1 Zwiyitikalo 22
22
1Ipapo Dafite kabe eti, “Ipapa ndipo pakunowobe Ng'umba ya Yahwe Ndzimu ne pakunowobe tjibeso tjinopisigwa zwibhayilo zwinopisiwa zwe Iziraela.”
Lulwamisila bakiwa kwe Ng'umba ye Ndzimu
2Ngono Dafite kadusa ndaulo ye kuti kukubunganyiwe bataya bamu shango ye Iziraela, ngono kabiga babezhi be mabgwe kuti babezhe mabgwe anobaka Ng'umba ye Ndzimu. 3Dafite wakadusa butale bunjinji gunothama zwipikiri zwili zwinothama zwizhalilo zwe mikoba ne zwinobhatshanya, kadusa kakale ne phangula isi shoma, 4ne mapulanka e nti we sida manjinji ngobe Basidoni ne Batire bakabe bapa Dafite mapulanka manjinji. 5Ngono Dafite wakabe akumbula eti, “Solomoni nkololo wangu utji ntjetjana kakale aathu kabe ne luzibo ngono Ng'umba ye Ndzimu yakafanila bakiwa yakanaka kupindisisa, ina tjilumbi kakale yakanaka kupinda mu ntuthu wose. Ndizo ikoko ndowokululwamisila.” Ndizo Dafite kalulwamisa zwishingisiwa zwili zwinjinji asathu kafa.
6Kudwa ipapo Dafite kadana nkololo uwe Solomoni kanlaya kuti abake Ng'umba ya Yahwe Ndzimu we Iziraela. 7#2 Samuele 7:1-16; 1 Zwiyitikalo 17:1-14Wakadwa Solomoni kati, “Nkololo wangu, ndakabe nako mu moyo wangu kuti ndibakile zina la Yahwe Ndzimu wangu ng'umba. 8Koga dama la Yahwe likazha kundili liti, ‘Wakatebula lopa njinji kakale wakagwa ngwa dzili njinji, ndizo aungandibakile ng'umba ngoti wakatebula malopa manjinji mbeli kwangu mu shango. 9Ngono bona unowozwala mwana we tjilisana, unowobe nthu we mbakiso. Ndowompa mbakiso mu zwita zwizwe zose kupoteleka, ngono zina lile unowodang'wa kuyi Solomoni ngono ndowopa Iziraela mbakiso ne kunyalala mu mazhuba awe wose. 10Unowobakila zina langu ng'umba kukudza zina langu. Unowobe nkololo wangu, ndowobe tate babe ngono ndowosimisa tjigalo tjitje tje bushe mu Iziraela tjatjose.’
11“Ndizo ngwenu nkololo wangu, Yahwe ngababe nawe kuti ndizo ubhudilile mukubaka Ng'umba ya Yahwe Ndzimu uwo sekwa bakaleba nge kuko. 12Tshene Yahwe bangakupa butjenjedu ne hwisiso kuti ndizo ubuse Iziraela kuyendidzana nge nlayo wa Yahwe Ndzimu uwo. 13#Joshuwa 1:6-9Unowobhudilila ha ungabe ne njele kulondolodza milayo Yahwe yabakapa Mushe kuipa Iziraela. Sima ube nge tjilopa, usitje usitemeke mafupa. 14Ndakatukutila kubi ndilulwamisila Ng'umba ya Yahwe, ndakakubunganya talenta dze golide dzili zwiwulu zwili zwinna ne dzimiliyoni dze talenta dze siliva ne phangula ne butale bunjinji gusina mbalo, mapango ne mabgwe zwiyapo, ngono wakafanila kuti uzwipaphidze. 15Una bashingi bali banjinji: una bathuli be mabgwe ne babaki be mabgwe ne babezhi ne nyambi dze mishingo ngo siyana kwadzo kusina mbalo, 16una bashingi bana luzibo gwe golide ne siliva ne phangula ne butale. Tangisa ushinge, Yahwe babe nawe.”
17Dafite kadwa batungamili bose be Iziraela kuti babhatshe Solomoni nkololo uwe eti, 18“Apa Yahwe Ndzimu wenyu abanamwi kene? Apa abazomupa mbakiso kumwe ne kumwe kene? Ngoti bakathama kuti ndikunde bagali bose be shango iyeyi ngono ngwenu bapasi kwa Yahwe ne bathu babo. 19Ndizo ngwenu longa meya mu nyama kushaka Yahwe Ndzimu uwo. Milika bakila Yahwe Ndzimu bugalo gwakayengemala kuti ndizo Bhokisi le Tjidumano tja Yahwe ne zwishingisiwa zwakayengemala zwizhisiwe ku ng'umba inokudza zina la Yahwe.”
Kalanga Bible © Bible Society of Botswana, 2008, 2018.