1 Zwiyitikalo 13
13
Bhokisi le Tjidumano lodusiwa mu Kiriatijearimu
(2 Samuele 6:1-11)
1Dafite kalebesana ne balauli be bali zwiwulu (1 000) ne be mazana (100) ne batungamili bose. 2Ngono Dafite kadwa gubungano lose le Iziraela kati, “Ha kwaka mululwamila kakale ha kuli kuda kwa Yahwe Ndzimu wedu ngati tumileni ndaidzo ku zwikamu zwedu mu mituthu yose ye Iziraela ne bapirisiti ne Balevi mu mizi yabo ngono tibadwe bashangane naswi ipapa. 3Kudwapo ngati buzeni Bhokisi le Ndzimu wedu ku tili ngobe takalilashilila mu misi ya Saulo.” 4Gubungano lose likaduma kuthama saikoko ngobe kwakabe kwakalulwama mbeli kwe bathu bose.
5 #
1 Samuele 7:1, 2 Ndizo Dafite kakubunganya Iziraela yose kudwa pa Gwizi gwe Shihori ye Egipiti kunoti ku nkoba we Hamati kuzhisa Bhokisi le Ndzimu kudwa mu Kiriatijearimu. 6#Kufuluka 25:22Dafite ne Iziraela yose bakayenda ku Bhaala hwuti Kiriatijearimu ye Juda kunotola Bhokisi le Ndzimu linodang'wa nge zina la Yahwe ibo bagele pezhugwi kwe dzikherubhu. 7Bakasenga Bhokisi le Ndzimu nge kara tshwa kudwa pa ng'umba ya Abinadabu, Uza na Ahio bakabe beyendisa kara, 8ha Dafite ne Iziraela yose bakabe bezana mbeli kwe Ndzimu nge mimoyo yabo yose bemba belidza zwilidzo zwe matende ne nyele ne zwe thamborini ne dzisimbali ne manyanga.
9Bakati beswika pa libuwa gwe Khidoni ngabe dzikabe dzitshatsharika ngono Uza katambunudza luboko gugwe kubhata Bhokisi. 10Ngono bushongola gwa Yahwe gukadelukila muna Uza bakanligila pasi ngobe aabilila Bhokisi ngono kafa ipapo mbeli kwe Ndzimu. 11Koga Dafite kagwadza moyo ngobe Yahwe baloba Uza ngono kadana pathu ipapo Pereziuza kuswikila nasi. 12Ngono Dafite katja Ndzimu tjose zhuba ilelo ngono kabe eti, “Ndowoyisa Bhokisi le Ndzimu ku nzi wangu tjini wali?” 13Ndizo Dafite kasitjayise Bhokisi ku nzi nkulu wa Dafite koga kaliyisa ntome ku ng'umba ya Obediedomu we N'giti. 14#1 Zwiyitikalo 26:4, 5Ngono Bhokisi le Ndzimu likagala mu nsha wa Obediedomu mu ng'umba iye mimwedzi ili mitatu ngono Yahwe bakakombolela nsha wa Obediedomu ne tjimwe ne tjimwe tjaakabe anatjo.
Kalanga Bible © Bible Society of Botswana, 2008, 2018.