Shule kwe kumbiganya, kadwa bakololo babe kati, “Ha ndafa, mundibiganye mu ikumbu tjakabiganyiwa nlebesambeli we Ndzimu, mubapise mafupa angu ne awe. 32Ngoti ndebeleko yaakalebeleka nge dama la Yahwe ngekwe tjibeso tjinopisigwa zwibhayilo tjimu Bhetele, nenge kwe ng'umba dzose dzimu magalo akatuthumala dzimu mizi mikulu ye Samariya, aizowila pasi.”
33Shule kwe zwithu izwezwi, Jeroboamu kasishandukile mbipo iye, kadwilila eshalulila magalo akatuthumala bapirisiti kudwa mu bathu bose. Wakabe ebiga mmwe ne mmwe wakabe eshaka kube mpirisiti. 34Kuthu ikoko kwakabe tjibi mu ng'umba ya Jeroboamu, kukaipaladza, kukabuya kukailobesa mu shango.
Kalanga Bible © Bible Society of Botswana, 2008, 2018.