1 Zwiyitikalo 18
18
Kukunda kwa Dafite
(2 Samuele 8:1-18)
1Kwakati shule kwa ikoku Dafite kakunda Bafilisitiya bakabe pasi kukwe ngono katola Gati ne mizi yakabe ili pasi kwayo mu maboko e Bafilisitiya.
2Wakakunda Moabu ngono Bamoabu bakabe balanda ba Dafite kakale bedusa mimwiso.
3Dafite kakale wakakunda Hadadezeri mambo we Zoba kuyendila ku Hamati, Hadadezeri wakabe atathila kunotola ntuthu uku gwizi gwe Yufuratesi. 4Ngono Dafite kantolela koloyi dze ngwa dzili tjiwulu (1 000) ne bataswi be mbizi bali zwiwulu zwili kutendeka (7 000) ne babhayani banoyenda nge makumbo bali zwiwulu zwili makumi mabili (20 000), ngono Dafite kathubula makanyu e mbizi dzinokweba koloyi dze ngwa, koga kasiya bakakwana kuyendisa koloyi dze ngwa dzili zana ling'ompela. 5Ngono kwakati Basiriya be Damasiko bezha kuwobhatsha mambo Hadadezeri mambo we Zoba, Dafite kabulaya balume bali zwiwulu zwili makumi mabili ana babili (22 000) be Basiriya. 6Kudwapo Dafite kabiga gupo le babhayani mu Siriya ye Damasiko ngono Basiriya bakabe balanda ba Dafite kakale bedusa mimwiso. Yahwe bakathama kuti Dafite akunde kumwe ne kumwe kwaakabe eyenda. 7Dafite katola zwivikili zwakathamwa nge golide zwakabe zwakasengwa ne balanda ba Hadadezeri ngono kazwiyisa ku Jerusalema. 8#1 Bomambo 7:40-47; 2 Zwiyitikalo 4:11-18Dafite wakabe atapa phangula ili njinji mu mizi mikulu ya Hadadezeri ku Tibhathi neku Khuni, ndiyo Solomoni yaakatola kathama gungwa gwe phangula ne phanda ne zwija zwinoshingisiwa mu Ng'umba ye Ndzimu.
9Ngono kwakati Tou mambo we Hamati ehwa kuti Dafite wakakunda babhayani bose ba Hadadezeri mambo we Zoba, 10katumila nkololo uwe Hadoramu kuna Mambo Dafite kuti anon'lezwa kakale ayite matjena kunli ngobe akagwa na Hadadezeri kankunda, ngobe Tou wakabe egala egwa na Hadadezeri ngono Hadadezeri e nkunda. Tou katumila zwija zwakathubukana zwakathamwa nge golide ne zwakathamwa nge siliva ne zwakathamwa nge phangula. 11Zwija izwezwi Dafite kazwitola kazwipa Yahwe kose ne siliva ne golide yaakabe atapa mu zwitjaba kudwa ku Edomu ne Moabu ne mu Baamoni ne mu Bafilisitiya neku Amaleki.
12 #
Njimbo 60
Ngono Abishayi nkololo wa Zeruya kabulaya Baedomu bali zwiwulu zwili gumi lina zhanakadzi (18 000) mu Nkuku we Mwenyu, 13ngono kabiga gupo le babhayani mu Edomu ngono Baedomu bakabe balanda ba Dafite kakale bedusa mimwiso. Yahwe bakathama kuti Dafite akunde kumwe ne kumwe kwaakabe eyenda.
14Ndizo Dafite kabusa mu Iziraela yose kakale kathama kuti kushingikadziwe ndulamo ne ndizandizano mu bathu babe bose. 15Joabu nkololo wa Zeruya wakabe akatungamila ngwa, Jehoshafati nkololo wa Ahiludi wakabe ali nkwalili, 16Zadoki nkololo wa Ahitubu na Ahimeleki nkololo wa Abiathari bakabe bali bapirisiti, Shavisha iye ali nkwalili, 17Bhenaya nkololo wa Jehoyada wakabe ali ntungamili we Bakereti ne Bapeleti; bakololo ba Dafite bakabe bali batungamili mu nshingo wa mambo.
Kalanga Bible © Bible Society of Botswana, 2008, 2018.