CANTARES 5
5
1(Jini rey Salomón:) Tsa'ix juliyon tic pʌc'ʌb, quijñam c pi'ʌlet bʌ. Wolix c tuc' mirra yic'ot yambʌ xojocña bʌ c cha'an. Wolij c'ux chab. Wolic jap vino yic'ot lech.
(Jini xch'ocob ti Jerusalén:) Che'ʌch yom, c'uxula, japʌla ti pejtelel a pusic'al, come temeletla mu' bʌ la' c'uxbin la' bʌ. Yom tijicñayetla.
I ch'ijiyemlel cha'an tsi' poj cʌyʌyob i bʌ
(Jini xch'oc:) 2Che' wʌyʌlon ti ac'ʌlel, tsa' caji ti ch'ojyel c pusic'al ti ñajal. Tsa cubibe i t'an jini c'uxbibil bʌ c cha'an. Wa'al ti' ti' c wʌyib, woli' c'ajtin ochel ba' añon. Jambeñon abi c'uxbibilet bʌ c cha'an, quijñam, x'ujcuts a t'ojol jax bʌ, come tsac ñusa ac'ʌlel ti jumpat. Ach'onix cha'an ye'eb, che'en.
3Pero tsac sube: Jocholix c bujc. ¿Yom ba mic cha' lʌp? Pocolix coc. ¿Yom ba mic bib'esan? cho'on. 4Jini c'uxbibil bʌ c cha'an tsi' ñopo i jamben i ti' otot. Tsac p'unta tic pusic'al. Comix j q'uel. 5Tsa' bʌc' ch'ojyiyon cha'an mic jamben. Tsa' p'ajti ti lum jini perfume am bʌ tij c'ʌb yic'ot xojocña bʌ mirra che' bʌ tsac loc'sa cadena tac ti' ti'. 6Tsac jambe, pero ma'anix tsiquil jini c'uxbibil bʌ c cha'an. Tsa' toj sajti c pusic'al. Tsac sʌcla, pero ma'anic tsac taja. Tsac pʌyʌ, pero ma'anic tsi' jac'ʌ. 7Jini xq'ueloñelob tsi' tajayoñob. Tsi' jats'ʌyoñob. Tsi' lowoyoñob. Jini xq'uel tejclum am bʌ ti ts'ajc tsi' chilbeyon i pislel c wut. 8A wocolic x'ixicob ti Jerusalén, mi tsa' la' q'uele jini c'uxbibil bʌ c cha'an, subenla ch'ijiyemon cha'an comix j q'uel.
I yijñam mi' sub i ñuclel i ñoxi'al
(Jini xch'ocob chumulo' bʌ ti Jerusalén:) 9X'ixic a t'ojol jax bʌ, ¿majqui jini c'uxbibil bʌ a cha'an? ¿Mach ba lajalic bajche' yaño' bʌ? ¿Chucoch ma' lon tilel a subeñon lojon?
(Jini xch'oc:) 10Tsi' q'uixi q'uin jini c'uxbibil bʌ c cha'an. Wen uts'at ti q'uelol. Ñumen uts'at bajche' lujump'ejl mil winicob. 11Lajal bajche' oro i jol. I'ic' i tsutsel i jol. 12Lajal i wut bajche' x'ujcuts ti' t'ejl aban ba' ñʌch'ʌl i ya'al. 13Lajal i ni' i wut bajche' xojocña bʌ pimel mu' bʌ i colel ti pʌc'ʌb. Lajal i pʌchʌlel i yej che' bajche' lirio am bʌ i perfume. Lajal i yiq'uilel i yej che' bajche' mirra. 14P'ʌtʌl i c'ʌb bajche' oy melbil bʌ ti oro. I t'ojol jax bajche' topacio. Che'ʌch i sʌclel i bʌc'tal bajche' i bʌquel i yej elefante ch'ʌlbil ti ujʌl tac letsem bʌ i tojol. 15Chan i yoc bajche' oy melbil bʌ ti i t'ojol jax bʌ mármol chucul bʌ ti oro. Chan bajche' jini ch'ujte' ti Líbano. Ma'anic yambʌ winic lajal bajche' jini. 16Ña'tanla, x'ixicob, chumulet bʌ la ti Jerusalén, uts'atax i yej, tsaj i t'an, uts'atax i pusic'al. Che'ʌch yilal jini c'uxbibil bʌ c cha'an, che'en.
Currently Selected:
CANTARES 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.