1 Zwiyitikalo 4
4
Zwizekugwana zwa Juda
1Bakololo ba Juda bakabe bali bo Perezi na Hezironi na Khami na Huri na Shobali. 2Shobali wakabe ali tate ba Reya, Reya ali tate ba Jahati, Jahati ali tate ba Ahumayi na Lehadi. Ibaba bakabe bali be ludzi gwe Bazora. 3Aba bakabe bali bakololo ba Etamu, ibo bakabe bali bo Jezirele na Ishima na Idibashi. Hazwadzi yabo wakabe ali Hazeleliponi. 4Penuele wakabe ali tate ba Gedori, Ezeri ali tate ba Hushahi. Ibaba bakabe bali zwizekugwana zwa Huri mbano ya Efurati iye wakasika Bhetelehema. 5Ashuhuri iye wakasika nzi we Tekowa wakabe ana bakadzi babili Hela na Naara. 6Naara kazwala Ahuzamu na Heferi na Temeni na Haahashitari. Ibaba bose bakololo ba Naara. 7Bakololo ba Hela bakabe bali bo Zereti na Izhari na Etinani. 8Kozi wakabe ali tate ba Anubu na Zobeba ne njudzi dze nkololo wa Harumi. 9Kwakabe kuna nlume wakabe etolegwa pezhugwi muna bakanyi kukwe kuyi Jabezi. Mmeyabe bakabe bampa zina beti Jabezi bedwa kuti bakantshibama bali mu zwibhayo zwikulu. 10Jabezi wakalila ku Ndzimu we Iziraela eti, “Ungati munga ndikombolela mukatalabudza ntuthu wangu! Ibeni nami, mundibakilile mu mbatsha kuti ndizo ndisibe mu tjimwe tjinga ndihwisa zogwadza.” Ngono Ndzimu ukampa tjaakabe ekumbila.
Be njudzi dzimwe
11Khelubu nnung'una wa Shuha wakabe ali tate ba Mehiri, Mehiri ali tate ba Eshitoni. 12Eshitoni wakabe ali tate babo Bheti Rafa na Phaseya na Tehina, Tehina ali tate ba Iri Nahashi. Ibaba bakabe bali balume be ku Reka. 13Bakololo ba Kenazi bakabe bali bo Othiniyeli na Seraya. Bakololo ba Othiniyeli bakabe bali bo Hathathi na Meonothai. 14Meonothai wakabe ali tate ba Ofira na Seraya, Seraya ali tate ba Joabu bhalule le Geharashimu, iyo yakabe idang'wa kuyi nkuku we bunyambi ngoti bathu bako bali nyambi dze kubezha. 15Khalebu nkololo wa Jefune wakabe ana bakololo bali batatu Iru na Ela na Naamu. Ela wakabe ali tate ba Kenazi. 16Jehalele wakabe ana bakololo bali banna Zifu na Zifa na Tiriya na Asarele. 17Bakololo ba Eziraha bakabe bali bo Jetheri na Meredi na Eferi na Jaloni. Meredi kalobola Bithiya nkololokadzi we Egipiti ngono bakazwala nkololokadzi Miriamu, Miriamu kawana bakololo babili Shamai na Ishibha tate ba Eshitemoa. 18Nkadzi we Njuta wa Meredi wakazwala Jaredi tate ba Gedori na Heberi tate ba Soko na Jekuthiele tate ba Zanowa. Ibaba bali bana be nkololokadzi wa Faro Bhitiya wakalobogwa ndi Meredi. 19Bakololo be nkadzi wa Hodiya hazwadzi ya Nahamu bakabe bali tate ba Keila we ludzi gwe N'gama na Eshitemoa we ludzi gwe Maakati. 20Bakololo ba Shimoni bakabe bali bo Amunoni na Rina na Bheni Hanani na Tiloni. Zwizekugwana zwa Ishi bakabe bali bo Zoheti na Bheni Zoheti.
Zwizekugwana zwa Shela
21Bakololo ba Shela, Shela ali nkololo wa Juda bakabe bali bo Eri tate ba Leka na Lada tate ba Mareshahi be ludzi gwe baluki be matyila ku Bheti Ashibeya, 22na Jokimu ne balume beku Kozeba na Joashi na Sarafu iye wakabusa shango ye Moabu ngono kabgwilila ku shango ye Lehemu. Thawu idzedzi ngedza ntolo tjose. 23Ibaba bakabe bali babumbi be hali begala ku Netaimu neku Gedera, bakabe begalako beshingila mambo.
Zwizekugwana zwa Simiyoni
24Simiyoni wakabe ana bakololo bali bashanu. Bakabe bali bo Nemueli na Jamini na Jaribu na Zera na Shaulo. 25Nkololo wa Shaulo wakabe ali Shalumu, Shalumu iye kazwala Mibisamu, Mibisamu iye kazwala Mishima. 26Zwizekugwana zwa Mishima bakabe bali bo Hamuele, Hamuele kazwala Zakhuri, Zakhuri iye kazwala Shimeyi. 27Shimeyi iye kazwala bakololo bali gumi lina bali tathatu ne bakololokadzi bali tathatu koga banung'una babe ibo bakabe basina bana ndizo nsha wose ukasibe ne bathu banjinji sewe bathu be Juda. 28#Joshuwa 19:2-8Zwizekugwana zwa Simiyoni zwakabe zwigala mu mizi ye Bheerisheba ne Molada neye Hazarishuali 29neye Bhiliha neye Ezemu neye Toladi, 30neye Bhethuwele neye Horima neye Zikilagi, 31neye Bheti Marikaboti neye Hazari Susimi neye Bheti Bhiri ne Shaaraimu. 32Mimwe ye mizi mishanu yabakabe begala yakabe ili Etamu ne Aini ne Rimoni ne Tokheni ne Ashani, 33ne mizi yakapoteleka kunoti ku Bhaale. Iyeyi yakabe ili mizi yabo ngono bakabiganya nge nkwalo njudzi dzabo. 34Misholo ye njudzi dzabo bakabe bali bo Meshobabu na Jamileki na Joshahi nkololo wa Amaziya 35na Jowele na Jehu, Jehu ali nkololo wa Joshibiya, Joshibiya ali nkololo wa Seraya, Seraya ali nkololo wa Asiele 36na Eliyonayi na Jaakuba na Jeshohaya na Asaya na Adiele na Jesimiele na Bhenaya na Ziza, 37Ziza ali nkololo wa Shifi, Shifi ali nkololo wa Aloni tjizekugwana tja Jedaya ba Shimiri na Shemaya. 38Bose ibaba balebgwa bakabe bali misholo ye misha yabo. Misha yabo yakakula ikawanda kwazo, 39bakatendebukila ku golombedzo pejo ne Gedori, bakabe beshakila pkhwizi ne mbudzi dzabo mafulo ku bhezhuba kwe nkuku. 40Ikoko bakawana mafulo akanaka ne shango yakazhuka ina mbakiso ne kunyalala, bagali bayo bekutanga bakabe bali bathu be Hamu. 41Ngono ibaba bakakwagwa nge mazina bakayendako mu misi ya Hezekiya mambo we Juda, bakaswika bekolomola mishasha yabo kose neye Bameuni bakabe begalabo ko. Bakabatatila kutjena tjatjose ngono bakagala mu shango yabo ngoti yakabe ina fulo le pkhwizi ne mbudzi dzabo. 42Mazana ali mashanu e balume ibaba be Basimiyoni bakabe bakatungamigwa ndi Pelatiya na Neriya na Refaya na Uziele ne bakololo ba Ishi, ibo bakanonginilila shango ye matombo ye Seiri. 43Bakabulaya malimbelimbe e Baamaleki bakabe bapudzumuka ngono bakagala ikoko na nasi.
Kalanga Bible © Bible Society of Botswana, 2008, 2018.