CANTARES 6
6
1(Jini xch'ocob ti Jerusalén:) X'ixic, a t'ojol jax bʌ, ¿baqui tsa' majli jini c'uxbibil bʌ a cha'an? Mux caj j coltañet lojon ti sʌclaya.
(Jini xch'oc:) 2Tsa'ix majli ti' pʌc'ʌbʌl ba' xojocña pimel, cha'an mi' pʌy i yʌlac' ba' mi' cha'leñob buc'bal. Ya' mi caj i tuc' tilel lirio. 3I cha'añonix jini c'uxbibil bʌ c cha'an, c cha'añʌch ja'el. Mi' pʌy majlel i yʌlac' ba' mi' cha'leñob buc'bal.
I ñoxi'al mi' sub i ñuclel i yijñam
(Jini rey Salomón:) 4C'uxbibilet bʌ c cha'an, a t'ojol jax che' bajche' i lumal Tirsa. A t'ojol jax che' bajche' Jerusalén. Ma' xujch'ibeñon c pusic'al. 5Mʌyʌ a wut, come wola' pʌyon. Lijlaw i tsutsel a jol mi' mos a quejlab. Che'ʌch yilal bajche' alʌc'ʌl mu' bʌ i jubel tac ti' wits Galaad. 6Sʌcji'an i bʌquel a wej che' bajche' ña' tiñʌme' che' ujtel ti ts'ʌmel. Ts'ʌcʌl an ti a wej. Ma'anic sajtem bʌ mi junts'ijtic. 7I t'ojol jax a choj che' bajche' cha'jajp manzana ya' mosol ti' pislel a wut. 8An yambʌ uxc'al quijñam, laj x'ixico' bʌ rey, yic'ot chʌnc'al x'ixicob ti cotot, yic'ot cabʌl xch'ocob mach bʌ tsicbilic mu' bʌ mejlel c pʌy. 9Pero jatet jach, x'ujcuts c cha'an, ma'anic a p'ajomal. Mij q'uelet ti uts'at. Ma'anic mij c'uxbin yambʌ bajche' jatet. Jini x'ixicob ti Jerusalén uts'atax tsi' q'ueleyet. Jini x'ixico' bʌ rey yic'ot yaño' bʌ año' bʌ ti cotot mi' subob a ñuclel. 10¿Majqui jini? che'ob. Woli' tejchel che' bajche' q'uin che' ti sʌc'an. I t'ojol jax bajche' uw. Lajal i c'ʌc'al che' bajche' q'uin yic'ot ec'. Mi' toj sajtel lac pusic'al che' mi laj q'uel, che'ob.
(Jini xch'oc:) 11Tsajñiyon ti pʌc'ʌbʌl ya' ti joctʌl cha'an mij q'uel bajche' yilal i te'el come i yorajlelix mi' cajel ti nich. Com j q'uel mi woli ti nich c ts'usubil yic'ot granada. 12Tsa' caji c ña'tan c pi'ʌlob ya' ba' ch'oyolon. Cabʌl tsac mele c pusic'al cha'an ñajt an c pi'ʌlob. Tsa cʌlʌ tic pusic'al comix cujchel majlel ti buchlibʌl ya' ba' añob.
(Jini x'ixicob ti Jerusalén:) 13La' ti sujtel ba' añon lojon, xch'oc ch'oyol bʌ ti Sulam. Sujten, sujten cha'an mic cha' q'uelet lojon.
(Jini xch'oc:) ¿Chucoch ma' sʌclañon ch'oyolon bʌ ti Sulam?
(Jini rey Salomón:) Uts'atax mij q'uelet. Mach mejlic c mʌy c wut. Come a t'ojol jax che' ma' ñumel ti' tojlel jini woliyo' bʌ ti son.
Currently Selected:
CANTARES 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.